Kukite mitmona leh lhahsamna lekha jih jousen ijih uideh uvin, bethu kibilkhel abang jengtan, hinla kinepna mongmong umlou hitam akiti nunghin, machalna phabep thuso ahung kimuleh thanop jong aum in, tijat jong aum in ahi. Hiche tobang thuso hi khenthem nadin thilvetdan leh thilmudan jat chomchom aumji het apoimo in, hiho chu manchah angai in ahi. Kuki nam sepaiho ehche dem in idem un, mipi thalheng ho mipi lhensah louva amahon alhen uva, ahiala mipi phatchom nading abolsah lou u jong idem un, adihlou vang aumdehpoi. Hinlah tunihin vetdan chom khat in veu hite.
Pu le pa khang'a midanghon eija monghih jong leu chotpha le noishe a einakoilou uchu chihna chombeh ananei
jeh u ahideh pon, kihoutoh leh kilungtoh pum a tha-le-jung ana jekhom theijeh u ahipen-e. Tuni hin namsepai ho kipunkhomnathuijahulehichanpichediuhamtiaikipangam lou thu u ahin, akikhentel thu u ijah sang uva vang hatah a ikipa cheh diu ginmo aumíe. Ahileh, Kukite midangten agam jong japeh talouva lahpeh ding ngen a akigonlai hin vanthamjol a pat'a hinve hita lehen ipi muthei um am?
Min agam cheh aboipi ban a, migam jong itileh keigam kasosah dem atilaitah a Kuki chate namsepai ho amaho gamsung hisaho kichuna a akithato u kimuntin, amaho pankhomsah ding boipi louva amilham hon hot-le-thet a anei uva aseiset nau kimuntin, nam ngailutna-gamngailutna dihtah a ahinkho pedoh'a pang Kuki Gollhang thahat ijat ham khat chu kitahna le nampi adia thi-ngamna neilou miho thalheng kilhenna a akaidoh nadia tosot dia lamkaihon amanchah kimuntin, nam sepai jalamkaiho min Kukigam agepgep jinglai a kimuto loiloi a kihoutoh loiloi ding gong louva kilubuh letsah leh akhoptah'a kithupi sah phabep kimuntin, thunei vaihom hon Kukite kihoupi ding atileh koipen toh kihoudingham tia aholmo u kimuntin, nam sepai sese gah kihoutoh loiloi uhenlang Kuki gam huhbitna din kisalel pan tajong leu hahsa tah'a mipin akithopi leh ahuhjou nahnah diu ahidan kimuntin, amaho lah'a abang in zomi aboipiuva Kuki mipi dia thajekhomna a panlah ding a-ngongkai chetchot u kimuntin, loikhat chu ahileh Kuki sung'a phabepse thadou akiti kahsen Kuki min in tha kisepkhom ponte tia kiphin loi kimuntin, loikhat kitchun sating-salu achena ding dol'a chesah a Kuki nampi suhtup ding agot u kimuntin, mihon Kukite kisuh tup masang'a agam u lahpeh theichan lahpeh nadia bolthei chen kino tah a abol u kimuntin, pohnat jeh in lunglaigil a lonlhi thonggo bang a vachutchut in kikap inte. Hiche mipi vanthamjol'a patsa hinve ho lunglaigil natjeh a valha lonlhi thonggo bang chun namsepai lamkai kihoutoh ding nomlou ho chu amal khattou in gasepkha hen lang, ipiham tin hungveu hen lang, mipi thilmu chu muchen uhenlang, kumsuh loi uhen lang, kihoukhom leh kihoutoh ding makai leh tosot hatpen in pang taleh tin lungdeidan kineicheh din ginchat aum'e.
Tunihin sei leh im kibang in, namsepai ho thusah lou in nampi sung ah ima achal lha theipoi kitileh jou hilou ahi.
Ahin hitobang a thuneina tuh hohin mopohna lentah jong atuh u ahi. Mopohna lentah tuh ding mi hin lunggel thuhtah anei angai in, aching athem akihoupi ding leh nampi phatchomna dihtah ipiham ti aseikhompi ding angaichat dingdol ahi. Hitobang kihou limpi ding leh lunggel sekhompi ding mi hi tunia nam sepai jalamkaihon anei u hinam? Ahiloule kei geldoh sangía phajo geldoh ding aumpoiticheh'a ngalchangpa dan'a khosa cheh hiuvam? Tuchan a hichu anahi khah tah jongleh tunia hi thah gel din dei aumin ahi. Tunia mipi sumlepai a inle lou, car le jeep ichoh uchu natoh machal nading ahileh apha in, hinla nikhat nileh mipi phatchomna dihtah itohdoh lou uleh mipi ding gelna a mipi chung'a thanei thahbeh hungumdoh taleh, mipi a ahi tia ahinnunglah dingu jong phalsa a umchu poimo louding ham? Ajehchu revolution kiti hi aumsa chedan adihlouho khelding ahin, adihlou aumsa holah a khat chu ahileh mipi natong leh thalheng hon mipi phatchom nading jouse akihui lut uva amaho ahao chehcheh uva, mipi avaichat chehcheh hi akhohpen khat ahi.
Tunia revolutionary, tichu kikhelna tohgon lamkai hon ahao chehcheh kitiho toh kitho a amaho hao chehcheh
nading a mipi/nampi min ajah uleh Kukigam chu kimujong leh chamna leh lungmon na mipi dia umdeh louding
ahin ahi. Kukite chanvou midang in anehgam chu eimi maman negam leh aphajep'e iti diu ham? Kuki mipi dia
phatchom na hiponte.
Hijeh chun tunin kidem tapou hitin, tha jekhom nading joh in lunggel sepkhom in, nampi masang gel u hite. Nam sepai hon jong KNO ahilou leh UPF a kiloikhom a, itum a inopnop bolding'a kiloikhom ihiuleh a panna umdeh ponte. Thu adih-ahatpen khat noi a kituptah a nampi ngailut na dihtah jeh a kiloikhom ihilou laiseuvin minkhat noi'a kigop belbul chun nampi nasatah in machal sah jou ponte. Ahin tunia kinepna mipin anei chu ahileh, achomchom a aum nauva pat'a khat noi a ahungkhom soh thei uleh aban kal hinson untin, khat tah beh hunghi untin, chuleh kihoukhomna leh nampi makho seikhomding aching-athem lunggel theiho hin kihou to sah untin, hiche kihouna dungjui chun nampi khongpi hinbeng untin, nampi ma hintol unte ti hi ahiding ginchat leh kinepna ahi.
Nam lamkai hobou adihlou nau alhinlel nau iseihat un, mipin jong eima lhinlelna, lungneona leh molna kihetphat
hita louham? Thuso kiti apoimo dan hetbou hilouva phatea ahinjing nading'a panlah ding jong angai dan hetphat hita louham? Lhaseh'a thuso isim/ilah man phatea pehlou chu guhchat toh kibangchet ahidan hetphat
hita louham? Nam ngailut najeh'a asum apai podoh'a thuso eima apova ikihou mat nading'u angai khoh'e tia hinphut doh hohin manbeiía ahin semdoh u ahipon, sumlepai tamtah lutía thalejung leh lunggel, phat mantam tamtah senga ahinso doh u ahin, hichu a man pelou a ikilah leh tehse hon hieugu la gucha saigu la gucha atidan hileh gucha hina khat ahi tihi het phat hita louham? Houbung lamkai, khosung lamkai, mipa, minukhat gucha ahijingleh gamsung iti khantou dingham? Thuso kitihin agentheiho gentheina amaho mudan a asopeh ding, thunei vaihomho seijong amaho seibang'a asopeh ding, chuteng adih hung potdoh ding ahi.
Thuso a thulhutho khosung lamkaihon amaho lhinlelna asei khah/ajihkhah jeh a gap leh leusah kitihohi mipin aboldia jachat umtah ahidan hi hetphat hita louham? Thuso chu thunei-vaihom in jong akam asiptheilou/mipin
jong asip theilou dingdol ahi tihi ikihil phat u hita louham? Ahilouleh thuso in eideilou bang thilsoh khat ahinso jeh'a khosung/lhangsung'a hiche thuso khapding/hop-phal louding kiti jonghi jachat umtah leh khantoulou kitahlahna lentah ahidan hi ihetchet phat u hita louham? Ihiti ngol jeh uva ilamkai houvin kichepna a iman uva, midang ten noishe leh chotpha dinga bou imu u ahidan hi hetdoh phat hita louham?
Hou lamkai honjong ama houbung kho ijat a kiphutdoh tam? Mi ijat hiche houbung noija um am tia ikitet sang uva, houbung sungía pathen ngailutna lenggam mi ijat monghin ahetchet'a chuleh ahinkho a amanchah thei
nah am ti boipi phat hitalou ham? Pakai chu chamna lengpa akitin, a lenggam chu khat le khat kingailut na
lenggam ahidan, a khojat, alhang jat ahilouleh leiset'a lenggam ho tobang ahilou dan hetchet phat hitalouham?
Ngailutna dihtah chun mihem khatchu jou, guhchat, lepche, nehguh, thangthiíp, jon, khangitlou leh adangjouse
a kon a apuimanga aheng-akom adia kang ngailou vadung abahsahding thu hi houlamkai hon ahetchet uva
aseiphong phat u hitalouham? Hichun gam leh nam, namtin vaipi adamsah ding ahidan hetdohphat hitalouham?
Sorkar natong kitihohi, mipi thaneina noiya kivaihom nagam ahin, mipin anganse natong ahiuve ti hetphat ahitai. Hiche natong holoi in atohman kal val uva mipi sumlepai anehguh uva Houin sahna, pathen in angeh
khel'a som a som pehna, Bible simho kithopina leh mihem vet'a hoi natoh tampi tohna-a amanchah uhi adihpoi ti hetchet phat hitalou ham? Malai themgaohon lengpa jong adihlouna asosal ngapchat uleh tunia hou lamkaihon lengjong hilou, mipisoh hojong ipidia akichat uva, maipha avet u ham? Amahotah adia jong phalou ahidan ipidia aseipih ngamlou uham? Ngailutna thupha, Gospel chu ahetchet lou u hintem? Ole kivahna maimai a angaito u hintem?
Amitin hinkhoa Pakai in eidalhah pehu ngailutna lenggam kehlet ding golouva, sumlepai sum negu hatpenpen hokom a donkhom lele a Kuki Nampi Taona tia Koubru mol'a ga tautau jong ingah phat u hitalou ham? Taona chu lunggil'a ngailutna dihtah pum'a ihoulai pathentoh kihouna ahin, lhangphong'a mijouse het angaipoi tihi hetchet phat hitalou ham? Taona-inkhat hoilai molchung hama gasahsang'a hiche sumachunelou/chalou, genthei lengvai khat ikithopi leh ngailutna sangjo ahi dan ihetdoh phatu hitalou ham? Chapang lekha simlai hon ilhahse haimut khoplou leh lekhasim mo hel'a numei/chapang/mission mipi kikhopna a ikikhop pi jingkei uva, hou in aimu/lulhuh oidemnau ijahsah jingkei sang uva, pathenni/nitheng nileh kituptah leh lipset leh lungluttaha pathen houdan dih chu ngailutna hetchet ahichu ikihil phat u hita louham? I houbung mipin ngailutna thu hechen nailouva missionary gamtin a isol uva, nehguh sum ijat ham a kichom mi ijat ham ahetchet lou thu igaseisah sang uva, ngailutna i houbung sung leh igamsung'a hetchetna dingleh phatchompina ding'a thale jung sumlepai isen uva phajo louham?
Min abol cheh'e, midangjong akhuti, eihobou ihipouve tia themikichandiuham? Milham, lamkai, houlamkai, nam lamkai hon ngailutna dihtah nei in thilvetdan leh thilmudan chomchom hohi vekhomu hitin, gelkhom uhitin, iki nganse diuham, ikipat diuham? Kapa'n bon bollou, kanun bo'n bollou, kaloipa'n bon bollou, midang inbon bollou, ipidia ken kabol ding ham iti diuham? Olleh, imahi-hih jongleng tunin ngailutna jeh in kaboltheichan, thi-ngam in thudih leh ngailutna in panla pan tang e itidiu ham? Lamkai kahin ken pan inge iti diuham? Hiche idonbut nauhin Kuki nampi makho leh chanvou ding apui ding ahi. Nampi lunlai cheng leh khannou
golcheng, kihoutoh in kithukop in, Nampidin khongpi beng ute, japi lam nadin.
