Missile kapset ding chun surface-to surface "Prithivi" chu ana kapdoh masa un chujouvin interceptor "AAD" missile chu wheeler Island akon in akap un radar mangcha pum in hiche Prithvi missile chu chunglam a aga kapse in ahi. Tua "AAD" missile chu altitude nem lah-a man hiding chuleh hypersonic interceptor missile ho chu endo leh exo atmosphere a manchah thei hiding ah. Endo- atmosphere a interceptor missile chu chunglam 30 km a sang chan leng thei dingin akiseiye. Hiche interceptor chu 7 metre a sao chuleh hi-tech computer leh electro mechanical activator anei ding ahi.
West Bengal a kikapto na a Maoist mi 6 thi
Kolkata, Lhamul 26 : Tuni chu West Bengal gammang lah-a security forces ho leh Maoist galguh bol ho akikapto jeh un Maoist mi 6 athi in ahi. Security forces a cobra sepai khat jong akitongkha in ahi. Janhi jan chun security forces hon Goaltore Metala gammang lah-a Maoist ho aum'e tia thuguh ahet phat uva adel lut uleh kikaptona chu an um ahi.
Hiche mun chu Kolkata akon 178 km a gamla ahi. Maoist ho chu Siddhu Soren makaina noiya um ahiuve akiti. Kikaptona chu jinglam 3:30 velía ana um pan ahin pung kal 4 sung kikaptona ana um in ahi. Gam mang laha chu Maoist ho hiding ginchat um thilong 6 ana umin ahi. Akitongkha Cobra sepai pa chu Kolkata mun'a pui ding angaito un ahi. Amuna chu police ho aumtan chuleh athi ho chu hetdoh ahi hih laiye.
Lok Sabha toukhom na phat chomkhat jouvin vohhai ahitai
New Delhi, Lhamul 20 : Tunia parliament Monsoon Session akipat to lhon in Lok Sabha chu 11:30 pm in toukhom akipan in, Speaker Meira Kumar in aum talou masang'a vice president anahi Bhairon Singh Shekhawat leh masang'a Union Minister chuleh Bihar MP Digvijay Singh jana in phat chomkhat thip chet in aum in ahi.
Amani tilouvin jong Lhamul 22 nia West Bengal a train toset a thi ho, Lhadou 29 nia Narayanpur a Maoist ho buluna a security forces thiho chuleh Lhaphul 22 Mangalore a Huikong tosetna thi ho jong Speaker in geldohna aneiyin ahi. Kargil Operations a sepai thiho geldoh na jong anei un ahi. Phat chomkhat jouvin kihouna aum masangin nikhat sunga din Inpi toukhom na chu Speaker in avo hai tai.
Congress in dan dihlouva mining kibol jeh a ‘Padyatra’ nei
Bangalore, Lhamul 26 : Karnataka state a main opposition party Congress chun Bangalore apat Bellary chan 320 kms a sao chu kengía lamjot kiphinna aneipan tauvin ahi. Hiche kiphinna hi vaihom a pang BJP minister Reddy teni ucha in dandih lou a mining abol lhon jeh a lunglhai lou vetsahna a kijotna hi anei u ahi. State congress lamkai ho leh party workers ho hin niseh leh 20 kms lam ajot ding hichu Iron-ore tamna Bellary mun Lhajing nisim 9 teng lhun ding angaito un ahi. Hiche hi "Quit India" movement phat toh kitoh a kibol ahi. Jnanpith Award anamu UR Anantha Murthy panna freedom fighters leh lekha jih minthang hon hiche lamjot kiphinna ahi pang diu ahi. Congress ho Padyatra douna a BJP in mun 4 a kijotna bol din tohgon aneikit un ahi. Reddy teni ucha hi dan dihlou tah a na atong lhon in chuleh Iron-ore ho chu gam dang'a akijoh-e tia ngohna anei u ahi. Hinla Janardhana Reddy in kingohna hi adih ahipoi, chuleh hiche thua congress leh Janata Dal-Secular in CBI kholchilna aum nadin angeh uve ati
Marksheets alhem umjeh a Exam department officials ho kholchilna um
Chennai, Lhamul : Lou alhem akihet doh banna tun class-XII marksheet alhem aum akihedoh kit tai. Engineering admission bolna ding'a hiche marksheet semthu hi kiboldoh ahin hijeh chun Tamil Nadu gam ah boina sangtah ana um in ahi. Hiche a ginmo umpen tah chu retired assistant headmaster, tiruvenkadam kum 60 a aup ahin chuleh akiloipi Ekamabaram, Directorate of College Education a record clerk ahilhon in ahi. Amani chu police hon aman'un thudoh anei pan tauve.
Hiche chung chonna Directorate of Government Examinations a officials phabep jong kholchilna aumíin chuban in hiche a pang phabep ho matdoh nadin special team akisemdoh tai. Hiche marksheet lhem 41 jen Tamil Nadu Engineering admission a counselling aum chun amandoh un ahi.
Hitobang dan dihlou tah a kibol ho matdoh ahi jouvin state sorkar in nasatah in gelkhohna aneiyin chuleh themmo na nei jouse matdoh nadin police ho thupeh anei tai. Officials khat in aseina a rubber stamps, printer, scanner university certificates ho matdoh in aum'e ati. Hiche banna simlai phabep jong thudoh anei un ahi.
India gam’a foreigners jouse alut apat apot gei kholchilna um tading
New Delhi, Lhamul : India gam'a hunglut foreigner jouse aumna le ache na jouse het thei na ding'in Home ministry in data-base khat semdoh ding tohgon aneiyin ahi. Hiche identity folder chu jou a bol theilou, machine in asim thei ahi tin akiseiye. Hiche tohgon hi lha kit teng leh umdoh pan ding ahitai. Galguh bol David Headley in gam sung vel tampi ahunglut a anatoh ho matdoh louva aum jeh a hiche foreigner visa, registration chuleh tracking system hi kiboldoh go ahi.
Hiche Immigration, Visas, Foreigners Registration and Tracking (IVFRT) project ahi dangka 1,100 crore lut ding ahi. Hiche tohgon noiya hi ima jouse Home ministry vetsuina a um ding ahitai. Hiche tohgon hi gam khangtou hotoh kibang'a kibol ahin foreigner ho vetsuina phatah hidin akiseiye. Hiche project hi kum khat jou teng manchah thei hiding ahi. Hiche hi akisem doh jou teng Indian missions ho vetsahna Islamabad, Dhaka leh London mun'a kibol doh ding ahi.
