Dammo veisetjeh a boi, adeibang ji mujoulou jeh a boi ahilouleh ajito kitolou jeh a boi adimsetne. Khangdong ho jonghin akhopteh un boina ahao uve. Khangdongho boinahi hiti monghi hileh phante tithei ahiloujeh hin aboinao suhlhap dijong ahahsai. Aboinao khatchu a "identity" ipiham aseihah e. Khangdong jousen hichi boinahi atoh uve. Chapangla ahitapouvin, pillhing jong ahideh pouve. Khangdong aneojep laija kidotval hochu chamlhat tah a hinje abolthei pouve. Amahohi chapang ahitahlou vangun michungah akingai nalaijun ahi. Thil angaichat houchu akhut uva pehlut ding geijin angaitan, amahonla akibol thei louvu ahijeh in abang komleh anulepan amadinga lungel lhuhna aneipeh angaijin ahi.
Alang khatnah, khangdong themkhat chun gangtah a pilhing hivah dinghi anomkit uve. Pilhing kahitai ti vetsahna dingin dum achepmun janleh geitah tah in khulai aleng uve. Hijehchun, amahohin khangdongho thanopna kichep golseh leh adang dangho a hin pan alajou tapouvin, ahinkhouva avella pan ahinlah diujong tahsan aumpoi. Identity apohdoh nomjeh un angaija kibol chena lhangpi hochu adoudal jiuve. Anulepan von achohpehhou deilouvin palah thetna kivonding anommun, music angainom houjong anulepa teo nakolla thollou ngenchang ahikitne. Insung mitetoh kihavop behseh louhochu ina konnin ajammangji taovin, ahilouleh loi phaloutoh akivopmun thil phalou ngen bolnan akitet thouve. Khangdong hohi akihoisah laitah u ahin, mi amel hoile hoilou aha vetnun, hijeh chun nungah chapang amel hoibeh sehlou hochu alungam joupoi.
Khangdon laihin dongmanei ahung kipannun, cinema avet naova nungah gollhang kingai hokhu atho nommun, alhangpi a khangdong atamjohi dongmanei ahijeh hin aneilou hochu lhama akisaovin, michon chonnin chon inge tia nungah helgunset jong aumdapoi. Simlai khangdong themkhat chun dongma kaneileh kalekhasim atohkhah ding ahi ti akihet naovin hijongleh, aneilou uva aloiho nuisatna aumdiu jongchu apojoudeh pouve. Lekhasim laija dongma nei akehkhat tobang chun lekhasim toh dongmanei akopjou pouvin achaina leh anigellin lolhing joulouvin aumji taove. Khangdon laihi it-umtah khangchu ahi. Jildingle hetdbeding thil tamtah aumme. Ahin, amahohin pilhingho sangin suhlhap ding boina ahao jouvin, aboina houhi ananje ahinhet teng uleh pilhing ahung hiutoh akitoh jitai.
Mi kum 30 hojong khangdong mel aput vangun kum 21 noilam bouhi khangdong tia hin kiminvo ahin, kum 21 apat chunglam sechu sorkar dannin jong pilhing tia hetpehna anei ahi. Pilhing hohin natoh hoi munading
hin phat tampi asumangun ahi. Insunga pilhing hochun nehle chah, sille chen avettup diu, adeh in tulaihin achateu vinlah mobile phone aman tamlou choinom pontin chuleh second hand von ahnomlou khangdong dimsetnin aummin, abonnahi sumlutna ngen ahi. Pilhing hochun hahsat genthei ahung lhunteng mandinga sum ijat hamkhat jong phasademma akoi angai nalaije. Chate chunga nulepa lungimna jonghi maithu ahipoi - loipha toh kivop uva hinam, alekhasim ahetthei hinam, achonao asinsahou jousehi alung boipiuvin ahi. Gahvet dingchun khangdongho boinahi pilhingho a sanga tamjo dannin akilange. Ahin, pilhingho boinahi agihsa jon chuleh athupijon ahi. Khangdong ho boinaleh pilhingho boinahi akibangpoi. Khat boinahi khatna sanga tamjo ahi tithei ahibehseh poi.
Pilhing hohin khangdong ho boinahi thupi in agelpeh pouve. Pilhing ho mudannin khangdong ho boina chu curfew laija potdoh theilou, dongma toh kikhen, fashion thah penna kivon joulou tiho bouhi ahi. Ahinlah, khangdong ho boinahi pilhinga sangin athupimo joi tia pilhing hon agellu vanghi adihjoupoi. Aboinao chu neojongleh khangdongho dinga atokhah masatna pennu ahijeh in hahsa asah dannu chu alahje ahemo leuvun ahi. Pilhing hochun boina aneiteng uleh alhaplhahje leh kimai topi dingdan aheuvin ahi. Khangdong hovangchun boina atoteng uleh iti lhaplhah a iti kimai topi diham abolkhah louvu ahijeh in ahepouve. Alang khatna seidingin khangdong hohin pilhingho sanga boina ahaojoh u ahipon pilhingho banga alhapje ahetloujeh u ahibouve.
Hijehchun, amaho boinahi pilhing hoa sanga tamjo leh sangjo a kilangji ahi.
