Tukum Lhalam phatsung chan chun gamdang kholjin mi million 3.8 tobang in India ahungvil uvin, hichu achesa kumlui toh vetkah ding'a 10 percent a kalbe ahi. Achesa 2009 kum chun gamdang kholjin mi million 5.28 lam in India ahungvil un, 2009 kum invang mi million 5.11 in vilna ana nei uvin ahi.
Tourism Minister, Pi Kumari Selja chun Commonwealth Games phatsung'a hin gamdang kholjin mi 1,00,000 lhing ding in ministry in ginchatna aneiye, atin ahi.
Achesa 2009 kum toh tekah dingin, tukum hin kholjin miho (tourist) 12.6 - percent in akhang in ahi. Chule achesa Lhajing (Aug), Lhamul (Jul) le Lhadou (Jun) lhasung hotoh vetkah ding injong aha khanbe lheh in ahi, tin aseiyin ahi. Aman aseibe na achun, gamdang sum kaina (foreign exchange) akon sum kimu jong apung in ahi. Achesa 2008 kum Lhalam (Sep) lha sung'a sum anakimu dangka crore 3,143 chule, 2009 kum'a crore 3,798 anakimu ho sang'a tam, tukum Lhalam sung chun dangka crore 4,678 vel akimudoh in ahi, atin ahi.
