Eimite hi social worker umlouna society ahi. Social worker akiti tengleh society a dinga natong thilbol kiti na ahin, society dinga natong thil bol mai mai ahipon, thil phabol ti na
ahin, eiho a vang umloulai ahi. Society a ding natoh thil bol ititengleh eiho nam sunga jong mitamtah aumthouve, ahin thil phabol umbehseh lou thu ahi. Society ititengleh nam khat chu kiseina ahin mithem khat thilkhat bol dinga tuple doi khat neija kiloikhom chu kiseina ahipoi. Eiho society sunga social worker tia ihet bouhi govt natonglou inn muna louna tong nomlouho, MLA minister khat nung juija office lah dunga suhlhai toulhai tho ho, ulsa soh louva sumle pai kihol ho, ajou analla kivah theiho, gamsung lhangsunga social lamkai ja kilep a tonggimlouva kivah ho ahiuve. Amaho boipipen chu paisa ahin hichebou chu builei khotna akhot u ahi.
Social field a lhaile ahijeh uvin social worker itijengu ahin, adih tah a chu social worker hilou hel ahiuve. Social worker khatchun gamsung dinga phachom mipi dinga phachomho bou aboipi ding ahin amachang kingailutna sanga agamsung le mipi ho angailutna hatah a sang joding ti ahin, hicheho bouchu social worker kiti ahin eiho society sunga ho vanghi jatchomjep ding dan ahiuve. Hiti ahijeh chun koima social worker moh hidoh joulou ahi. Social worker khat chu bailou hel ahi. Ngailutna mong mong le gutchu na mong mong chule kichang ngailutna abeihel tengleh bou social worker kihi theibep ahi. Eiho social worker ho vang amachang bou kivet ho amachang kingailu, mipi thisanía kivah ho ahibouve. MLA/MP/MDC ho jong social worker ahi ajehchu society phatchomna dinga natong dingleh thilbol dinga kilhengdoh ahi. Amahohi social worker mai mai hilouva adih tah hidiudol ahi ajehchu social worker ahina chunguva thaneina thuneina bulhingsetna aneiju ahi. Ahin akhohtah khatchu amahon jonglou hon a tho jeh uva gamsung khantouna ding jouse anehchaijeh uva boi ihiuve.
Eiho society sunga social worker dih tah umloujeh a tunichanna lhasam den ihitauve. Social worker dih tah khat le ni beh umjongleh inam sung chomloukah a kikhel jeng thei ahi. Social worker dihtah chu mipi lamkai dihtah jong ahi hijeh chun govt in jong hitabang miho chu jana sangtah apen abol atoh jouseu mohseh in don louvin akoijipoi. Lamkai pha miching japi hoituptheija lamkaipha lamkai dih itiuchu social worker dih tah ho kiseina ahi. Hitobang miho chu MLA hijongleh Minister hijongleh mipidinga phachomho bou aboipi thou thou ding ahi. Eiho society sunga hichu umloulai ahi.
Mihemhi alungsunga thil pha umleh umlouvin imajouse apoh ahin, natoh thilbol kitiho jong ilungsunga hungkondoh lou kibol theilou ahi. Hijeh achu mikitah mipha gamsung le namsung ngailu khatchun ada acham louva thilpha abol teiding ahi. Midih mikitah mipha miching gamsung ngailu khat chu ipi position a umjongleh thilpha abol thou thou ding ahi. MLA, Minister dinmun alhuntengleh thanei thunei ahitah jeh a thilpha tamjo cheh le lenjocheh abol theiding ahi. Tua eiho social worker ho vangchu imacha ahilou pet leh miphatah nam ngailutah danin hibangse asoh jiuvin thanei thunei khat ahunghi tenguleh michombeh asoh jitauve. Hichehi detmo ding chu ahipoi ajehchu alungsunga umlou chu ipi le ipi asuh toa aboldoh ding ham? Social worker dihtah hochu mijousen jana sangtah apen govt in jong jatah a anei ahi. Eiho society sunga ho vang mijousen miduh dahlou michavai mipi chunga kivah bep a agel u ahin, govt in jong hitabang ma achu agel ahi, ajehchu social worker dih tah ahiloujeh uvin japi dinga thilpha tampi kigongho alhunna ding lom lhunsah theilouho chu amahohi ahi tichu govt in ahet ahi. Eiho society sunga social worker hijat umlah ahin 2% beh adihtah anahi kha leh ichanna kikhangtou ding hitam?
Social worker dih tah chun atup le adoichu society phatchomna ding ahijengin thildang ajao behsehpoi. Ipi ham khat amachang phatchomna ding doile tup nei ahipouve. Aphat le achang akitoh khah jeh a MLA, Minister, MP kaidoh jong aumthou nai hinlah ipichu hitajongleu social worker ahinau akimelchih jing u ahi. Social worker ahijing jeh uva gamsung dinga phachom thil ho abol thou thou u ahi. Hiche laipenhi eiho Kukite sunga umloulai ahi. Kukiten MLA alhom penna 7/8 ineiju ahin, hiche kal a lhomsuh theilou ahitan kah lah le iboltoh kah u leh 9/10 chan jong ineijiu ahin, ahile MLA ihin neikal u hi kum 40 lhingkoncha ahitan, ipi itidanna tunichanna kukite tamchen nalah ho vaichat genthei le lhahsam nan alodim jing jeng ahidem? Kum 30 valjel
sunga ipi itidanna hichanbep iphah nalaiju ahidem ? MLA ikilhendoh hou jong MLA mai mai hilouva Minister jong umjing jeng ahiuvin, achutileh tua pat kum 30 ma nga be jongleu hen phachom nantem? Chief Minister chan kaidoh jongleu hen imachom hidingin gin chat ahipoi. Ajehchu ilungthim sunguva imacha umdoh lou ahi. Ilungthim sunguva eima chang inchen louchen kisemdoh ding ti kal val imacha umloulai ahi. Social worker dana hung chomdoh jouse jong aduh adah umbehsehlou ngensen, MLA ahinom jeh ham or ipi ham khat ahinom jeh ngensen ahin, koimacha japi ding khankho gel aumpon, ahithei channa mipi hi kivahna a neiding, eima kisemdoh ding tibouhi athupipen ahijingin lungdon vang aum lheh e.
Aw he! ada chu ada ihiuve
Pathen in la Kukite ding ti in social worker dih tah khat van a konin hinsol lhadeh pontin, eiho la kipeng thah deh pontin, tua lamkai holah mikhat beh in Social worker dih tah hiding tupjong umchomdeh louding ahin, mipin jong angolna leh lha dehpontin, lamkai social worker kahi tiho la apo kelngoi asung ngeihang kiti ngensen hijinguvin tin, church lamkai hon la member ho koma Pathen natohna ding ahi tin paisa loidoh thei chan loidoh jinguvin tin, church member vaicha genthei hahsatna neiho panpi nading program la umdehpontin, haosa honla development scheme khosung vengsunga dinga hungho amaho dinga hinkithot danin geljing uvintin, MLA ikilhendoh pau la tangtel lilaija lhalut bang jing jeng ding akaidoh masanga
akitep naho ahai mil tei teiding ahin, thildih lou thil phalou um dan dihlou isociety sunga kichepi ho adoudal ding la umdehpontin, michonse khang gilouho mipi thisana kivah ho nung juiding la kivatpontin, thilse bol ho aseipha ding apahcha ding atosot ding kivat pontin, mipha miching gamsung ngailu ho geldoh na nikho la umdeh pontin, paisa neiho bou inam sunga thupi mun alojing diu ahitan, kitahna nei miho doudai ding tamcheh cheh dingin akilangin, thudih thutah in mun amujoulou cheh cheh ding ahitan, thudih thutah seiho society sunga mun aneilou diu ahin, thudih lou le kitah louna in gamsunga vai ahop jing ding kinah kibaona le kilung khat louna in inam sung alodim jing jeng ding, ahat khat in ahat lou khat ajeh beija asuhnem jing jeng ding, mihaosa khat in mivaicha ho aneisun mitmu changa alahpih jing ding, langnei-sihneina umjing ding, thu adih a kitanlou ding, maipha vetna umjing ding, chaga chunga thutam ding, mihaosa chunga dan umlouding, theologian hojong mitampin Pathen hi kiselna a amanjing jengdingu, hougut beh kisa lhagao mang dingho lainatpi beh kisa a ama inchen kisemdoh ding gel mitampi umjing ding, ngalen in nga neo aneh banga eiho jong abol theihon abolmo ho kivahna a ineijing diu ahi tihi muphah theichanna kimu chu ahitai. Iti vangset umah hitam? Social worker dihtah(genuine social worker) chu Pathen natong dihtah jong ahi. Hitabang mi ahung umdoh tengleh kikhelna (change) khat vang hung umthou ding ahi.
Pathen henga tao pumin ngahhat maiju hite.
