Hiche kin ahin Pu Th. Baite in eimite ho akhohsah naleh agelkhohna thuphon aneiyin ahi. Aman aseina ah, "Ahelou ho hetsahna leh lungthim'a tilkhouna hi midangho sangin eimi ho kakhohsah jeh'a hilai muna kibol ahi, ijeh inem itile khangdong lekhathem tamtah aumvanga ache nadimun kihetlou aumin hiho loidinga chu 'Self Employment is Best Employment' kiti thugol hi kathejal nom ahi' ati. Manipur sung ahin lekhathem lakh 5-6 kikah tohding helou aum uvin hiho hin Govt natoh aneidiu kaphatsah nan hinla amaho macham tah in tohding aneidiuchu kalungtup ahijoi, ijeh inem itile ichenna mun ho ahin bolding atam in sumhol nadi atam e amavang akhoh pentah chu ipipen ibol diuham ti ihetdoh loujeh u ahi tinjong aseiye.
Pu Thangkam Misao in hito bang kin-gon adeh a eimi ho chenna muna ahinbol jal in Pu Th. Baite chung ah kipathu aphong in ahi. Aman aseibe na ah, Govt. natoh dinghi dei aum nan hinla tuchung Jilkung 500 kilah nadinga mi 10,000 valjen in minkhumna anei uchun athemho akigelbeh set tapoi, hi tobang dinmun lah a hi eima macham tah a tohding neijoh hi akhohpen khat ahitai, hiche nading ahin Govt. in kithopina tamtah ST ho din apei, hihochu aum danjoh khol uvin atin ahi.
Chief Guest Pu V. Tualthang injong hitobang seminar hohi Tribal holah a aumdi kana geljing ahin tun Pu Baite in ahin gongdoh pantai. Eimiho lah a igel khohpen diuchu Industry iti isep doh diuham tihi ahitai.
Ahin alangkhatna over confidence inei jijeh uvin ilolhing jouji pouve, Lamka khopi a thihkil semnading industry ana kibol injong asemdoh nading thil lel lo umnama jongle achelhapoi ajehchu eimi hohin "ima jouse kahenai' iti jijeh u ahi. Imajouse hea ikisei laitah uchu ima ihet lounau ahi tinjong aseiye. Hiti ahi jehchun training najousea kahetai tilouvin jaojing u hitin chule vaihop dan heleuhen kilolhing ding ahi. Eiho lah a apoimo penchu chonphat, thutah chule thenna hi ahi.
Leiset kitet namun ahin lunglen tah le lungneng tah in um hiute tinjong tilkhouna aneiyin ahi.
MU admission test nikho ding hetsah
Imphal, Lhamul 26 : Department of Mass Communication, Manipur University akon hetsah khat chu Mass Communication, M.A. 1st Semester, 2010 a ding'a Admission Test chu ahung lhung ding Lhamul nisim 29 nidan 9:00 am teng um ding ahi akiti. Test bol nading mun chu Recreation Hall, Manipur University. Exam bol ding'a lom hon Lhamul 26 apat office hours a admit card lahthei ahi. Chutobang ma chun Department of Adult Continuing and Extension, Manipur University in Adult Education, 2010 a dingía M.A 1st Semester Admission test chu ahung lhung ding Lhamul nisim 31 teng nidan 10:00 am a um ding ahi. Candidate ho jousen admission card Lhamul 28 apat lah thei hi ding ahitai.
Manipur University a S.T. ho natoh kipe nomlou
Imphal, Lhamul 26: Mikhatnin Manipur University noiya S.T. hoa ding'a kikoidoh binder kiti atohmun a dinga documents lhing keija aselut vangin akilah pehpon chuleh Manipur University a registrar pan hichi thu a lunglhai louna lekha ase vangin thunei vaihomho hin alahpeh lounao ajeh hoitah in aseithei pouve. Binder natohna dinga apply bolnuhi Chandel district a Purum Tampak kho a Noren Chothe chanu Elizabeth M Chothe ahin, lekha kimkeija aselut vanga akivat aumnalaije tia aminhi kijao sahlou ahi. Hichitoh kisaihin Elizabeth hin Manipur University registrar pa koma Lhamul nisim 22 nia chu lunglhai louna lekha aselut ahin interview hi Lhamul nisim 30 nia bolding ahitah vangin registrar pahin tuni changeijin donbutna ahinpepoi. Lunglhai louna lekha apehna receipt number chu RCP/ 100949 nikho 22/7/2010 ahi. Elizabeth hin MU a thunei vaihom hohin application apehlut hi agelpeh uva binder tohmun'a dinga interview ajaoding adeidan aphong'e.
Imphal khopi a Kargil Vijay Diwas nikho kinit
Imphal, Lhamul 26 : Tunin Bir Tikendrajit Park, Imphal mun ah Kargil Vijay Diwas kiman na achun chief minister O. Ibobi Singh in houlim aneina ah India gam huhdoh nadin sepai hangsan mi 7 Manipur akon Kargil War, 1999 achun ahinkho ana tohdoh uve ati.Ahinkho tohdoh lah achun Riflemen Charles Nicholas Mayon, Beningvir Mayon, Jamkholal Vaiphei, Kapani Asuli, Daikho Mao leh Birneithang (Lance naik) jongapang'in ahi.
'Nam ponlap (Tricolour) domsang pum'in sepai hon Kargil mun ah gam sukeh ding goho ana ting uve' tin chief minister in aseiye. Aman aseibe na ah hinkho ana tohdoh sepai hangsan hohi akum kum'a kigeldoh jing ding ahi ati. Tuni kin kiman na achun Army top officials, Assam Rifles, BSF, ministers, MLAs, state officials leh police officers ho injong amollem saho jana apeuvin ahi.
Thingnoi 1 kiman’a kivo
Imphal, Lhamul 26(NNN) : Tunin Imphal khopi ah thingnoi mi hidia ginmo khat in pharmacy khat a hand grenade aseplut in avelía umhon amapa chu aman in voh kitin avo uvin ahi.
Thilsoh hi Regional Institute of Medical Sciences (RIMS) campus kom nilhah lam'a VSA Pharmacy sungía hand grenade chu anase ahin vangphat umtah in apohkeh pon ahi. Apet pet in loujoh pa asung'a kon'in ahung chomdoh in matdia adel leh avelía mipi hon ana man un avo uvin ahi.
Chujouvin amapa chu police ho kom ah pedoh ahitai. Ama hi K. Ingocha (49) s/o K. Khamba of Keishampat, Imphal a cheng ahi akiti. Police hon aseina ah amahi People Revolutionary Party of Kangleipak (PREPAK) ahin chuleh amapa hi nivei lang ana kimansa ahitai akiti.
Hiche pharmacy chu NGO noiya Ibotombi Waikhom (66) s/o W. Munal of Liwa Lambi, Ningthoujam Leikei in abol ahi.
CM in Assembly toukhomna ah bill 3 podoh kit
Imphal, Lhamul 26 : Tuni assembly session toukhom na achun Chief minister O Ibobi Singh in government bills 3 apodoh kit in ahi. Hiche bills chu Manipur Municipality Community Participation Bill, 2010, salaries & Allowances of Members of the Legislative Assembly (Manipur) Eighteenth Amendment Bill, 2010 leh Salaries & Allowances of Manister (Manipur) Eleventh Amendment Bill, 2010 hohi ahiuve. Chukit leh dangka 782,36,83,000 crore hi department chom chom 7 a man ding'in Assembly in aphatsah tauvin ahi. Hiche lah achun Agriculture department a ding'in dangka 103,19,68,000 crore, PHED dangka 168,00,97,000 crore, fishery department dangka 24,37,90,000 crore, Irrigation and Flood Control department dangka 331,65,06,000 crore, Social Welfare Department dangka 136,04,21,000 crore, Relief and Disaster Management dangka 9,16,58,000 crore chuleh Economic and Statistic a dingía dangka 9,92,43,000 crore jong ajaovin ahi.
Manipur Assembly a security detjoulou kihedoh
Imphal, Lhamul 26: Manipur Assembly a security hon MLA holeh midangho ahetkhen loujeh uva Manipur Peoplesí Party (MPP) natong mi 4hochu MLA ho dan'a Assembly lut uva Sempatni a thilmankal deilouna jeh a Assembly gallery a konna ahungpen uchu security lhahsamjeh ahi tithei ahi. MLA kahi tia Assembly lutgo MPP noija khangthah natong mi 4 hochu Khanarok munna Y. Ibotombi chapa Y. Nabachandra (43), amahi Imphal East District a MPP youth frontía vice president ahi, Nambol munna K. Tomcha chapa K. Dineshwor Mangang (27) hi MLA K. Raina minna Assembly hall lutna ahi, Arapti munna W. Bhuneshwor chapa W. Bhubon (38) hi MPP youth wing a organizing secretary ahin MLA, Wungnaoshang Keishing minna Assembly hall lutna ahi, chuleh Laipham Khunou munna Milanjit Meitei jinu W. Premila Le-ima (34) hi MLA, M. Thorrii minna Assembly hall lutna ahi. Security hatnamun tah a hitobang thil asotheihi Manipur Assembly hin mipi komía ahilchet ngaijinte. Assembly Speaker pahin hichi thu ahin ima asei naipoi. Hichi thilsoh hi acting Speaker pan jing-an nehna dinga kilha ongna abol masang jep chachu ahi. MPP natong mi 4 hohin nidan 1.10 c.n. vella chu thilman kaljeh a alunglhai lounao asapmu ahi.
Chomkhat jouvin Assembly a security hochun mi 4 hochu aman un Assembly security indan sungin ahen taove.
Thuso lakhom miho komma ahoulimna ah K. Dineshwor hin MPP hon hichi kabol uhi thilman akal
behsehjeh a mipi ding gelkhohna a kabol'u ahin, Minister holeh MLA hohin thil kingai chaho adeh a petroleum leh fertilizer hi ajoh un, tunia thilsoh hi mipite pohnat nahi Assembly a kitahlang ahi, tin aseije.
Public Accounts Committee hon thuchen phongdoh
Imphal, Lhamul 26: Public Accounts Committee (2009-10) nin alungel leh adeisah ho aseina ah Manipur public health and engineering department (PHED) hin thil achohteng uleh financial rules hi hoi- tah a ajui dingin adeisah in chuleh ngaichatna aum masanga thilchoh hi tunung leh aboltah lou dingin gihna aneije. Public Accounts Committee (PAC) a panghohi opposition lamkai O. Joy Singh hi Chairman ahin chuleh member hochu (abonna MLA ahiuve) V. Hangkhanlian, Morung Makunga, Ngursanglur, Dr. I. Ibohalbi, Y. Surchandra Singh leh Usham Deben Singh ahiuve. PAC report hi Sempatni a chu Assemblu a kipodoh ahi.
Agriculture department toh kisaijin committee hin Centrally sponsored scheme a konna oil seed production programme (OPP) a dingin dangka 26.03 lakhs hi treasury a kon in akiladoh in drawing and disbursing officer (DDO) pa khut in lha 5 leh lha 14 kikah sunghi Central Treasury Rules (CTR) toh kitoh louhel in aumme, tunung tubanleh gangtah a hopdoh dinga ngaichat ahi masanga treasury a kon na sum lahdoh louding ahi tin gihna aneije.
Sorkar hin loubolmi hon lou gasoh atamlah theina diuva pump-sets kipehi aman lhingsetna angaidam'a kahlah lahlehthudih tah a aman'u hinam tia akhol diuvin adeisahnao aphong uve.
PAC hin irrigation and flood control department (IFCD) hin natoh lenhohi aphatcha achaina diuvin gihna aneije ajehchu, dangka 12.75 lakhs a natohlen 2 hi achaina diuva kitep kum 4 leh akeh jouvin jong achainai pouve. Public Works Department (PWD) hin commissioner (works) pa thudoh donsea aneiloujeh uhin sorkar hin hoitah a kholchilna aneija a report hi PAC kom'a Sempatni a pat lhathum sunga ahin pehlut dingin adeisah un ahi.
PAC hin cheque thum dangka 9.45 lakhs cash book a kisunlut louva contractor ho akipeh hi alungdong lheh un ahi chuleh contractor ho dinga cheque akisem tengleh Central Treasury Rules (CTR) hoitah a akijuina dingin adeisah un ahi. Department hin M/s Sanyajee Ispat Ltd, Gauhati hi thihlhon man dingin security umlou hella sum apemasao vin thihlhon ahinthahlou phatnun dangka 49.41 lakhs hi amangthah ahitai. Hitobanga thildihlou kibolhi PAC hin adatmo lheh in ahi. Veterinary leh animal husbandry department in kithem channa ahinsei uhi kisangthei ponte ajehchu tender committee hin firmshon rates ahinseijat uhi vet tohna anei pouve chuleh tender committee jonghin rate quotation alhompen teni donlouvin athum channa Imphal a konna firm chu apommun ahi, tin PAC hin aseije.
Taxation department in nahsahna aneilou chungah PAC hin transport agencies 50 ho kom'a tax akivat hohi kimkeija adondoh uva agency lepche hochu gotna apehdiu chuleh report hi PAC komma Sempatni a pat lhathum sunga ahin pehlut diuvin adeisahnao aphong uve.
Transport department chungah PAC hin taxation leh transport department hi hoitah a akithokhom honna alepcheho a konna tax kivat hohi adondoh uva sorkar account a Sempatni a pat lhathum sunga akoilut diuvin adeisah uve. Mill neiho 270 a konhin professional tax dangka 4.29 lakhs hi akimu naipon chuleh gari permit neiho 193 a konnin dangka 1.93 lakhs hi akimu hih laije.
Power department hon electricity charges adonloujeh un sorkar natong mi 39 hon mei fee pelouva a quarter adalhahjeh un dangka 3.51 lakhs hi dondoh louvin aumtai tin PAC hin alunglhai louna asei uve. Commerce leh industry department chungah dangka 9,63,664 lutna bamboo processing machinery Tamenglong, Churachandpur leh Imphal East district a akiphudoh vangin kumni le akeh jenhi natohna louvin aumtai tin PAC hin adatmo lheh in ahi.
