Rev. N. Lhungdim
(Member Kuki Senior Citizens Welfare Forum’ Manipur India.)

Kuki te hi Namlhing tah North East India sunga minthangpen ihiu ahin, Gam le Leiset atum a Government lhekhen mun ineilou jeh un Nampi Lamkai honng gel jing naovinte ahin Christian dinmun hi khonung le kilinglao thei ahi louna dinga Houbung lhacha ho ahin Mipi jouse ihiuvin SADAR HILLS beh ahung lolhin theina ding Pathen henga tao angaiye. UNC-hon gihna anei jeh un Manipur CM in Sadar Hills aphongdoh ngampon, Tua situation hi ahung chejompeh le Sadars Hills sunga cheng jouse jongo hi ama ho kigel a Senapati District sung ahi jeh a eikihoptha tei ding u ahi. Chenna gena mun akitup lou teng Christian hinkho jong lamvai thei ahi jeh a Christian Lamkai khat hina a ka hin jih ahi. UCM-ho Imphal sunga akitom tomvang uva India Lamkaiho le
Naga Lamkaiho hi giltah a thumop kinei ahi ding u tahsan lal ahi tapoi ajeh chu Th.Muivah Somdal chena dinga Chopper-2 jen a gonpeh thei u le asung Naga ho akichat jing ahi vanga tua Naga MLA jousen adalhah thei le amaho lung ahol le akhol jong ama dinga Manthahna hung hi ding ahithei ding banga hung kilang ahi.

Gam Leiset le Christian hinkho hi kilhon jing ding ahi jeh a State atum anei ho chu kichat le tijat um ding ahitapon eiho Kuki ho hi atum a UT/State inei doh masang uva Christian hinkho jong seithei lou hi
jing ding ahi. Manipur sunga adeh set a SADAR HILLS DISTRICT beh hi atum a eiho thaneina lhing
um thei le kinep le lungmon um ding ahin Nampi Lamkai, MP, MLA ho leh Kuki Inpi hon gel giljep
angai tai.

Gujarat le Orissa mun lah a Christian suhgenthei a aumthei ho banga eiho jong phat chom khat jou teng le Hindu State sunga cheng ihi jeh uva HAO HATLO-kiti hi hung kijamat chat thei ahi jing e. India sunga Hindu kicheh tah ho bon khu pha jo ding ahin Manipur Hindu ho hi atumtal Hindu ahiuvin- ama ho
toh ichenkhom jing ding u ahin Gambih- Dist beh a kikhindoh vah angaiye.

Naga-te vang State nei ahi tah jeh un free-zone ahi thei uve, ipi thilse bol jong leu ama ho dinga chu kichat na ding aum tapon, kisonpi thei Gamtum anei u ahi tai. Hiche banga Sopi Khasi ho jong chute
ma ahiuvin chule Mizo ho jong chutima ahi cheh uve.

Kuki ho hi Pathen sem Nam/tribe khat ihiu ahin State atum’a inei doh thei lou u hi thilkhoh ahi. Tupet tah a sei dinga chu State chu gamlha jep abang in District-Sadar Hills beh hi um doh thei le kinep le lungmon um dinga kigel ahi. Christian hinkho hi kitup tah le lungmong tah a um doh thei na dinga GAM LEISET dinmun kitup angaiye. Pathen in Nampi Lamkai ho ahin dinpi a Kukite dinga Thuboi hin eiho dinga thilpha khat ahin jam doh thei na dinga itao ding u ahi. Koi Houbung tichom um louva Kuki Nampi a dinga Christian

banjom nalai ding………….