Dimapur, Lhajing 27(NNN): Assam Rifles hon NSCN-IM "major" khat janhia atha ban a NSCN-K lamkai khat NCSN-IM hon atha kit jeh in Nagaland dinmun hatah in aboitan ahi. Hiche thilsoh toh kilhon chun NSCN-IM thuphon chun India toh hemkham kinei hi velvet ngai ding ahi tin central govt gihna aneiyin ahi.

NSCN-IM Ceasefire Monitoring Cell lamkai Phungthing Shimrang chun asei na ah, 'India sepai atam man a hitia avel a kimoh chaloh sah louding ahi', ati. Hiche hi Phungthing in Dimapur mun a thuso miho heng a asei ahi. Langkhat a Assam Rifles chun khopi sung angainaa akikhol le lai a NSCN-IM hon eihin kap phat uva kalethuh uva, kikaptona aumsung a NSCN-IM lamkai khat in thina ato ahi, ati.

Thuchen jo IGAR (N) a kon kimu chun asei na ah, "Assam Rifles leh 164 Inf TA (NAGA) kilhon khom hon Namsa sahlam gamkai a phalna beiya NSCN-IM busahna amudoh phat uva, sepai akoube u, ahunglhun utoh kilhon a anailut jeng uva na busahnao adihpoi, dan palkeh nahiuve hung kipelut uvin tijong seipeh ahi", atin ahi.

Kipehlut tahsang chun jamdoh toh thon thal ahin kap pai uve. Kiven angai jeh in 164 TA (NAGA) lam a kon sepai khat chun thal ahin lethuh phat a SS Major Ngachonmi Tangkhul tia kihe NSCN-IM lamkai chun thina ato-a, manchah tamtah jaona a Major khat le captain khat jong kimat tha nalai ahi, ati.

Langkhat a Wokha district mun'a akidoujing NSCN-IM hon NSCN-K lamkai khat ahin tha utoh kilhon in Nagaland gamsung hatah in aboi in ahi. Thulhut kimu chun asei na ah hiche NSCN-IM le NSCN-K kah a kiboina hi janhi jingkah matah 3:30 don a Mekokla khomun a kipan ahin thina toh NSCN-K lamkai chu Zaremo Udyou ahi akiti. Thulhut kimu chang geihin NSCN-K in lethuhna aneipon ahi.

Johthil ho adih a joh dia Mizoram govt in tohgon nei
Aizawl, Lhajing 26(NNN): Mizoram Food, Civil Supplies & Consumer Affairs Minister Pu H. Rohluna chun Public Distribution System (PDS) noiya LPG, POL chuleh nisih thil ngaichat ho hahsatna suhlhom a chuleh johthil choho manchah dia dan kisem ho mipi'n ahetthem a aphatchompi theina dia kihilna ding in district tin-in
amanchah din dangka lakh 2 cheh jong akipe tai, ati.

Hitia sum kipe a kon district tin-a Secondary Standard Laboratory khatcheh leh Working Standard Laboratories mun 4 cheh a sah hiding, johthil chohon thiljoh ho chung a lunglhai lou na khop a adihlou amudoh ho hetsahna pehlut nading in tongdon khutchoi 2300488 jong mipi anomchanmanchah thei ding in achesa 2008 kum'a chu hondoh ahitai.

Hitoh kilhon a Mizoram gamsung a johthil cho-ho deidan tah a PDS chelhah thei nadin state le district tin a Vigilance Committee jong avel a chohing kit ahi.

Hiche state le district noiya johthil cho kiloikhom mipi phatchompi thei a natong doh ho kipaman pehding jong govt in gontup sa'n akoiyin ahi.AAY/BPL noiya thil kihomho mipi kom a lhun masang a Legal Metrology noi a natonghon vetlhahna anei masat diu ahi. Hitia Legal Metrology umlou namun hoa LPG a kivei hon athilpoh ho agamkai govt mopo ho komía akihetsah masang uva mipi lah a ahopdoh diu phal ahipon ahi.