Jammu, Lhamul 18 : Janhi hi chun Jammu and Kashmir Kishtwar district a Pakistan a pansa Lashkar-e-Toiba (LeT) Commander pa chu security forces hon aman uve tin police spokesman in aseiyin ahi. Intelligence akon thuguh ahet phat uva army leh police hon
operation abol uleh amatdoh u ahi. Hiche kom mun chu Jammu apat 290 kms a gamla ahi. Amat pa u chu amin Mohammad Shafi Shah alias Pathan alias Idress akiti in ahi. Ama akon in AK-56 rifle khat, magazine 3, meichang 90, radio set 1, SIM Card 3 chuleh mobile phone khat amandoh un ahi.

Amapa hi masanga south Kashmir gam pahalgam kom Ashmugam muna ana cheng’a ahi. Shah hi 1990 kum apat galguh bol lah a anapang ahin bol khel-suhkhel tampi anei ahi tin spokesman chun aseiyin ahi. Achesa ni phabep sunga din security forces hon Kishtwar muna galguh bol amat doh a li channa ahitai. Lhamul 14 ni chun Ordrain muna LeT district Commander Mohammad Issaq Bhat alias Atique chu ana that un ahi. Janhi chun Bhat kiloipi Nazzir Ahmed chu ana man kit un amapa akon’in manchah phabep leh akisel na mun ho-u hetdoh in aum in ahi.

Naxal galguh bol hon Chanda muna pamphlets hom
Chandrapur, Lhamul 18 : Masanga Naxal lamkai Cherkuri Rajkumar alias Azad thi chu naxal ho dinga it umtah khat ahin Hijeh achu Maharashtra state committee of CPI (Maoist) hon aphu kalah tei diu ahi tin gihna anei un ahi. Chandrapur muna tuni chun Naxal hon Azad ahin laiya anatoh ho leh aphu la dinga akitep nau lekha pheng ahom jal un ahi.

Hiche lekha pheng kihom akon kimu doh chu ahileh Azad hi sorkar toh kihou ding anom in hiche jeh a chu aloi dang ho toh kimuto dinga Dangkaraya muna achena a Andhra Pradesh police hon amat uva anatha u ahi akiti e. Maoist hon lamkai mi thupi tah khat akiman sah tai chuleh red revolution a dinga manthahna khat ahi. Hinla ama lunggel natoh ho kichepi jing ding ahi tin pamphlet chun aseiye. Hiche pamphlet hochu Maharashtra State Committee of CPI (maoist) in aso doh ahi.

Krishna meeting ding phat akikhel kisei peh vah lou
New Delhi, Lhamul 18 : External Affairs Minister SM Krishna masang jep a Pakistan akholjin chun Islamabad alhun phatíin hetman lou in akimupi ding ho phat akhel un ahi. Ama hin Pakistan a atoh kibah pi Shah Mahmood Qureshi toh phat kitep val set’in akihou lhon in chuleh jing an jong anekhom lhon in ahi. Ama ni chu nidan 11 am vel’a kihou pan lhon ahin pung kal 5 val jen ana kihou lhon in ahi.

Amasa thil kigong chu ahileh Krishna chun nilhah lam nidan 3.30 pm teng Pakistan Prime Minister Yousuf Raza Gilani akimupi ding chuleh 5.30 pm teng Presidential Palace muna president Asif Ali Zardari akimupi dinga phat gontohsa ana nei ahin hinla pakistan alhun phat’in hiche kimutona ding phat hochu akhel soh hel un ahi. Hiche kikhelna aum chu India adalhah ding kon minute 15 avat jouvin ahetsah bep un ahi.

MSRTC in Karnataka a bus service umsah kit tading
Pune, Lhamul 18 : Maharashtra State Road Transport Corporation (MSRTC) in achesa ni 5 sungin dangka 10 lakh amangin ahi ajeh chu Karnataka a bus khatcha ana sol lou jeh ahi. Pune-Bangalore via Kolhapur chu Belgaum a kiboina aum jeh in analhai tapoi. Tuchan’in jong Kolhapur, Pandharpur leh Sangli mun ho a bus ho akikham nalaiye tin MSRTC officials khat in aseiye. Pune apat Karnataka mun chom choma niseh leh bus 28 tobang kisol doh ji anahie. Border gamgi velía boina jeh a bus ho akisuh set jeh a ana kisol lou ahi tai tin Pune division a MSRTC official khat in aseiye. Dangka 10 lakh man banna bus phabep jong akisuse in ahi. Hiche jeh chun mipi hon hahsatna atoh un ahi. Senior official khat in aseina a ni phabep sungin bus service umkit tante ahi. Hinla thu aphat le aphat louvin apoh ding ahi ati. Bus jouse police venbitna aum ding ahahsat jeh a kisol lou ahi ati.

Chittoor muna ‘dengue fever’ jeh a numei 2 thi
Tamballapalle, Lhamul : Chittoor district Tamballapalle muna dengue fever ginmo jeh in numei 2 athi in ahi. Athi teni chu Asraf Unnissa (40) chuleh S. Shantamma (45) ahin anilhon ahi Kandukuru kho akon ahi
lhon in ahi. Asraf Unnissa chu ni 10 tobang khosih natna anei jeh a TTD-super speciality hospital muna ana kipolut ahitai. Numei khat nu vang chu private hospital Bangalore muna ana kijen ahin hinla tuni chun athi tan ahi. Achesa kum 4 masang chun dengue leh Chikungunya natna ana lengin hijeh chun mi 40 val anathi in ahi. Hinla civic officials hon damthei na ding lam agel khoh pouve tin demna anei un ahi. Kho mite hon asei dung juiya mi 20 tobang khosih natna anei jeh un mun chom chom a akijen uve atiuve.