Tukum hin India leh Pakistan thumvei akimuto hontan ahi. Akimuto honin, akihou honin chuleh kihoukit dingin akinopto hon'e ti tailou aphachom aseidoh sangjong aumpoi. Vangset umtah chu ijatvei kihoube hon jongleh kihoucham hon ponte tihi mudoh thei ahitai. Tukum Ollha leh kihou kitding aki nopto honin, aseidoh hondivang hetsa ahibouve. Ollha a akihou nahon dinghi lolhing nante tia sei hohin asei kheldiu ahi. India leh Pakistan chungnun akichu honhi goal kikhumto louva ball kipeh tobang ahin - ahat, adoi aumpoi. Hijeng nama jongleh, kiseiset to sangin aki houhon seh-seh jonghi aphajoi. Prime Minister tenin aseilhahlel nunga ministers leh saplenho alangto gel'a aseisah got uhi hetthem ahahsai. Ahinlah Pakistan foreign minister pa hin India langa pa ahouna hohi ngaithada aum behseh jeh hin BJP leh adang hohin tunung tubanleh Pakistan toh kihou tapoute atiuvin ahi.

Akihouna honhi ibol'a avel vella lolhinglou ahitadem? Kitah santo louna a kon'a hung pengdoh gamni kikah a kitahsan tona ahung umkit ding kalla hahsajo aumpoi. Nam tamjo Hindu tehin nam lhomjo Muslim te hoitah a ahinvet koldiu hi tahsan aumloujeh a Pakistan hi hung kisemdoh ahi tin ajeh len penin pangal hon asei uve. Hijeh chun, tuhin amani kikah a kitahsan to nahi hung umkit tahenlang hileh Pakistan aumkhoh angai tapoi tia
thu hunging thei ahi. India tahsanthei ahipoi tia akihilnau khu Pakistan te dinga kito natah ahi. A school lekha uvakhun jilkung pan igalmiu koiham? Tia adohleh simlai chapang hochun "Hindustan" tin asam uve. Alang khatnah, India jonghin Pakistan hi tahsan kitlouma ahi.

Pakistan foreign minister Qureshi in India foreign minister S M Krishna hi thuboiho seilhahna dinga tha aneilou jeh hin kihou laitah in aphatseh in New Delhi adong jinge atihi jingunna ikoukhat houna dinga kilomlou ahi. Ahimongin jong Qureshi leh aloiho jonghi phone a achunga hotoh kihou dingin apotjing uve. Adeh a Qureshi in India home secretary G K Pillai hi 2008 kumía Mumbai kibuluna a mastermind pa Hafiz Saeed toh kibangchet
ahi atihi Pakistan mipin India ahotnao kiphondohna a lahthei ahi. Qureshi jonghin Kashmir thu ajaolouleh India toh imacha kihou nomna kaneipoi tin aseije. Hichi dinmun'a um ihijeh uhin boinaho suhlhapna dinga Pakistan hi India kom'a ahung dinghi ginchat aumpoi. Pakistan army hin gamsunga politics jonghi adeilang langa ahei ahin, Pakistan civil sorkar hin army donglouva India leh Pakistan thuboina aseilhah louhel ding ahi. Pakistan army jonghin ama nopna louva civilian sorkar hi Kashmir thu aseisah louhel ding ahi. Hijeh hin mi themkhat in India hin civilian sorkar toh akihou sanga Pakistan army toh jangpetna akihou jenga phalouham tia gelloi aumme. Hijongleh, India hi democracy pom ahijeh in hithei ponte.

India-Pakistan Foreign Minister kihouna alolhin louhi datmoding ahipoi. Pakistan hin kihouna amachal dinghi adeipoi. Ajeh tamtah umjongleh tua US jail a kihen D C Headley in 2008 kumma Mumbai kibuluhi Pakistan ISI hon mastermind abollu ahi tia aphondohjeh hin Pakistan tehi neldi chunga dingdet theilou bangin India toh akihouna a hin changmellin ading jou tapoi. Hichi thuhi hungthip phot henlang Kashmir thuhi kipodohleh tihi Pakistan dei ahi. Galguhbol hothu akiphahpoh pou-pou leh Qureshi hin kihouna asuh nohphah nadinga military leh ISI ho hilguhna amu hidingin ginmo aumíe. India-Pakistan kihouna 1998 kum'a anakipan chu 2008 kum'a Pakistan te panhuna a Mumbai akinokhum'a chuleh hichi a panlaho chunga talen ima anapehloujeh a kineijom louva ahitai. Hijongleh, Pakistan'n Mumbai nokhumho chungah action laoving ting kagam sung uhi India douna a natohna dingin phalpou vinge atijeh uva kihounahi hung kijom kitna ahi.

Gam teni kikah a thunoh suhlhapna dinga hin Pakistan lamkai hotoh kihouna jompehding tailou lampi dang aumpoi. Mipi vanghin lamkai lenhoseh akimuto sang uva gamteni a mipi hi akipolkhom sah uva, trade leh commerce asuhkhang diuhi adei uve. Hichi jonghi gamteni a lamkailen hohin kiletsahna anei houhi apailhahlou uleh thil hithei ahipoi.