Hiche kin a lamtho dinghon kigotna nasatah a apat utoh kilhon in Mizoram munchom chom a kon in alamding
ho Aizawl khopi alhungcheh un, kigontup achaina art and culture minister PC Zoramsangliana vetlhahna noi in tunin Aizawl khopi ah anei un ahi.
Commonwealth Games 2010 Committe hon atep utoh kilhon a Mizoram a kon lhendoh mi 80 hochun ahunglhung ding Ellha nisim 3 tengle Commonwealth Games kipatni le Cheraw lam thupitah chu athodiu ahi.
Hiche lam vetsahna kalsong dingho che le vale man abon a state govt in apohdoh ding toh lhonin art and culture minister PC Zoramsangliana chun chief minister gelkhohna chu akipapi'n ahi. Chugoh hilouvin Commonwealth Games Organising Committee hon Mizo khangthah hon hiche lam tho dia deisahna aneijeh injong kipathu aphong in ahi. Lam jengseh tho hilouva Mizo mite chonphatna lam a kon muthei a avetsah ding injong lamtho a pang khangthah ho temna jong aneiye.
Numei 40 leh pasal 40 lamtho dia kilhengdoh hon kithemchuhna phatechan art and culture department
noiya Research Officer Lalchuailova lamkai nan akipantan, mihil in art and culture department noiya Instructor tohmun tong Ngurmawii apang e, tin thulhut chun aseiye.
Hetding chu hiche cheraw lam mihem 10736 in atho a kon achesa Lhakao nisim 12 nia chu Guinness World Record ananga ahitai.
Kathil thum’u eikipeh louleh NEIGRIHMS kakhadiu ahi; KSU
Shillong, Lhajing 20 (NNN): Khasi Students Union (KSU) in athum uhi amulou uleh North Eastern Indira Gandhi Regional Institute of Health and Medical Sciences (NEIGRIHMS) noiya MBBS course class hohi kisuboi ding dan'in aumtai. Mi phabep KSU general secretary, Hamlettson Dohling lamkainan Gansemni chun Director, Prof. M.E. Yeolekar chu ibolla NEIGRIHMS a seat 9 chu aphat kiletnung geiya Meghalaya mi simlai hochu kipelou ham tin dohchilna aneijuve. Hijeng nama jongleh, KSU hin NEIGRIHMS a Dean, B. Bhattacharya hin Institute a thil tampi asem hoije atiuvin ahi.
India sah-solam'a doctor simnom simlai ho seat 18 kichu dinga application akikouchun Manipur hi seat 15 akipen chuleh Assam hi seat 3 akipe e tin KSU lamkaihonasei uve. Tumasang chun KSU leh FKJGP tenihin Union Health Minister akimu piuvin NEIGRIHMS a thildihlou kibol hohi aseipeh u bannah suhdih angaidan jong aseipeh un ahi.
Dohling hin 'Akimupi a kacheu chun New Delhi a solna dingin simlaiho minhi tahlang chih-cheh angaipoi, institute
jonghin boltheina thalhingset akineije tin eiseipeh uve,' atin ahi.
Nakimu tonao ajeh pipen ipiham tia adoh uchun, Dohling hin 'Meghalaya mi simlai hohi education muna dinghin dangchah giugeovin angah un ahin alangkhat nah gampam mi simlai seat 18 muhohin class apan taovin, hichihi asanje kahe pouve' atin ahi. KSU lamkai pahin institutes a thunei vaihom hohin union thuseihi eilah pehlou uleh class postpone bol tailou adang lhending kahepouve, tin aseiben ahi.
