By: Joel Mangboi Haokip, New Delhi
 .......Banjom
Manipur Economy dinmun
Manipur hi gamnomtah chuleh neh le chah putna gam ahi. Ahin infrastructure le technology ho lhahsam
jeh in agam phatna ho ahina ding bangtah in akimangcha pon ahi. Manipur a Lengthei(pine apple) le Komla (orange) hi atuipen tobang ahin, 1983-84 le 1985-86 lai chun Russia , Singapore , Nepal etc ho changei in ana kithotdoh in, tulang hin marketing system ki tuplou jeh in export aki bolta pon ahi. Manipur hi mun hellah (severe terrain) atam jeh le infratructure lhahsam jeh in industrial development aumthei pon ahi. State economy hi 76% tobang agriculture a kon ahin chule cultivated area hi 9.41% (2 lakh hectares) bou ahin, hiche jong chu 52% hi phaitol gam ahi.



World Report dungjui in, mikhat kivahjou na ding in aneopen in gam 2 acres beh angai-e akiti. Ahile tua Manipur population hi 25 lakhs vel ahin, 2 lakhs hectares maimai chun mi hijat neh le chah a supply  joulou ding mong ahi. Hitobang a Manipur a thilput atamlou jeh in mundang a kon atamjo akipolut jin ahi. Food Corporation of India (FCI) in 1998 kum a statistical report apeh uchun, Manipur in kikumphah na ding in anchang (paddy/rice) hi 47 lakhs tones angaicha in, ahin state akon 31 lakhs tonnes bou produce ahi jeh in kumseh leh 16 lakhs tonnes tobang hi mundang a kon akipolut jiín ahi.

Chule 2000-01 chun Manipur a anchang putdoh chu 38 lakhs tones alhingjou in, ahin population akhan jing jeh in mundang a tamtah aki demand thouthou in ahi. Chule anchang leuna khat chu, local wine (Ju) semna a akiha man jeh jong ahi. Insung mi 6 in kumkhat’a anchang 12 quintals (pot 30 tobang) in aki kumphajou in, ahin ju semna a mikhat in kumkhat in anchang 30 quintals (pot 80 tobang) a sumang jouve. Achutile jujoh hokhun hatah a anchang aha nehmang jeh uhin, meilhei jujoh/jusem hokhu kikham leh phachom lheh dingdan ahi.

Manipur per capita net income (SDP) chu 1999- 2000 in Rs. 11,370/- ahin hichu SDP annual average
growth rate chu 10.52% tina ahi. Chule manufacturing sector lang a growth chu 8.03% ahi. Manipur GDP hi Nagaland , Sikkim le Mizoram ho sang in ahoijo’n ahijeng vang in latest survey dungjui in, India a poverty rate lhomnapen chu Nagaland, Delhi le J&K ahi. Manipur a mivaicha hi phaitol sang in thinglhang a ajat gup (six times) in atamjoín ahi. Thiyam Bhagat seidan in, 1973-74 sungía Manipur a mivaicha 5 lakhs ana hi chu 1999-2000 kum chun 7 lakhs aphajou-e ati. Ahin National Commissions for Women hon statistics apieh dungjui in, 2000 chan a mivaicha chu 4 lakhs vel in ape uvin ahi. Chule tuhin Manipur a registered unemployed um khu 6 lakhs ahin, semi unemployed work force umjat hi 5 lakhs vel ahi.

Manipur a nehguh ahat jeh in development jong ahina ding bang in amachal joupon, mivaicha jong
apung tultul jengtan ahi. Vetsahnaín, Ccpur a khuga Dam sahna jong kum 30 lhingdeh alut in, hiche Dam
neokhat sahna ding maimai chun Rs.250 crores val alut in, Engineer le contractor maimai hon anehdoh
uchu Rs. 30 crores alhingdeh chet in, minister ho le adang ho nehguh kisimtha nailou ahi.

Ahin 2002 a akihondoh a pat vel 3 tobang canal apohkeh in, avellah a chengho diín thaang kikam (trap) tobang ahitai. Tuthah a CSW ho seidan chun, Manipur a mikijoh (prostitutes) hokhu gal le tuol jeh maimai hilouvin Khuga Dam jeh a inn le lou kilah peh tamtah jong aum uve atiuve. Ahile India a Dam lenpen hiding (in terms of energy output ie 1500 MW) Tipaimukh Dam khun ijat a kijoh ahin umsah tadem? Manipur in energy angaichat mong ahin Tipaimukh Dam ki sadoh leh Manipur in 20 %( i.e.300 MW) share amuding chule loadshedding tiho umta louding ahi.

Ahin akidang khat chu, 2008 a Germany development agency hon Manipur a power distribution system
semhoina panlah ding agon chun, State govt. in donse in ana neipouvin hijeh chun hiche project chu
Maharashtra in akilah tan, 150 Million Euro ichaanlo tauvin ahi. Hichu ana kiboldoh le energy jong kining lhingsel ding Tipaimukh jong atohkhah lou maithei ahi.

Ipi hileh Januray 13, 2010 niía 9th Manipur Assembly Session a Manipur Governor, Gurbachan Jagat
in 2010-11 sungía development budget ding a Rs. 3231.09 crores kigong ahidan le 2010-11 sung a mi
lakh khat natohna pehding danho aphondoh chu kinemtah in ana galdot mai taute.

Kukiland economy umdan
Igamíu economy umdan hi ivet le agamsungía kon putdoh (produce) umlouvin midang a kiki ngam tobang ahi. Vetsahnaín, igam uva sum khu natong hon lo (salary) alahlou teng aboithei ji’n ahi. Ajehchu,
igamsung uva summu nathei atamlou jeh leh sum umsun jong ki kholthei louva mundangía aki thotdoh
jing jeh ahi. Tuhin neh le chah kilhingsel in igamsung uva putdoh thei henlang sumkolveina kitup umthei
le, sumtam (money circulation jehía) thei ding ahi. Igam uva product tam leh thilman jong bailam ding,
chule mundang a kon thil ki polut ho mantam tahtah’a ichoh tahlou diu chuteng sum jong ikikhol thei diu ahi.

1980s vellai chun igamsung uva kon Thiing, Be, Malcha, le adangdang mundang a ina thotdoh uvin,
mitampin iphatchompi uvin ahi. Ahin tulang hin igam uva Agricultural, Horticultural le Forest products
atam tahlou jeh chun summu nading atam tapon igam u akeu (barren) abangtai. Hiche chungchon in thilman akhang tultul jeng in, 2007 chan a anchang Kg. khat a Rs.13/14 ana kipe chu tun Rs.22/24 ahitai. Sorkar natong ho lo apun teng, thilman jong a kaljin, ahin govt. natong khu milhom cha bou ahin, agenthei chu milham mama ahiji-e. Civil supply jong akitup lou jeh in migenthei ho din hahsatna akibe jing in ahi.

Kukite hi atamjo thinglhanglei a kivah ihiuvin, muchi chivo ahoichan in nehding ikimu naovin ahin kum aphatlou teng adang a nehhol na thei lampi ineibeh lou jeh uvin, mautam kiel ho tobang aumteng hahsatna tampi itoh jiuvin ahi. Nikhotha jong mipa khat in Rs.70/80 bep alo ahin, hichun anchang Kg. 3 bep achohjou ahin kuntam te din nikhat nehkhop jong alhingpon ahi. Mihem hi anchang bouseh a aki khosa thei pon, chi, malcha le me them chohna ding le chapangho school fee jong ngai ahijeh in mipa khat in nikhotha alhompen a Rs. 300 beh alo angaijin ahi. Ahin igam uva nikhotha hijat lo jou chu mi 30% jong kihilou ahijeh hin economic crisis inei uve tilouthei ahipoi.

Um nalai ding...............