uvin ahi. Hiche kin achun chief minister O. Ibobi Singh leh youth & sport affairs (YAS) minister, N. Biren chu Jin-gun leh presidentahilhon'in ahi.
K.S Banshal in ahoulim na ah Baton in India gam hunglhun nading in nikho 240 lut in 1.90 lakhs kms a sao chuleh nam (nation) 15 ahung khokhal in ahi ati. Jin-gun a pang Manipur Chief Minister O.Ibobi in aseina ah tuni nikho hi Manipur state a dinga hetjing ding nikho ahi ati. Chuleh aman aseibe na ah England lengnu (Queen) in QBR team hohi ama Leng Inpi munía patsa leiset chung hopthum lah a hopkhat ahin khokhal jouva igamsung'u, Manipur hung lhung ahi ati. Hiche Baton chu chief minister in hondohna aneijouvin state sunga sports gold medal musa hon anung ajui uvin ahi.
YAS minister, N. Biren in Baton chu chief minister pa ape-in aban in Manipur a gold medal mu masapen leh national hockey player anahi Nila Kamal khut ah apeson kit in ahi. Baton in Manipur gamsung munthupi ho achot jouvin nilhah lam in Khuman Lampak main stadium mun ah cultural programme leh QBR ho khut ah pehdohna kin amang uvin ahi.
Assembly sunga thudoh leh donbut naho
Imphal, Lhamul 27: Dr. Kh. Ratankumar, MLA in Leisemni a assembly session question hour sunga Mayang Imphal PHC a doctor akivatna chung changa athudoh donbutna in Ph. Parijat, health minister pa hin state sorkar noija doctor hohi state sunga hoitah a damtheina langto kisaihi avettup theina diuva cadres of Manipur Health Services (MHS) kitidiu ahitai atin ahi. Health Minister Parijat in aseibena ah tuhin doctor ho transfer leh posting langa hin akisuhlou themkhat aumme chuleh state employee ho dinga MGEL akiphudohjeh hin doctor hon transfer leh posting tengleh hahsatna atohjiuvin ahi. Ahahsatnao suhlhapna dingin state sorkar hin MCS leh MPS ho MGEL noija aumlou bang uva doctor hohi MHS cadres noija ki-umsah ding ahi, tin aseije. Parijat jonghin Mayang Imphal PHC puma state sunga PHC tampi dinga hi NHRM noija 24x7 Target Programme implement kibolding ahi, tin aseije.
MLA, E. Suraj in athudoh adonbutna ah health minis-ter pahin Brahmapur Sangaipat PHC hi kichai vahding ahitai chuleh hichi PHC a dinghin ANMs mi 4 appoint akiboltai, atin ahi.I. Hemochandra, MLA in state sunga tourist centre themkhat semhoina ding thua athudoh donbutna in tourism minister T.N. Haokipín achesa kum 2 sungchun tourism department in tourist destination leh tourist circuits asem hoijin ahi. 2008-09 sungchun Jiribam ah integrated tourist destination akisem hoijin chuleh Imphal-Bishnupur-Churachandpur circuit, Imphal-Thoubal-PallelTengnoupal-Moreh circuit leh Imphal-Mahadev-Finch Corner-Hundung-Jessami circuit munhon tourist circuit akisem hoije, tin aseije.
T.N. Haokip jonghin 2009-10 sunghin tourist destination 6 ñ Lamdan munna Adventure Complex, Heirok munna Ishingthingbi Lake, Heingang munna Marjing Polo Club, Khongjom munna Khongjom War Memorial, Tupul munna integrated tourist destination leh Sipuikon munna tourist destination hi akisem hoije, atin ahi. Achung chon in state tourism department hin Kaina leh Moirang INA Complex semhoina dingin mega project chohding angaiton ahi. Hichi tourist destination leh circuit ho dinga detailed project reports (DPRs) hi tourism department a commissioner, director, engineers, architects hon lungel lhahna anei dungjuija kisem ahi ati.
Th. Shyamkumar, MLA in aniseh a electric kingaicha leh sorkar in supply aboldan thu a athudoh donbutna in power minister pan nisehleh electric akiha ngaichat pettah lehin 170 megawatt aphan akiha ngaichatlou komleh 100 megawatt ahi. Ahinlah, aniseh a mei akingaichat pettahleh 80 megawatt bou supply akibol jouvin chuleh akihangaichat loukomleh 45 megawatt bou supply akibol jouve, tin adonbutne. Shyamkumar, MLA in thudoh dangkhat anei donbutna in power minister pahin state sungahin electric kilah a register kibolhi mi 1,89,890 alhingin, Loktak Project'n 27 megawatt power asosahjou lah a hin 30% hi state share ahi, atin ahi.
N. Mangi, MLA in Leimakhong Heavy Fuel Power Project semna dinga sum ijat lutnem chuleh tu a meivah semdohna dinga adinmun ipiham tia athudoh chu adonbutna in power minister Phungzathang in Leimakhonga project kisemna a hin dangka 125.38 crores alutnin tua hin stand by power generator inbou apangin state in power angaichat hi pejou ponte, ati e. Leimakhong project hi alolhingpoi ti vetsahna dingin Mangi, MLA pahin Leimakhong Heavy Fuel Power Project hi President APJ Abdul Kalam'n 2002 kum'a chu 'Keipi imu' tia anathenso vangin imacha abolkoh joupoi tia ademleh Phungzathang in hichi project hi aphachom louva ahipoi, HSLC, HSSLC exam lai chuleh FIFA world cup laijeng jongchun state sunga power supply hi backup abolle tin ahil chenne. Dr. H. Borajao'n Manipur sunga scheduled caste kho ijat um em tia adohchu adonbutnan TD minister DD Thaisii in Manipur sunga scheduled caste khohi dan in ahetpeh aumpon, 2001 census dungjuijin schedule caste mi 6,00,037 Manipur'n achengin alhangpi a achennaho uchu Andro, Phayeng, Kakching, Sekmai, Kwata leh Leimaram ahi atin adonbutne.
Dr. I. Ibohanbi, MLA in river policy chunga athudohna donbutna in forests and environment minister Th. Debendra hin state sungah river policy aumpoi atin ahi. Ng. Bijoy, MLA in Nongmaiching muol chung thu a athudoh donbutnan revenue minister Debendra in Nongmaiching molhi phaicham sunga um ahin molsang dang hotoh kimat ahi. MLR leh LR Act, 1960 Section 2 (j) dungjuija Manipur chief commissioner pan order no. 181/2/61-M nikho 15-01-1962 a asei dannin Nongmaiching hi vaihop anoptheina dingin Sadar hills sub-division noijah akoije, atin ahi. Zero hour achun Salam Joy, MLA pahin Inpi a thudoh kinei hohi lunglhai aumpoi hijeh chun Inpi hin hichihi asuhdih angaije atin ahi.
MACR hon Compulsory Education Act, 2009 noiya ngehna nei u
Imphal, Lhamul 27: Manipur Alliance for Child Rights (MACR) makaina noiyin Leisemni nisim 26 nichun Imphal hotel ah seminar chai ana hitai. Hiche seminar hin atup leh adoi chu ahile, iti-le Manipur gamsunga hi free and compulsory education hi mijousen amu thei dingham ti ahi. Children's Right to free and Compulsory Education Act, 2009 hi Manipur sorkar injong anit patding ahi tah jeh in simlai chapang kum 14 apat anoilam jousen, education hi free amudiu ahi tai.
Hiche seminar ahin, milham lom phasahbep leh education lamía miching mithem hon houlimna giltah in anabol uvin ahi. Manipur sunga district chom chom-a kona tunai chaía ana kiphutdoh Village Education Committees (VECs) member phasah honjong hiche kina ana kimang chauvin ahi. Hiche seminar a aki lolnau khatchu ahi leh, Manipur sorkar in agan nathei chan na hiche Act hi nitsah ding ti ahi. Hiche to kilhonin Consultative Committee khatjong phudoh pai pai ahi. Hiche Committee in angeh chu ahile, State sorkar ingangtah a State Commission for Protection of Child Rights khat aphudoh dingjong adeisah un ahi. Hice commission hi independent body hiding ahi.
Hiche Commission hin Manipur sunga Free education acheding bang tah-a chelhah theina dia monitor (avetlhah) ding ahi. Manipur sorkar hin hiche Act hi nitding tia aphon doh vangin, hiche toh-gon molso nadingin bolding tamtah aum nalaiyin ahi. Hiche Act hi Lhatun, 2010 apatsa nit panding ahi vangin, tu-letua hi hiche Act noiya State Rules jong drafting chai ahinaipon ahi, MARC in apohnat na thujong phondohna ana neiyin ahi.
Adehin, chapang hasatna tamtah neiho , chapang HIV/AIDS natna vei, Conflict Orphans, Displaced Children, chuleh achom chomho jong hiche draft in asuhmil louding tinjong drafting committee ho koma ngehna le tepna jong ana bol pai pai uvin ahi. Local authorities - Panchayat leh Municipal Councils honjong free education mission alolhin na teidia pan alah diuvin jong nehna ana neiuvin ahi.
MPTC hin Manipur boinahi Parliament’a pohlut teiding gong’u
Imphal, Lhamul 27: Manipur Pradesh Trinamool Congress hohin Manipur gam'a thilsoh hohi tulaitah a achelha jing Parliament Session a pohdoh teiding agouve. Thuso miho komía Leisemni a aseinaovah M. Tombi, state party unit a working president leh general secretary Lien Gangte lamkaina noija mi phabep khat New Delhi a cheova Manipur gam'a thil umdan kisuhloujeh a mipite genthei nahi Union minister Mamata Banerjee kom agalhutdiu ahi.
Masanga chief minister anahi chuleh Trinamool Congress lamkai R K Dorendro in thuso miho kom'a aseina achun Ma-nipur miten genthei hahsat ato naohi Parliament Session a Mamata Banerjee in apohlut theina dinga Delhi a kikhop khomna akineiteng akup-akaija houlimna kineipi ding ahi. Armed Forces Special Powers Act (AFSPA) repeal bolding, thil ngaichat ho kimu joulou leh thilman kal, national highway venbit dingthu chuleh law and order kisuhlou nahohi Central a party lamkai hotoh kisei khomding ahi, tin aseije.
Manipur mi lakh 27 oginhi Parliament'a phondoh angaijin chuleh mipi ten genthei hahsat atonaohi gangtah a suhlhap angaije, galguh bolhohi athanei behseh jeh un law and order aboitan, sumto kilhet dinga mi kiman, chapang thing noija kipansah chuleh mi gihna kinei hohi phat sottah geija dinga asuhlhap nathei holdoh ding angaije, tin Dorendro in aseije.
Dorendro in aseibena ah, Galguh bolho kihou chamna dokhang phunga hinpuilut dinghi sorkar mopohna ahi. National media hon Manipur mite gentheina coverage apeh uhi seikhamjong ahipoi. Trinamool Congress party hin national newspaper holeh National Press Council of India hi akimupi a Manipur umdan thuhi thuhtah a atahlang tei-tei ding ahi, tin aseije.
COPTAM in lunglhai louna vetsahnan
Imphal, Lhamul 27: Committee on Protection of Tribal Areas, Manipur (COPTAM) tia kiminvo kiloi khomna khat census thua kilamdoh hochun Manipur Chief Minister Pu O. Ibobi kom'a memorandum pehlutna ana nei uvin ahi. Hiche memorandum in angeh chu ahile tu-letua chelhajing census thua thukhoh tamtah adehin phaicham leh thinglhanggam ki- choh chavai tobanga aumhi sorkarin adihtah a achepiding angeh u ahi. Hicheho laha agihdom hochu ahileh : Census hin ipidia district boundary hohi phatecha ahet/ajui lou ham? Ipi dia thinglhang gam(Hills) ho land records hohi Valley district noiya kikoi ham? Ibol'a hitia thangdeh duh a census kibol ham tihi thinlhang mitennikhat bandh koudi akihe themthei poi? Ibol'a Director of Census Operation in juiding tia aseiho kinit lou ham? Director of Census Operation in kho jouse hopdia Census Village Code leh Enumerator Block Number asemhohi khatcha cha jui ahilou hi COPTAM in apohnatna thujong alhutin ahi.
Kho jousen mihetna(census) a hi adihtah a mihemjat asut diuvin jong tepna ana bolin ahi. Census kin a hi Enumerating Official dingin akhomi /agammi bou pangthei ding ahi tinjong pansahna aneijin ahi. Hijeh hin akhomi hon abollou nau kho a census anakila ho kisimthei louding ahi tinjong asei uve. Chuleh hiche census a hi district boundaries (gamgi) phatecha jui ahilou laisea thinglhang mihon census hi kipompeh louding ahi atiuve.
Census bolna dingin District gamgi hohi originally administered villages' boundary basis bouva sorkarin abol dingin tepna jong abol pai uvin ahi. Chuleh thinglhang gamía land record valley district a kikoi jouse hi Hill district hon ama ma district record avetsui diuvin jong ngehna COPTAM in aneijin ahi. Sorkar in chop dehduh a census abol hi thinglhang miten aphatsah pouve ti vetsahna dingin COPTAM makaina noiya ni-khat (1 day) Hill Districts Total Bandh Lhamul nisim 29 ( 6:00 c.m apat 06:0 c.n gei) nileh nit hiding ahi tinjong COPTAM lamkai hon seiphongna ana neiuvin ahi.
Driver leh Grade IV natohna ding kihol
Imphal, Lhamul 27 : Manipur Employment exchange mopohna noiya Driver leh Grade IV natohna dinga Written test chu Lhajing (August) 22 nidan 09:00 leh 10:00 kikah a Examination umding ahi. Hiche Examination a Written test hi Board of Secondary Education (BOSEM) makaina noiya hiding ahin, examination a hi General Knowledge leh General English hiding chule mark agomía 50 hiding ahi. Manipur Employ-ment Exchanges mopohna noiya card lhaho bou examination a touthei diu ahi.
Chule hiche nadinga Forms man hi dangka 200/- hiding amavang original employment exchange card nei angaiye. Form hi Passport size lim (photograph) 2 leh employment exchange card photocopy toh ahunglhung ding Lhajing 2 apatsa 7 (11:00 - 14 : 00) sunga pehlut thei ahin, examination admit card vang Lhajing 9 le kilah thei hiding ahi.
UCM in avel’a NH-39 jotlouding thu phong
Imphal, Lhamul 27 : United Committee Manipur (UCM) in Transporters, Drivers leh Businessmen ho kom chun NH-39 a venbitna phatah aum tokah a koima aguh a che umlou din gihna anei uvin ahi.
UCM hon aseina ah Lhadou nisim 29 nia kihou lhah dung juiya transporters hon phatah a ajuiding chuleh non-local busi- nessmen hon jong aguh a NH-39 ajot lou diuvin hetsahna apeuvin ahi. Chuban ah UCM hon aseibe na ah koitobang in kilolna juilouva boina toh aumleh ama changin mo akipoh ding ahi ati.
MSCW hon Kaushik demna nei u
Imphal, Lhajing 27 : Manipur State Commission for Women (MSCW) in India Hockey Head Coach M.K. Kaushik, in National hockey player Th. Ranjita Devi, Manipur chunga jum mona thucheng aseijeh in demna anei uvin ahi. M.K. Kaushik hin amanu seh hilouvin akichem adangho chunga jong jum mona thu asei jeh hin international matches a kichem dinga lom ho ana kichem ji pouvin ahi. Committee in mopohna neiho kom'a M.K. Kaushik chung chang hi high-level inquiry committee apeh doh nading uvin ngehna aneijuve tin thulhut akimui.
