Hiche tohgon hin Gamsung'a lamlen NH 53 leh Thihjolía kitolna (rail line) asuh khah ding jeh in, Jiri leh Tupul kikah a lamlen leh kitolna thihjol hohi themkhat heitoh ngaiding ahi tinjong asei in ahi.
Thudoh banjom adonbut na ah aman, hiche tohgon tohpat nading in MoU, tichu kihoutohna kituptah Manipur thunei-vaihom ho, NHPC chuleh SJV Ltd kiti India Bulpi thunei-vaihomho noiya company ho kikah ah lhatun nisim 28 chun jihdohtho in kinoptona ana kineitai atin ahi. Akinopto thumho loihin na ahin tohkhom uva hiche tohgon len hi chelhahpi ding ahi jong atin ahi. Tipaimukh Tuitin (Dam) kisemhin kolphemeivah 1500mw changei ahinpeh ding ahin, huleh sum hi Dangka 81387900000 tobang lutding ahi atin ahi. Hiche sumhi Manipur in 100 lah'a cheng 5 apohdoh ding, NHPC in 100 lah'a cheng 69 apohdohding chuleh SJV Ltd. hohin 100 lah'a 26 apohdoh diu ahi atin ahi.
Tui kiting hi feet 550 val a hung veitou ding ahijeh in lamlen Km. 3 le 4 kikah tobang ahinchup din aum
in, lei kidosa neochacha 7/8 tobang jong achupmang din aum'e tinjong aphong in ahi.
Hiche lampi asuhkhah ho heidoh nading keuseh a hi sum 150000000 tobang beiding ahi tinjong asei in,
chuleh hiche a kithopina din bulpi lamlen semho, Ministry of Surface Transport, heng ah alutding jat ahinpohdoh nadiuvin ngehna akipetai jong atin ahi. Kitolna thihjol hi akiheitoh tan, amasa a sangin km 14 vel in
achomjojep in ahi tinjong asei in, chuleh lamlen NH 53 tuitin in asuhkhah dinghohi bulpi vaihom na'a lamlen semhon asemphat nading apetapouvin, hinlah tunai'a lamlen poimotah ahungso tahjeh in sumlepai tampi lut in akisemphai tinjong hetsah thuphon anei in ahi.
thudoh dang ho adonbut na ah imphal khopi sung'a nen paiding dan jong akisutup tai atin, chuleh lamdeng, imphal lhumlamkai a nen suhmangna kigong chu amun akisuhtup theilou jeh a vaigei jep anahin, tua amun
phatea akilahdoh joujou leh agangthei pen a kipan vahthei ding a natoh kipan ding ahitai jong atin ahi.
Changangei muna AR hon natohpha nei u
Jilkung kilah lutna thua boina umjing
Imphal, Lhamul. 12: Sempatni nikho chun "All Manipur DPC Faced Candidates' Association for Primary Teachers 2006" tia kiloi khomna neihon tuchung Jilkungho kilah nadinga boina umchu CBI ho khut noiya kholchil ahi nading in temna anei uvin ahi.
DPC faced candidate hon Manipur Governor henga memorandum alhut nauvachun Director of Education (S) pahi anatoh namun a konna haisah ahi nadingin temna jong anei uvin ahi. Ama pahin official document thuguh tah chu athethang a dan dihlou tah khat aboldoh ahin official Secrecy Act noiya gotna pehthei mong ahi tinjong asei uvin ahi.
Amahon aseibe nauva chun Board of Secondary Education Manipur (BSEM) hon Primary Jilkung dinga
candidate 1,350 lhenchilna anei nauva chun written test abol un hiche dungjuiya chu Lhatun nisim 16, 2007 nikhoa candidate 5000 alhendoh u ahi. Chujouvin Bulte nisim 6 nikho kipatsan Lhajing lha geiyin Viva voce ana bol uvin ahi. Ahile phat hichan kum 3 valjen kisulutna M. Harekhrishna Singh, Director School Education
pa soikai na noiya candidate 1, 413 kihung moh tahlang hi datmah um kasauve tinjong asei uvin ahi.
Chukitleh government service rules and regulations noiya Scheduled Tribe (ST), Scheduled Caste (SC), other
backward class (OBC) chule physically challenged candidate tia lhehdohna umlou hella thuso a sodinga
kimoh pehdoh jonghi dandih lou helkhat ahi tinjong asei beuve. Director of Education (S) in ipi thua "so called recommended" tia minho chu ahin peh ham tinjong alung donnau asei lhauve. Hiti ahijeh chun hiche thu a hi CBI ho kholchil sah ding ahi tin Governor pa heng ah thumna anei uvin ahi. Alangkhat na DPC faced candidate hon ahung lhungding Lhamul nisim 18 nikho tengle DM College Imphal canteen muna maban dinmun seilhah nah umding ahi tinjong thuphon anei uvin ahi.
Iniesta’n agoal khum Dani Jarque geldoh nah’a nei
Dani Jarque hi masanga Espanyol player khat anahin ningkum 2009 a Italy gam'a kichep nadinga akithepchuh laitah uva chu kiseplhu a anathi ahi. Amapahi lha 1 (1 Month) jouva Spain Captain hina apohsah jouva thi anahin kum 26 ahibep in ahi. Iniesta le Jarque hi Spain thalheng a under-17, under-19, under-20 le under-21 kichep nah'a ana pangkhom peh ahilhon e. Iniesta in man of the match award aga kisan chun Dani hi kaponom e tin aseiye. Kasangkhol kasutlhah a Yellow card kamu vangchun naa kasapoi, kaloipa dinga kabol thei chasun kabol khoh kasapoi tinjong aseiye.
Iniesta in goal akhumchu akiletsah chompi pon ahi, thuso lakhom hon deichom'a kimu piding atiuchun ana nompon ahi. Hinla akichep khompi hon nang bolhoi najalía kijou ahi atiuvin chubanna Gerard Pique, Carles Puyol le Cesc Fabregas in thuso miho kimupi din asol tho jeng uve. Interview abol uchun Iniesta invang kitho khom najal a kijou ahibouve, keima changin kapohdoh aumpoi ati thou thouvin ahi. Hinla aloi hon vang galjona chu Iniesta chung'a aphong leuve. Alangkhatna Cesc Fabregas in Iniesta aphatcha apeh doh jal'a ajo thei jeh un ama jong hi Arsenal Club akon'a Barcelona Club adinga kot lentah ahonpeh tauve. Barcelona ten 35 million euros apeh ngap u ahi.
Demand for Grant Bill noiya dangka 1087.41 crore kiphatsah
Imphal, Lhamul 12: Manipur Assembly Monsoon session ache lhah tohlhonin, Sempatni nisim 12 nichun Assembly in Bill phasahpi ana chelhah pitan ahi. Financial kum 2010-11 adingin tuni chun Demands for Grants 2010-11 passed ahi tai. Hiche noiya kimanchah nadinga Grant nga (5) kigomin, dangka Rs. 1087, 41,60,000 Assembly in aphatsah ahi tai. Hiche grant noiya dangka phasahpi namdet ana hijeng vangin, tuni Assembly achun opposition party lama konin koimacha ana pang pouve ti jong thulhut akimun ahi.
Demand of Grant kum 2010-11 noiya grant kihop doh danchu ahile State Legislature kimanchah nadia dangka Rs. 20,56,35,000/-, Council of Minister hodia dangka Rs. 2,85,50,000/-, Secretariat adia dangka Rs. 3, 58, 64,000, Election nadinga/ Election Commission adia dangka Rs. Rs. 4,06,72,000/- chuleh Demand No.30 noiya dangka Rs. 997,34,60,000 ahi. General Economics Services le Planning teni hi demand No.30 in ahop ahi. Hiche teni noiya kimanchah nading kikoi tum hin, financial kum March 31st, 2011 chan geiya anatoh nadiu a akimanchah najouseu ahop ding ahi. Tunia Assembly business chu imacha boilou helin ana che lhan ahi. Ajeh khat chu ahileh, Demand for Grants bill chung thua houlimna ah Opposition Bench, adehin BJP MLA ho khatcha apang pouvin ahi. Demand for Grant Bill hi alhang pia kinopto dingdan chu ahile amasapen a Ruling Bench hon Bill hi House a atosot jiu ahi. Bill House masanga tundoh ahi jou tengle House in Bill thua houlimna( kinelna) anei jin chujoule voting process kipan ahi. Hinlah, tuni chun, opposition bench langa kona imacha nelna leh phatmoshna dinga ana umlou jehin, Bill chu phatsah anahi tan ahi.
Demand for Grant Bill chung thua opposition Bench ho houlimna pan alah lou uhi, Parliamentary Democracy
adia thilpha behseh ahi poi. Hiche Bill hi House a tundoh ahi chun Opposition Bench a kon in mi phasah bep jong House a aum un ahi. Nationalist Congress Party(NCP) MLA Pu Radhbinod Koijam leh Doukhomang Haokip jong House a aum lhon vang uvin, hiche Bill thua Houlimna/ Seikhomna a apang lhon pon ahi. Pu Radhbinod Koijam hi tulehtua Manipur State Assembly a Opposition Leader hina chanvou alo ahi. Amani bana, BJP akona anakino doh MLA Pu I. Ibohalbi of MPP leh Dr Ng. Bijoy teni jong House a aum lhon in ahi. BJP ho vang hiche kin a hi imacha ana kikum pouvin ahi. BJP hohin, Monsoon session/sitting ahi question hour ti tai louva House a jaulou ding kigosa peh ahiuve.
