Manipur sunga district kuo (9) laha Lamka khopi hi Kuki te adia ki thangíat pi theina pen ahi. District dang hotoh itekah leh Lamka khopi khantou dan hi vetton thei tah ahi. Hinlah Lamka sung kivai pohna chuleh asunga cheng hon jilbe ding tamtah anei nalai uvin ahi.

Lamka mi hon Lamka bou angailut uva mundang a cheng a sopiho ding imacha agel pehlou uhi thildih ahi poi. Lamka hi Kuki te tamna pen hijong leh achanga ding joulou ding ahi. Gam khat in achanga din theina dingin agam sung ahin neh leh chah ninglhing sela aum angai in ahi. Hiche hi Lamka in anei poi. Lamka langho itobangin sum le pai ninglhing jongleu nisehía akiman chah nadiu ahung kondohna mun hi Phaitol leh Mizoram bou ahi. Mizoram akon thil hinlhut hi aman jong atam in, milham te dingin khanjou jat ahipoi. Atam jopi hi Phaipi lama kon ahi.
A khoh khat chu, Lamka langa umho akichih sah vang uvin, amahon ahinkho uhi agam neite thu thu ahi tihi mitam tahin ageldoh hihlaijun ahi. Vetton nadingin, Moirang khoa ahcha khat gari in atah khah jeha kotkha kiphinna abol tengule, Lamka sunga hi anidan sima hahsatna lhungah ahi. Hiche hin avetsah chu ahileh iti jongle Lamka hi atumía ding theilou mong mong dingchun ahi poi . Chuleh Lamka hi Kuki te gamnei laha gam khat bou ahi. Lamka lang hon Lamka bou atiuva aki sahlel laiseuvin amachal nadiu lampi kot akikha joh uh ahi. Hiche hi Kuki Nampi dia jong thilpha ahi poi.

Kuki chate kitimat nahi nelna bei ahi. Isopiu Naga te bon a pao cheng uh khatcha aki bahlou vanga hibanga aki ngailut thei uleh, Kuki te hi hibanga mimo ihiu ham ? Kuki chate lahía Lamka hon Sorkar lhacha chuleh aching le athem katam penuve atiuva akilet sahpiu uleh tunia hi ibola boina boipi tailou bolding dang bei tobanga kivaipo hiu ham ? Link language dinga Paite pau manding tia thulhut ana um jou injong aphun leh anoh aki homtho pon ahi. Hiche keo hilou Secretariat leh FCI thua jong aning akoia lunglhai lou dimset aum nalaiyin ahi. Hiche hohi mikhangtou chondan ahi ding hi tahsan aum poi. Boiína umlou nading pentah Gospel Centenary khumkhana kinjong kibau leh kisosal na a kichai ahi. Hichi hon avetsah chu ahile, Lamka mite lunggel leh chondan ahin khankho kiti aum pon ahi. Masanga chu ipu ipa tehon ìhilna beia hinkho mangmi’ ana tiu chu Gamsa tobanga hinkho mangho ana tepinau kisei tobang chu ahi. Lamka lang hojong nathu hil diu Nu le Pa nanei lou ngap uh hitam?

Kuki te gam toupha nahi gamneo chakhat ahi poi. Kuki te hin Assam, Tripura, Nagaland, Manipur,
Meghalaya, Bangladesh chuleh Myanmar gamkai sunga gambeh chanvou lentah inei uhi. Hiche hi
Lamka mihon ageldoh jing diuva thilpha ahi. Lamka aboi tengle gamgi jui dinga Tuibong akon gam nakhen jiu hi ipi kiseina ahi tadem? Hetthem hasatah khat ahi. Lamka gambeh hi 99% tobang Kuki tea ahileh, tunia hi Zalengam leh gamtum boipi hon ibola Lamka hibanga nanahsah uh ahi dem. Nahsah ding hibang tamna muna ki uma nahsah ding dang beihel ibahsah uva Lamka iboi piu hi adih thei pon ahi. Ahi loule Phaicham thingnoi miho ikichat najeh uva Lamka a ibusah ngap uh hitam? Thilpha bolah ina  ihisah uva boina umlouna munho iboipi laiseuva ikhantou lou diu ahi. Gam le Nam neilou hobou in Gam le Nam akineisah uve tia thuchih in ana sei chu tunia hi Lamka sunga ipoh doh uh ahi tai.

Lamka sung aboi tengle jat le nam chuleh Houbung lamkai hon vai hopna anei jiuvin, hinlah chamna dihtah aum theilou hi giltaha khol dingin aphai. Houbung lamkai atam toh lhonin Houbung jong atam in ahi. Mijouse hin ama ma namphat nadia bou taona anei cheh uh ahi. Hinlah taona anei vangun atam johin anam akihet pouve. Aphung achang kihetlou mite taona chu Pathenin asang nadem? Ahiloule phung tinin Pathen aneingap  ahi dem - Kuki Pathen, Zomi Pathen, Hmar Pathen, tia tao khat tou hitao em? Lamka boiína hi Kuki te boiína ahi poi. Kuki te boiína laha khat ahi tia simtha ding joh ahi.

Kuki te hi namneo ihi pouve. Ihahsat nahohi akipatna achom chom toh akilo vangin, ahung kon doh namun akibang soh keiyin ahi, Pumkhatna ium theilou nao! Lamka ho natna hin Kuki te gamkai jouse avetsah  ahi tai. Lamka ho mapui na tobanga Kangpokpi, Saikul, Moreh chule gamkai tampi hohin mitcho le mitcho loi tobanga anung sangu ijui uhi ngah phat ahi tai. Lamka ten Lamka thuso bou aboi piuva, gamdang chuleh asopi dang teu thusoh ho anah sahlou uhi nikhat nitengle minung aphah lel nao hiding ahi. Hiche jehin tunia hi eihon ilunggel teho iletsah uva chuleh sah le lhanga thusoh hohi inakol uva iki chin diu hi thil dei um ahi.

Kuki chaten Sangga banga hinkho isut uhi, hai phat ahi tai.'
Guest Editorial: Nancy Haokip