khat akon state khat che nadin hin nikho lhomcha bou akisulut tan ahi. Ahin khantou dung juiyin toset to jeh a athi-amang jong aum jing in ahi.
Tun eiho India gam sung ah jong toset toh jatchom chom um jong leh tukum sung'a train toset ana um ho aban ban in veuhite.
Tolbol 2, 2010 ni chun Uttar Pradesh state a mei akai jeh in train tosetna thum ana um in ahi. Amasapen in Lucknow khopi akon 270 kms a gamla Etawah town kom ah Lichchavi Express in station a kinga Magadh Express chu aphut khum in, train driver khat panna in mi 10 akitongkha inahi.
Chutobang machun Lucknow akon 100 kms a gamla Kanpur mun'a Panky railway station ah Gorakhdham Express leh Prayagraj Express chu akitat to lhon in, mi 5 athi in chuleh adang mi 40 val akitongkha un ahi. Athum channa chu Allahabad akon 61 kms a gamla Pratapgarh mun'a Sarayu Express in koima venbitna lou railway crossing a tractor trolley atat in, akitongkha aumlou vang'in train engine chu ase soh hel'in ahi.
Tolbol 3, 2010 nin Murkongselek leh Rangiya channa lhai Arunachal Pradesh Express chu Helem leh Nij Bogaon kikah Assam mun'a acham in alhai khel in (derail) vangphat umtah in koima akitongkha ana umpoi.
Tolbol 16, 2010 nikho in Uttar Pradesh state ah mei akai jeh in Kalindi Express leh Shram Shakti Express akitat to in mi 3 athi in chuleh mi 12 val akitongkha inahi. Hiche tosetna hi Agra apat 25 km a gamla Tundla kom ahi. Train driver pan signal kipe chu mei akai jeh-a amulou phat a train chu aphut khum ahi.
Tolbol 17, 2010 nichun Barabanki district Uttar Pradesh state a koima venbitna lou railway crossing a train lhai khat incar ata khah jeh in mi 2 ana thi in chuleh adang mi 4 akitongkha un ahi.
Hiche tosetna hi Haidergarh police station hopsung Barha railway crossing ah Lucknow apat Sul- tanpur chan lhai Harihar Nath Express chun car ana ta khah ahi. Apet tah in car a tou mi 2 chu athi in chuleh akitongkha mi 4 hochu Lucknow khopia Trauma Centre a akijen uvin ahi. Tosetna aum jou pung kal 2 sung chun hiche lampi a train lhai ho ana suboi in ahi.
Tolbol 22, 2010 chun Uttar Pradesh state sung ma ma a thilpo train khat acham in alhai khel'in, koima akitongkha aum lou vangin phat sot tah hiche lampi ah train lhai asuboi inahi. Hiche tosetna hi Azamgarh kom Sathiyaon station munna ana sohdoh ahi. Hiche tosetna achun train bogey 3 ase in chuleh train tam lhaina Varanasi-Azamgarh-Gorakhpur traffic phat sot tah ating'in ahi.
Lhaphul 8, 2010 nin Visakhapatnam apat Secunderabad chan lhai 2727 Godavari Express chu ama engine leh coaches ho akikhen in hinla driver pan aphat cha ahetdoh jeh in athi-amang koima ana umpoi. Driver pan railway station ah thu apeson in engine leh coach chu avelíin ajopmat kit un ahi. Hiche kumchu Secunderabad railway station kom ahi. Lhaphul 25, 2010 nikho chun Delhi apat Guwahati chan lhai Rajdhani Express train chu Bihar state sung Naugachia mun ah acham'in alhai khel kit in, koima athi aum lou vangin mi 11 akitongkha unahi.
Train aha lhai pet tah a bomb agin jeh a driver pan emergency brakes amat jeh a train chu lhai khel lo ahi. Coaches ho track pamma alenlhah lou jkeh in koima athi vang aumoi. Akitongkha ho chu amunía medical officials hon ajen un ahi. Hiche tosetna jeh chun Delhi-Guwahati traffic aboi in ahi. Tatanagar-Chapra Express pan nan passenger train 5 cancelled abol'un chuleh train 3 chu lampi chom ah asol tauve. Hiche train hochu Awadh-Assam Express, Mahananda Express chuleh Barner-guwahati Express ahiuve. Toset toh train ah passenger mi 986 ho po dingin atum beh in 17-coach train khat asol unahi.
Lhaphul 28, 2010 ni chun West Bengal stae a Naxal galguh bol hon train lampi bomb a akapset jeh un Gyaneshwari Express chu alhai khel in alhom pen in mi 170 ana thi in ahi. Toset ato chung chonna thilpo train khat in aphut khum kit in ahi.
Lhadou 4, 2010 nikho chun Coimbatore kom Idigarai mun ah koima venbitna lou railway crossing a CoimbatoreMettupalayam special train in Mini Bus atat kha in apet tah in mi 5 ana thi inahi.
Lhadou 18, 2010 nin Vasco da Gama apat Howrah chan lhai 8084 Amaravati Express chun Karnataka state Koppal mun'ah lampi sem engine (road-roller) khat koima venbitna lou railway crossing a atat kha in ahileh alhai khel lo in ahi. Hiche toset na ahin alhom pen in mi 27 akitongkha in amaho lah a mi 2 chu akhohse deh in ahi.
Achaina in Lhamul 19, 2010 chun West Bengal state sung Sainthia munah Uttarbanga Express leh Vananchal Express akitat to lhon in mi 56 anathi in chuleh adang mi 80 val akitongkha unahi.
