Ahinla hiche paocheng teni hi khat paiya khatjoh lahtum theijong ahipoi. Ani nia imang hal paocheng khat ahi. Datmo le hetnom umkhat chu Jesu Christa leisetna alen lai sungchun Houbung minhi Matthew 16:18; 15-17, sunga kisei tailou aphahpoh louhel tobang anahi. Ahinla Pathen Lenggam vang chu athuhilna tina ana seiphongle jinge. Hijeh a chu Seijui ho Jesun leisetna Pathen lenggam akile dohsah kit teng lamkai len khatna pang dia ana kinem ujong himai thei ahi. Hijongle Jesun asei Pathen Lenggam chu Seijui ho akinep piu Lenggam chu anahipoi. Hichu Pathen in tonsot'a vai ahomna lenggam joh anahin, leiset chunga hichelai leng gam banga kitung doh ding leng gam chu anahipoi. Chule Israel te sung seh a kitung doh ding Leng gam jong anahipon, vannoi hopsoh a kitung doh Pathen Leng gam anahijoi. Hichu khonunga hung lhung dinga kineppi lenggam anahipon, aitih a Jesu Christa umjing Pathen Lenggam joh anahi.
Hiche Lenggam ana ngalel nauchu thil thum jeh hinte:
(1) Kitepna Luiya Huhhingpu Messiah hungding, David Leng gam atun doh a, mipha phat thei aboh ding chule miphalou talent amat sah dia kisei jeh, (2) Daniel Themgao mu vannoi leng gama Pathen mite huhhinga umding jeh chule (3) Israel leng gama chidang nam dangten kumsot pi vai ahin hom le hiche bulputna a kona chamlhat angaichat jeh-u hithei ahi. Hiche ho jeh a chu Seijui hon Jesu thina akona athodoh jouva "tua hi Israel Leng gam nakile doh sah kit ding hitam" ana tiu himai thei ahi. Jesun adon nauchu Pentecost thu anahin hiche nichun Houbung ana kiphong doh tan ahi.
1. Houbung le Pathen Lenggam kimat louna:
Lenggam akiti teng Lengpa chun agam sunga athaneina mangcha vai ahom chule lenggam mite chu
amadia amite hi tina ahi. Kitepna thah a hin Pathen Leng le Houbung hi akisei mat pon ahi. Pathen Leng gam
chu 'ahung naitai', 'nalah uva aume' chule 'hikom ahinphatai', (Mat. 4; 17), kiti hohi aki mangin ahi.
Ahinla Houbung vang chu 'Kaphu doh ding', (Mat. 16:18) ahi ti paocheng aki mange. Solchah le Lekhathot hoa hin Pathen Lenggam thu hi ana kiha seipoi. Ijeh inem atile Jesun Solchah 1:7 a ìPan acham tah a Ama thaneina gotsa akoi phat nikho chu nangho het ding dol ahipoi', atipeh jeh jong himai thei ahi. Houbungchu Pathen Leng gam ahipon ahinla Lenggam mite tin akikouve (Col. 1:13).
2. Houbung le Pathen Lenggam kimat na:
Pakai Jesu le Houbung lamkai masa hon Pathen Leng gam naithu hatah in ana samphongun ahinla Houbung naithu ana seipoh pouve. Lenggam kipana thupha ana samphongun, Houbung kipana thupha ana kisei poi (Acts 8:12; 19:8; 20:25; 28:23,31). Lenggam chun Houbung asem ahi. (Lenggam chate chu muthei Houbunga kiloikhom mi hunghi ahiuve). Houbung chu Lenggam hettoh sah a pang ahi. Jesun, 'Hiche Lenggam Kipana Thupha hi vannoi pumpia kisei phonga kihet tohsah ding, chujou tengle kichai ding ahibouve' (Mat. 24:14) ati. Houbung hi Lenggam manchah ahi. Hiche Lenggam thaneina chu Lhagao Theng a kona Seijui ho kipe a dammo nat kidang tampi aboldam'u akimui (Mat. 10: 8; Lk. 10:17). Houbung hi Lenggam dia alamhil'a pang ahi. Houbung chu Lenggam kotheh akipei (Mat. 16:19).
Houbung le Lenggam kimatna chu Jesu Christa a huhhingna jeh hi ahi. Christa leiset'a ahung chun hu-
hhingna natoh abulhit tai. Thilha ano doh a damlou adam sahchun Pathen Lenggam chu miho lah a ahinpoh lhah ahitai.
Jesun, 'Pathen Lhagao vanga thilhate nodoh kahi vangleh Pathen Lenggam chu nalah-u lhung ahitai' (Mat. 12: 28) ati. Hilaiya ìnalah-u lhung ahitai' kiti paocheng hi Pathen thu hegil tampi kinelna khat ana hin amaho hilchet dan phabep veuhite. 'Nalah-u lhung ahitai' kiti hi: (1) R. H. Fuller chun Themgao thuseidana kisei alhung loulai ahijala tua patna lhungsa tobang kiseina ahi anati. (2| Morgenthanler chun, Pathen Lenggam chu alhungsa banga avel'uva um ahitan ahinla atah tah-a lhung loulai ahi ati. (3) Schnakenburg chun Pathen Lenggam le Jesu ahina le anatoh huhhingna hi kikhen theilou tutua jong umsa ahitai, ahinla Pathen Lenggam mong mong chu khonunga ding ahi ati. Caragounis chun 'nalah-u lhung ahitai' kiti hi tupet'a athu lhung ahitan, ahinla cross galdotna, khonunga lhung dia kisei ahi ati.
Hijeh chun hilai thucheng hi, ìKeiman thilha kano doh hi ahung lhung ding Pathen Lenggam kigotna, thilse chunga galjona ahin, Pathen Lenggam chu nalah-u hung lhung jengding ahitai tina ahi ati. Pathen Lenggam le Pathen chapa ahinna vannoi dia pepa kisei khen thei ponte. Lenggam'a dia athupi penchu Jesu Christa ahi. Ama chu Pakai le Messiah a Pathen in atun ahi (Acts. 2:36). Lenggam thaneina jouse kipe ahitai (Mat. 28:18).
Luke 17:21 chun, 'Pathen Lenggam chu nalah-uva aumtai,' ati. Bible danga chun 'Pathen Lenggam chu nasunguva aumtai' tia kile jong aume. Ahinla hiche kiseihi mihemin asophah thei ahiloule tua kile thah nalahuva aumtai' kiti joh hi dihdin akilange. Ajeh chu hiche Pathen Lenggam chu tahsan ho lah hunglhung ahitai. Akiseina miho adeh a Pharisee ho lah chu lhung ahipoi, amahon Pakai Jesu chu ana tahsan pouve. Hilaiya 'Nalah-u' kiti hi Pharisee ho nalah-u lhung ahitai tia lah sangin lhangpia tahsan jouse hopma 'Nalah-u' tia lah joh din akilome. (4) Millard J. Erickson chun, Houbung hi Pathen Lenggam kimu dohna ahi. Pathen Lenggam chu Leiset kisem masanga pat chun vanna ana umtai, ahinla Houbung vang chutin akiseipoi anati.
Achainan hiche Pathen Lenggam hi lhung ahitai ahinla hung lhungding jong ahi. Wayne Grudem
chun Houbung hin Pathen Lenggam thaneina aphon doh ahin, atahsan jouse chun Pathen Lenggam thaneina le atuina chu ahinkhouva ate khah ahitai. Lenggam chu Houbunga kiphonga Pathen vaihom nading chu tua kipan ahitai. Hijeh a chu Pathen Lenggam chu lhung ahitai kiti hi (Mat. 12 : 28; Rome 14 : 17), ahinla alhun chamkimset na dingchu hijep loulai, hung lhung chamkimset nalai ding ahi 1 Cor. 15: 24-28).
