SSB amollem hochu Pratap Singh, Amit Tiwari, Helsu Serfa leh Kishore Kunal ahiuve. Sepoy mi 2 nasatah in akisukhan mikhat hi ambush jouvin ageinalam akihepoi. Police ho seidan in thil asojouhin security akisusangin, police, CRPF leh Army hon Amlaiguri gamkai sunga khoni ahin galguh bolho holchilna akineije, atiuve. District police official ho seidan in kihou chamding deilou NDBF hohin sepoy 500 aneijun, ambush bolhi amahohi hiuvinte atiuve.
NDFB chaiman Ranjan Daimary hi jail'a um ahivangin anung juihohin Bodo te dinga chamlhatna gam kasat jingdiu ahi atiuve. Ministry of Home Affairs noija gamgi vengtup dinga kiphutdoh SSB hohi Indialeh Bhutan border vengtup dinga Tolbol 2004 kumma patna kikoipan ahitai. Bodoland Territorial Council (BTF) noija Kokrajhar, Udalguri, Chirang leh Baksa district hin Bhutan toh border kikop uvah ahi. 267 km a sao Assam sunga India leh Bhutan border a SSB hohi Royal Army Bhutan in Ollha, 2003 kumma ULFA, NDFA, NDFB leh Kamtapur Liberation Organization anocheh jouva kikoipan ahi. Akinocheh masanghin hichi galguh bolhohin ngahmun 30 tobang Bhutan noilam ah aneijun ahi.
SSB hon akisah lelpi pen uhi galguh bolho Bhutan leh India kikah a chematsah louding tihi ahi. Hetbeding chu tulha kipat tilchun kihou chamding deilou NDFB hohin Kokrajhar district, Assam'a Gossaigaon munna rail lampi bomb in akapjal un kum 6 chapang khatleh adang mi 12 athin ahi.
Intelligence ho seidan in kihou chamding deilou NDFB hohin security force ho akap gouvin, mipi tamnalah holeh rail lampi hoa bomb apokehsah gotnun chuleh official lenho thading agouve. India leh Bhutan gamgi sunga gammang lah hokhu apansatnao ahi. NDFB hohin BTC district 4holeh north-central Assam a Sonitpur district a nasatah a sum adon u ahi.
