Khousabung district constituency sunga lengthei kituna hochu Khousabung, Bunglon, Muolhoih, Sangdo, Phunchonjang, Ningthiching, New Ningthiching kho hohi ahi. Amahohin kumsehleh gam acre 700 alhonaovah lengthei lakh 70 beh alou jiuve. Hichikho hoa loubolmi hohi lengthei leija kivahjeng uva ahi. Bunglon kho a Songpu Gangte (62) hin lengthei hi kum 50 val kahintu ahitai ati e. Gam neocha khatna ahintu pan'a 1980 jouva hectare ni langa akehlet ahin, tukumleh lengthei man dangka sang somgup beh amuding akineme. Lengthei leija kon'a achate 8 chu ahin khoukhah ahin tunvang atamjon sorkar natoh akimugam taove.
Lengthei johna dinghi loubolmi hohin aboipi pen'u ahi. Lengthei hi amahon aki-johdiu ahilouleh acho dingin
kivei miho ache jiuve. 'Festival Committee ho hapan najallin goledai noiya joh angai behseh tapon, kivei mihon
inah ahung kichohji taove,' tin Songpu chun aseiye. Manipur Pineapple Festival Committee, Chairman, Soizalal Thangzom hin masangchun mi athanop behseh loujeh in alei bolhon jong lentah aboljou pouvin, ahin Committee hin festival ahinpat phat hin mi tampin lengthei lei bol aphat chomdan ahin heuvin ahung thanom taove. Tunihin loubolmi 20,000 tobang hin lengthei atu taove.
Chani nei Punchonjang kho a Sonilla (27) hi lengthei phatchom dan hinhedoh thah ahi. Amanu hin 2009 kum'a patna lengthei katupan ahitan insunga kivahna a kanei jengu ahi ati e. S Thangjom hin lengthei atamjohi bazaar neocha chaho a kijoh ahibouvin, state pamlanga johna thei dinghi Committee hin kingaito ahi, tin aseije.
Pineapple Festival kithenso ni a ahoulimna ah Churachandpur DC Jacintha Lazarus, IAS chun Manipur gam leiset a hin thilpha tampi akon'in hichi hohi mipihin imanchah uva ivenbitdiu ahi. Lengthei hi agam leisetna kondoh thilkhat ahin, state leh loubol miho economy asemhoi jouding ahi, tin aseiye. DC nuhin loubol mihon lengthei ahatucheh nadiuvin atil khouvin chuleh sorkar jonghin kithopina theichan na nakitho pidiu ahi tin aseiye.
Manga Vaiphei thensona kina Chief Guest pahin lengthei tujouse dinga state sorkar lamkaina a festival lentah a boldoh dinghi hatah a kingaito ahi, tin aseije. Tu le tua hi lengthei lhophat kibah loujeh a lengthei nikho nit hi phat 3 a kimang ahi. Govt in lengthei hi state thei tia hetpihna peh ding a agon ahitai tin Pu Manga chun aseiye.
Langkhat a lengthei lhoumi hon thuso miho (NNN) heng'a chun state govt gelkhohna achanlou u lungnopmona aphong uvin ahi. Hetding chu Manipur a dia lengthei lhoumi tam chenna pen hi Bunglon lhang ho ahiuvin amaho khutsoh hi ahoipen jong ahi.
MPFC in lungnop louna thuphon ne
CCPur, Lhajing. 27: Manipur a Pineapple Festival nikho nitni a Horticulture & Soil Conservation Department a kon'a thalheng ding koima ahunglou jeh uchun Manipur Pineapple Festival Committee (MPFC) hon nopmo asah nau thuphon ahin nei uvin ahi. Amaho hunglhah lou jeh hin loulhou miho kinepna chu adaisah in ahi. ningkum a jong hitia um ahiuvin avel'a hiche umchan abol nauva kon'a gamsung khantou hikha dingham tia lunggel aneikhah u ahile vang akithah kholchen ngai uvinte atiuvin ahi. Hitobang nikho kiman nahoa thalheng kisan asol lou uhin avetsah chu ahile mivaicha le migenthei loubol miho nahsah moa akoinau ahin insunga mipa khat in achate lolhinna apachat pehlou tobang khat ahi tinjong asei uve.
Hiche thilsoh le umchan toh kilhon'a jing nikho nisim 28 niteng lunglhai louna vetsah najal'a black badge kibeh chehding in kilolna anei tauvin ahi.
Sadar Hills Chiefs Association Chairman ahi tia kiso hilchetna
Imphal, Lhajing 27 : Lhajing nisim 27, 2010 nikho Gosem thuso front page a kiso "Sadar Hills Chief Association Chairman' kiti designation chu SAHILCA in hetpehna akineipoi. Hitobang'a aumlou Sadar Hills Chief Association 'Chairman' min'a kisuohi, Association minsetna ahijeh-in, nungteng bolkit loudingin hetsahna akineije tin Sadar Hills Chiefs Association Manipur, General Secretary Kaikhomang Khongsai) in hilchetna
aneiyin ahi.
