Tulaija TV vet kitihi remote control kichunan akimangin, adeh in chapang ho kah ah kinahkisao leh thungeilou seina amachal lheh tai. Inson jouse a TV vet hi phat suhmangna dinga ideilhen pen'u ahijinge. Kum somni masang vangchun achutipoi. News kilhaphat aum in, phatdang leh kivetnom jongleh akimupoi. Hijehchun, news lunglut phabep vangchun nilhah nidan 9:00 leh TV a news kavet ding ahin eisuboihih un atijengun ahi. Serial kilha hojong atampon "Hum Log" leh "Buniyaad" bangchu akilha petleh vengsung ah mi akimuji tapoi. Hapta khat ah "Chitrahaar" nivei asoh in chuleh Hindi film khatvei akison, insungmi kithutohtah a kingatho jenga ahi. Tulaija asun ajanna news kilha tohin gahtekah tem in. Min avet nomna dingin aning-akah, thil neocha cha geijin akholjeng taove. Ajehchu, afel lou uva ahileh ëDoordarshaní tobangbep ahibouve tin koiman avetpehji tapouve.
Kumgup masangchun nupiho kihou limna ingaileh 'Mihir chu adamhih in, lungset aumlheh e', 'Tulsi hi ibol'a hiti louchal ham. Apan nahi adihpoi', 'Baa hi mipha ahin, ngaidamtei nante' atijiuve. Anisehleh athusim akikhel vangin aminho uvang akikhelpoi. TV serial lunglutlou hochun ipi asei uva koi insungthu asei uham akiman phapoi. Nupiho kihou limna thupi hochu mijitoh akingaije, avel in ajinei kitne, akikhen taove tiho ngenchang ahi. Chomkhat jouvin nupi hochu maimoldeh in aum taovin "athitai" ti thuchenghi agah phapohjap jiuvin, achen achailah aseideh pouve. Koithi nasei uva ipithu umía hitam tia agah kidoh phatchun 'nahetloulai ham, mijousen kihou limna a mangta a. Janhi chun Mihir athitai' atiuve. Mihir chu nahetkhah miham? Tia akidoh kitchun ìMihir chu Kyunki Saas Bhi Kabhi Bahu Thi a hero ahi' ahinti taovin, hitah vangchun amahohin TV serial thu aseijiu ahibouve tichu ahin kimanthei bepme.
Mipin lainatna anei uhi amanchah uva entertainment industry hi minthang cheh-cheh ahin, tuhin film industry sangin aminchejo taove tithei phel ahitai. Amaho kichep danhi milung tongkha theitah a thusim asut uchu athemtah ho athosah uva aveho mitlhi asosahjiu ahi. Ahin, avehohi ibol'a lhisohnom uvaham? Koima hin kalhiso nomjeh a kavet ahi atilou heldiu ahin, ahinlah mi tampihin avechim pouvin, datmo umtah ahi. Hetding khatchu TV serial hohi athusim akipatna kipat achaina geihi thusim jihsa a kikoi ahipoi. Episode khat athochai teng uleh mipi lungel avet uva abana ding thusim asutkit'u ahibouve. Vetsahnan, Mihir athichu mipin apohnat behseh phatchun director nu Ekta Kapoor chun ahin hinsah kittai. TV serial tho a minche hohi min agelsang lheh in ahi. Political party hohin mipi vote muna dingin TV star minchetah ho tekahna a Aka Tulsi leh "Ramayan" thopa A G aka Ram hi election atetsah un ahi. Ama hohi politician pha hinao vintem tichu thuchom hitaleh, TV star hohi amihinao kidon louvin imoh vetsang jeng uve.
Tehse honbou ateh kahitai ti akihetdoh theije. Kum 40 valbep hohi teh akisa pouve. Hijongleh ei neolai toh tulai chapangho ivetkahleh akikhel aumtai tivanghi mudoh thei ahi. Akikhel lah a khatchu TV ahi. TV kikhelna chu ahileh hoijep jepma akisemdoh hi ahi. Tulai TV hi lim akicheh in aginjong angei lhehtai. TV channel aja a simlang aumtan mikhat vetchaihoi ahitapoi. Phat suhmangna ding ahilouleh education muna dinga vetthei atamtai. Alang khat- nah, channel duhdahlou nulepa atamjon achateu vetdinga adeilou jong atamkit leuve. Alhangpi a seidingin ivetnom kilhenthei atamtan aphalheh e tiding ahimaije. Tulai chapang hohi eima kumjat ahinphah teng uleh TV vetdanhi ichannah akikhel bedem tihi datmo aumlheh e.
Insungmi kilung tohtah a TV akivet khomtah louhi aphamolheh jenge. Chapangho vetnom alenhon akivet nompon, alenho vetchu chapanghon anahtheikit pouve. Masanga news vetphatleh thipchetna akium pettah chu tulaihin channel lhehle nan akimangtai. Technology hunglut hi mantamtah a ichoh u ahin, channel atam behseh tahjeh hin insungmi toh ëquality timeí akimang lhomtai.
