kikhopna masapen aneijun ahi. Akikhom chengin District Level Kut 2010 hi alolhin tei nadin Sub-Committee semdoh ding atiu toh lhonin kilungtoh tah in Sub-Committee asemdoh un member ding jong alhengdoh un ahi.
Hetdia kul khatchu achesa nisim 1 nia kikhopna achun District Level Kut 2010 hi akikhom atamjo phatsah dungjuijin Kangpokpi a mandinga anakiphatsah uva ahi.
Chule hiche nichun District Level Chavang Kut 2010 Committee din anoija chenghi analhendoh-u ahi. Nehkholam Chongloi, Member ADC Chairman dingin; Jilthang Touthang, Member ADC Vice-Chairman; Seimang Khongsai Secretary; Thangminchon Singson Asst. Secretary; Chongpu Kipgen, CEO-SHADC, Treasurer chule member mi 25 jen lhendohna aneiyun ahi.
Rev. Dr. Kh. Khaizakham in The Village School thenso
Lamka, Ellha. 5: Lamka khopi sunga um Bijang Vaiphei Veng muna athah beh a chapangho ding gelkhoh najal a Playgroup ahiloule nursery dinga kigongchu tuni nilhangkai nidan 1:00 velchun Village Education Society te malat- na noiyin 'The Village Schoolî tia kiminsah school chu boljou ahitoh kilhonin hondohna kin aumin ahi. Hiche school hondoh nah chu Rev. Dr. Kh. Khaizakham, Principal ECT in a neiyin ahi. Hiche kinsung chun The Village School Headmistress Mrs. K Chochoi in school kibollo najeh le doile tup hochu asei
khomin ahi. Aman aseina ah, "Chapang hohin talent ahiloule lunglut toh kilhon'a kibelna khat anei cheh uvin, Nu le Pa tehon hiche alung lutnao gelphah peh lou helin lekha imoh simsah got jouvin ajo naleh thasetna chapanghon ahin neidoh jiuvin ahi. Hiho semphat dingle chapangho lamdih a chepi a amaho thatnop natoh kithoalekha ijil sah diuhi kalung tup u ahin chule chapangho katil khouna jingdiu ahi' atin ahi.
School Board langa patsan Nl. Nengboi Haokip injong The Village School doi le tup hojong phondohna aneiyin chule Pu Benjamin Mate le Pu Thangjamang Haokip injong tilkhouna thumop anei pin ahi. The Village School a hi chapang mi 30 bou lahding ahi danjong hetsahna thujah akineiyin ahi. Admission chu Ellha nisim 6 nikhoa pat hiding ahi.
Kum 9 numei chapang kimatgot jeh a pasal 1 kiman
Imphal, Ellha. 5: Imphal East district hopsung Kongpal Khaidem Leikai mun a cheng Khaidem Ito chapa tahsa kum 23 bep hinalai Khaidem Naoba chun Sept 30 nia tahsa kum 9 bep numei chapang Maisnam Joshila Chanu pummatanagot, losam hijongle ni 7 sung hentang ding in Ellha (Oct) 3 nichun police hon aman taovin ahi. Hiche hi chapang nu inkoten FIR Oct 1 nia abol uva kon a police hon Naoba chu achenna inmun a kon ana mat u ahi.
Thaopo gari 1 kihal
Imphal, Ellha 5 (NNN) : Imphal hinjon thaopo gari 1 tuni jinkah lam chun Nagaland mun'a ana kihallha in ahi. Police akon thulhut kimu dungjui chun hiche thaopo gari Imphal lam hinjon hi janhi apat Nagaland gamsung Zakhama le Viswema kikah aajeh kihelou'a kinga ahin, hichun tuni jingkah nidan 5:30 velchun melhetlou holoi in ana halchai kei uh ahi. Hiche gari chu regd no. MN 03-2071 ahi tin phondohna anei uvin ahi. Hetthei khat chu achesa Lhajing (Aug) nisim 1 ni apat thaopo gari hohi CRPF ho venbitna noiya analhai leu ahi. Chule United Naga Council hon blockade abol uchu ni 15 masang'a ana kiladoh ahitai. Ahin tunichun thilpo gari 180 tobang Imphal ahunglhung tan, hiche holah achun thaopo 12, LPG po 8, chule nitin ngaichat kipo hocheng ahi.
National Integration Camp chu CCpur DC in hondoh ta
Lamka, Ellha 5 : Nehru Yuva Kendra, Churachandpur makaina in Churachandpur College mun ah tuni apat Ellha nisim 10 chan chelha dingin National Integration Camp chu akipan tai. Hiche camp honna achun Deputy
Commissioner, Churachandpur Ms Jacintha Lazarus IAS chu Jingun in apang in ahi. Ms Jacintha Lazarus in
aseina ah India gamsung ahin chondan leh khosah dan hohi jatchom chom um jong leh tuchan'in kilungtoh tah in ichengkhom uvin India in chamlhat amutil uchun gam dang hon ipiti tahleh ahung kahjah tadiu-vem tia lunggel ananei nama jong leh tunichan a lungkitoh tah a khat le khat ikihet themto bang uvin mabanía jong ijompeh diu
ahi tin aseiyin ahi. Ruivah chu Regional Director in apang'in aman hitobang camp hohi achesa 2009 kum chun vel 100 aum'in, 2010 kum sung ahi vel 200 tobang um ding'a ana kigong ahin, hiche lah achun Manipur a 5 vei bol ding in akiseiyin, Chandel leh Thoubal district hopsung'a akichai tan hitobang camp kibol hohin khangthah tampi in aphatchompi dan jong aseiyin ahi.
Indian Social Science congress symposium umding
Imphal, Ellha 5 : Department of Anthropology and Centre for Myanmar Studies Manipur University hon ahung lhung ding Ellha nisim 26th-27th sung'a Pre-XXXIV Indian Social Science congress Syposium khat 'India-Post 1991 : Manipur and its people' ti thupia mangcha a anei diu ahi.
Organising Committee akon thuso miho ang'a phondoh ahibangin hiche Symposium hin polity, economy, culture, social problems, agricultue, industry, employment, educa-tion, health, quality of life, ecology, environment, natural resources, Bio-Diversity, Science and technology, climate change chuleh adang dang hocheng thupi mangcha a lunggel khom inei ding ahi tin ana phongdoh un ahi. Chung chon'a achunga thupi kisei hochenga lunglutna neihon thucheng 7000 val lou a jih thoa Ellha nisim 24 masanga Prof. N. Nabakumar Department of Anthropology Manipur Universtity kom'a peh lutthei ahi jong hetsah ahi.
District Literary Competition umding
Lamka, Ellha. 5: District Literary Competition 2010 Ahunglhung ding nisim 21 le 22 sung'a Churachandpur Collage mun'a um ding ahi. Hiche thu toh kilhon'a Pi Jacintha Lazarus D.C CCpur Chairperson a pang ding chulemember 6 gon-in aum in ahi. Hichea member hon tuni nilhah lang nidan 2:00 chun D.C office Chamber
mun'a meeting aneiyun hiche ahin District Literary Competition 2010 toh kisai thu chom chom aseikhom uvin ahi.
Education Department chung’a demand kibol
Imphal, Ellha 5 : Achesa phat masa jep a thingnoi hon Education department chung dangka crore 1 (khat) ana demand nachunga employees hon tija pum pum in natong thei lou khop'a ana um tah jeh uchun deisah lounan
achesa Ellha nisim 5 nichun toumun kiphin na anabol un ahi. Hito kilhonchun koi thingnoi ho ahi employees hon seidoh ngam lou-in employees hochunga ahung lhung ding Ellha nisim 7 nile date line apeu vin ahi. Chule gihna khoutah anei nachung uva employees hon ahung lhung ding council of higher secondary examination
hi ahin tohkhah thei din tijat na anaphong uvin ahi.
Kum 9 numei chapang kimatgot jeh a pasal 1 kiman
Imphal, Ellha. 5: Imphal East district hopsung Kongpal Khaidem Leikai mun a cheng Khaidem Ito chapa tahsa kum 23 bep hinalai Khaidem Naoba chun Sept 30 nia tahsa kum 9 bep numei chapang Maisnam Joshila Chanu pummatanagot, losam hijongle ni 7 sung hentang ding in Ellha (Oct) 3 nichun police hon aman taovin ahi. Hiche hi chapang nu inkoten FIR Oct 1 nia abol uva kon a police hon Naoba chu achenna inmun a kon ana mat u ahi.
