Jan kaki choldo na akon ka hungthou vin jingdang ban glou tah in lungthim nom mo sesu in kaki sutheng thenge. Chu in ka mobile a sms simlou ho chu abanbanin kagah ven ahi leh Mobile news akonin 'Kuki UG group 2 kikap to' tithu kasim doh tan ka
lungthim hem'a sut abangjengin, apetpet in kakun lhan 'Aw Pakai kanam u hi iti lomlom kahiu hitam? Iti dan'a hibang lom'a keiho le keiho kahi ti kitha tou hitam?' tin Pathen henga chomkhat set ka office table a chun kakap dentan ahi. Chu tah chun ka lungthim a 'Kuki thingnoi hohin TUP LENTAH nei ahiuhi ageldoh lou u ahidem? Ipi ngaitou ahi dem? Ole eile ei ki tha jonghi gamtum muna dinga machal nakhat ahi atiu ahi dem, Kuki chapa chanu ahi leh kasopi ahi tia agelthei lou u ahidem? Nam ngailut najal a hung chomdoh u hilou u hija! a Nam mi khat toh ki that to jeng ngapchao ahi dem? Ole Nam ngailut na tah tah hi anei lou u ahi dem? tin na tongmo jenin sun nilhum in ka lungthim in kaki nelnel jeng tan, ajo nan Nam mite adeh a tuchunga kina tenin ana sim tei lhondin molmo tah hijong leh anoiya thucheng themcha hi kahin sundoh tan ahi.
Nam jousen achen agena mun ama a tahbeh ahi na dinga athei top so a pan alah bangin Kuki chaten jong igam u tuthah a eiho thanei na leh Govt. in eihet peh u ahi thei na dingin 1988 kum lam'a pat chun genthei na tamtah toh pan ahin lapan un, Ipu ipao gamchu mi thaneina gam anahi kit tahjeh in agam thunei sopi Naga ten igam uva pat in hinkho tamtah chaan tothon eina deldoh taove. Min gam neilou te tia uino jongno a eino doh uva kon'a lungmon na dinga ijot nao mun jengjong itha neinao ahi deh pon, mi vaihom na gama anop phat leh eithaova anop phat uleh sopi ihiuve eitiu kichai loulai leh nam lha lengvai na khat kitoh pai kit jeng theina ichen nao gamhi lungmon na himhim aum tapon ahi. Chuho jeh in eima ho ngeitah in Vai iki hopna diu munhi ingaichat mama jengu ahi tai tihi chapang cha jengin jong agel ahi tai.
Gamtum khat neina dingin Thingnoi ihin nei panun, tuchan in Organisation tamtah ineidoh taovin ahi. Hiche Organisation jousen atup chu 'Kukiten kivaihomna tum nei ding' ti ahi soh kei jin ahi. Chu bangchun Thingnoi ho goh hilou vin Kuki mipi te jousen malam kinepna thupi pen chu ahi tan ahi. Vangphat um le pachat umtah chu Group 20 lhingdeh inei hou hi Malam lungtup molso na dinga Lim 2 noiya ahung um thei un kipa aum lheh e. Chubana jong Lim 1 noiya ahung um nahlai diu jong hi mipi kipana lentah kinep na chu ahi.
Ahi leh tunin group tamtah lah a group ijat ham khat in 'KUKI TEN GAMTUM NEIDING' ti 'LUNGTUP LENTAH NEI IHIUVEî tihi isuh mil u hitam? Group chomchom himan'a Tup lentah nei hon hoilam chu i goal u hija ipi pen chu ibol uleh ilungtup u Kuki te kivaihom na tum chu hung umdoh thei dingham tia gelkhoh talouva eiho leh eiho hitia hi iki thato to uleh ipi ham aphachom ding? Ikitha tam chan uva Govt.in eipachat uva itup u gamtum chu eipeh diuva igel u khat hitam? Koibol ihiu ham? Ipi lomlom iki neh khah u hitam. Koi Lhim lomlom ihiu hitam? Nam mipin kaki neppi nao hoilam ba hitam? Kuki mina iki loikhom leh Kuki min pu jouse chu napen pi nasopi hilou ham? Ipi mela kive to na hiu hitam? Nampin kave ngam tapouve. Itih chanpi eiho le eiho ikidou dou jengdiu hitam? Itih chanpi namdang ho nuisat leh kihoulim nopna ihi jing diu ham? Namdang hon eithao bon ilhi kanglou lai!. Inpi, KSO leh minu mipa ten kaka jong aki jou tapoi.
Vo kanam Gollhangho Khangun lang thouvun, Namdang mol kalta, eiho denga kiki nana lai itih mol ikaldoh uva jona ponlap chu itun doh diu hitam? Nampin nangho kaki neppi nao na haimil u hitam? Tuni a thiho hi jingteng na hungkhah doh teng nangma tah in nahin it ding 'Aw kasopi kana tha napa maitave' tilou seiding um taponte.
Phat chesa laiya Nam dang hon ganhing tha a eithao ipoh nat uva nadou khom soh kei u hilou ham? Sopi chunga lunghan nakhat jeh a thina chana gotna peh jeng chu thilngai hinan tem? Bible in asopi ngailu lou chu Pathen ngailu lou ahi ati. Tuni a thilsoh hi achaina hijeng hen. Avelin kitup da taovin, Namkhat Kuki chapa cheh kahi tin kingai dam tou vin lang iti KUKI TE MALAM ding panlah khom ding ham tijoh gelkhom ding ngaito taovo ka nam sepai ho. Mi thanei na noiya um ihiuve tihi na
lungthim un chingjing uvin, eima gam ngeiya vai kihop ding ngaito jouvo...
Nam Sepai lamkai alena pat aneo gei jin TUP LEN- TAH NEI IHIUVE tihi lunga vopjing pumin i manchah choi un eima lam ngatsah louvin, lungtup gamjoh muna dingin mangchao hite.
Phate chan lunggil tah in gelin ngaito leuhen, Mi Country, Mi State, Mi vaihom na District a cheng ihiuvin mi Insunga eiho iki nah nah uhi jachat um nasah lou ham? Kuki chate khonung ding gelna a na In lum nomtah tah dalha a gamnoi thingnoi a genthei nathoh hilou ham? chujeh in TUP LENTAH NEI kahi ti geldoh jingin, Namdang te khut a ithiu ipohnat na lungnatna beilou laiya eima le eima khut ngeiya iki tha jengu nagel thei mongu hinam?. Ka den na kasa behseh jenge. Nam gollhang hatlai chujat chu gamtum muna dingjeh a thi a kisukha hileo ichan hamkhat inaijep chom lou diu ham?. Tua pat in Kuki chapa chanu chu katahsa kaphe kavou ahi tin lungin gelcheh taote.
'Aw chung Pathen iti kahiu hitam Kuki chate hi! Nam sepai ho lung hinhei temo, amaho jong koi ahi akihe tapouvin, alungmit u hin hasah in lang, alungtup gam'u hin komu peh kit tem'o. Nam dang te thunoiya kon'in Nam mipi apuidoh diu hi hin komu peh tei tei in o ka Pathen.'
