Houbung chuleh mimal a dinga phalou ding ham, tia kalunggel ho kaseiya dohna kanei thu bou ahin, koima amichang min (personal name) or kiloikhomna (Organisation name) min, katipoi. Demjong kadempoi. Iti dan'a Ponlah/gamlah a Ngalchang kisudoh pi banga, Dt. 16-7-2010 nia Gosem thuso a chubangse hungsoh nahim? Kineppi kisonpi khat a nakineiya, open letter le personal letter, nahet toh theilou chu kidang kasai.
Nei hin lekha thot golmasapen a 'Nathi kon lam ahitai' neihin tichu dihmai theiyinte. Nahin thu lelhah dan kagel leh kei hin nikho tep le gongtoh lah a chu Cabinet member khat hin nate tin kagel-e. Hitia hinkho ichan ahiding akihet lou jeh a ba, nangho tobang ahingsot nalai dingho gelkhohna a aphachom lou dinga kisalel hihun, kahinti ba hi chu-o-Evan. Dr. Pu Victory Cross leh atun nading mun thudol a kasei dan chu ahileh, Kukiten gal ijonau le ilelnau thusim kahepoi aumpoi kati ahi. Lhagao lam dol'a chonset thina gal vang Jesu Christan eijopih tauve, kati ahi. Atun nading mun min chutoh Moreh vel a 'MORIAH lhang theng' aumpoi kati ahi. Abraham banga Pathen in na houlimpi a asei ahi jongleh, Moreh hopsunga Mol khat pen a chun tung jengin, Hebrew pao, Greek pao, Latin pao ho man a i-gam min i-lhang min michom pao a khel khoh angaipoi kati ahi.
Maicham sem a taona thudol chu, hoilai mun hileh Anvaa taona, An ngol-a taona, molchunga taona, Komdam'a taona, chang taona, hon a taona, maicham jat jat sema taona khat cha kadempoi. Hiche mun, khuche mun'a tao teiding tao louding tin koima kanopon koujong ka koudeh poi. Mi ama deina mun le phat a kimang cha bou ahi. Korea te bol na thonom ahileh, amaho gam a gacheng jengin, Kukite chenna gam sunga, mol min lhang min midang pao'a khel khoh angaipoi kati ahibouve.
John 4:21b na-ah, Jesu'n Samaria numeinu jah a 'Pa chu hiche (Gerizim) mol jong hilou, Jerusalem jong hilou, nahou thei na diu phat ahung lhunge' ati. Hoilai mun tao mona, houmona aum poi. Moriah lhang or Gerizim mol or Jerusalem seh hilou muntin a Pathen hou thei ahidol Pakai Jesu'n kichen tahin asei tai. Cross asang anem tun le tun lou thu jong asei tha poi, oleba kahet khel khat hai, Evan. Dr. Pu. Hijeh chun kei le nangin hilai mun khulai mun iti khel khel jong ngai kasa poi.
Christian Church din mun chu Bible a Houbung khat bou ahiti chu kichepi ahin, Christa in along'a aphudoh, tahsan jouse khat ahi tia thet tum pom tum kineilou ahibouve. Hiche a tongho le KBC or ECA le adang dang a tongho, Pharisees le Sadducees nahi sah leh, nang din munla ipi ham?... Hoi lai ham... Napao namlhah kaven nakihei dan kavet leh na Standard hi asang lheh-e, ajeh chu adang dang anaum tadin tin, 'Musan vehvuh unte, vang phatna kimu veh vun unte' nahin tihohi kagel leh, na dinmun asang val in leiset mihem te sophah hoiyin kagelpon, van a Vantil te lah a khat dan in kahin ve bouve. Ahi deh in vantil lah a 'LUCIFER' loi kaina-a chu nang jong Title thupi tah na pehu hinte.
Achainan sum le pai thudol Judas Iscariod hinkhoba nahin sei leh kagel doh khat aum nget-e. Houbung lhacha natong keiho hi, din mun tohmun kicheh kahiuvin, Houbung or khoppin eipeh kham kham-u chu kipah le lunglhaisel a, kaji kacha toh ahi thei kham khama kimang cha kahiuve. Inam sung Houbung lah a tijat um khat chu Judas Iscariod banga dinmun kicheh lou sum le pai jeng velhi keoa, so le lhum, sah le lhanga vah le a Houbung khatna anop nop vatlha anung don lou, mun khat a chekit a chu tibol, Houbung or khoppi khat a kibut nomlou hita bang mi hohi (Local) houbung tinin kichih theiyin phante.
Hitobang miho hin Houbung dinga jendam hahsa natpi ahin pohlut thei ahi. Nati lou ham, Evan. Dr. Pu. Hiche banía hi sei be ding umía nagel leh kimaiton einibou kihou hitin thu (News) ho a ima seibedata te, Doctor Pu. Hichannah hin ngatange, adang kiseibeda tante. Kakipah e.
Dt. 20/07/2010
Jesu Christa soh Keima,
Ch. Doukholun Mate
Tengnoupal Village Manipur
