Islamabad, Lhamul 18 : Pakistan Foreign Minister Shah Mahmood Qureshi in aseina a India in kicheh tah a gellhahna anei masat louva ahi leh New Delhi a kihou ding kanom poi ati. Chuleh kihui lha na dingin jong india muna kache nom poi ati. Hinla India in kihou cham ding adei mong monga ahileh kigel lhahna kicheh tah anei masat angaiye tin Qureshi in aseiye.
Hiche thu hi Islamabad muna kholjin British minister Sayeeda Warsi toh thuso miho koma joint press conference a aseidoh ahi.

Alangkhatna India external affairs minister SM Krishna in Islamabad kakholjin chu Qureshi ahung kholjin din katem’e ati. India in Mumbai kibulu chung chang bou she aseiyin, Pakistan in jong Jammu and Kashmir boina thu seikhom akinom-e tin Qureshi in aseiye. Qureshi in aseina a Krishna toh kaki houna a composite dialogue pam’a thu khat cha kaseipoi ajeh chu kum 4 val hiche composite dialogue hin kichepi chum oh she ahilou ding kanom-e ati. Hinla India in galguh bol ho thu bou seh asei jinge tin demna aneiyin ahi.

Northern Mexico gama khamnathei to kisaiyin mi 15 athi-e.
Ciudad Juarez, Lhamul 18 : Northern Mexico gama khamna thei toh kimat a boina jeh in mi 15 athiín ahi. Hiche kom mun chu US toh gamgi kom lah ahi. Athi ho lah-a factory a natong mi 5 jong apangin ahi tin official thulhut chun aseiyin ahi. Chihuahua state prosecutor in aseina a natong ho chu Ciudad Juarez muna In khat a aum pet uva manchah choi hon akap lih- u ahi ati. Ciudad Juarez hi Texas a um El Paso toh kigamgi ahin United States a kham nathei a kiveina munpi khat ahi jeh a aphat seh leh kitha-kimat umjing ahi. Hiche mun ahi Maquiladoras kiti factory tamtah um ahin hiche US firms ho ahi Mexican mi hon na atoh jiu ahi.

Ciudad Juarez muna adang mi 6 thi ho lah a pasal khat leh achanu akikap lih lhon’in ahi. Chihuahua munici -palities muna mi 4 athisa in mudoh ahi kit’e. Vanghomni chun Car bomb ana pokeh jeh in mi 4 anathi in chuleh adang mi 11 ana kitongkha in ahi. Mexico gama kham nathei toh kimat a tukum sunga thi hi mi 7,000 alhingtai. Ningkum chun mi 9,000 anathi in ahi. President Felipe Calderon in hitobanga sumkolvei ho suhmang ding angaito na a mihem 25,000 vval athi lo tai tin official thulhut chun aseiyin ahi.


BJP MLA khat’in dan dihlou tah a gam leiset kilah
Tupet’in legislature sunga illegal mining thu kisei ta hih jong leh Bellary muna dan dih lou tah a sumkolveina aum jing nalai in ahi. Mining major MSPL in SB Minerals chu kagam sunga natoh aneiya tin themmo achan’in ahi. Hiche SB Minerals hi tua BJP MLA Anand Singh a ahin Bellary a Vyasanakere mines a ama gam hilou sunga jong mining natoh anei jing ahi tin MSPL in hehna aneiyin ahi.

MSPL executive director (mines) Meda Venkataiah in aseina a hitobanga dih lou tah a mi gama mining abol jeh in Anand Singh hi dangka 960 crore in anei-agou akibe lap e ati. SBM hin achesa 1970 apat chun MSPL hi gam leiset 200 acres ana pe in hinla Singh in district incharge Minister G Janardhan Reddy toh kitho khom in gam leiset dan dih lou tah in akilah be jing’e. Tuchan in Singh in 8 million MT hichu 960 crore man sum alamlouvin amu tai. Chuleh hiche sum chu minister pa toh kichom ji ahi tin Venkataiah in aseiye.

Sudan army hon Dafur galguh bol mi tampi that
Khartoum, Lhamul : Sudanese army hon asei dung juiyin achesa ni phabep sung chun Darful a galguh bol ho tampi kathat un chuleh phabep jong Kaman uve ati . Western region a commander General Al-Tayeb al-Musbah Osman in thuso miho koma aseina a Justice and Equality Movement a galbol mi 300 kathat un chuleh adang mi 86 akiman in agri 10 val jong akisuse e ati .

Hiche kikapto na a Sudanese sepai mi 75 jong athi e ati. Hinla JEM thulhut in aseina a sorkar sepai toh kikapto na aum in gal kajou uve ati.

UN leh African Union peacekeeping force in jong kikapto na aum e atin hinla athi-amang aseipoi. Darfur a boina hi 2003 kum a hung kipan ahi. UN in aseina a boina jeh a thi hi 300,000 tobang hitante ati. Lhaphul lha chun army hon JEM mi aja a sim kathat uve ati. Tu ahi sorkar toh cease- fire kinoptona anei ahitan hiche akon ahi chamna ahung um ding kinep aum e. Chuleh tuchan a gal jeh a gam danga jam hi 2.6 million alhing tai akiti e.

Ford Motors leh Jiangling Motors in $300 m kinoptona neilhon ta
Shanghai, Lhamul 18 : Ford Motor US Company leh China a Jiangling Motors Corp chun tuni central China a $ 300 million vehicle plant semdoh nadin kinoptona anei lhon tai. Hiche hi natoh ache lhah teng leh Leiset chunga auto market lenpen hiding ahitai. Hiche factory hin kum khat leh gari 300,000 asem doh jou din akisei in hichu 2012 kichai lam teng natoh kipan ding ahitai tin US auto maker thulhut chun aseiyin ahi. Jianghing Company ahi 30 percent tobang Ford in control abol ahin, tupet ahi plant 2 a natoh anei ahi. Kum seh leh 210,000 tobang gari asemdoh jou ahi. Ford Motor leh JMC name plates ho jong factory plant thah hoa kitah lang ding ahitai.

Songmeihol kilai a toset jeh leh China kong semna a bomb pokeh jeh a mi 33 thi
Beijing, Lhamul 18 : China northwest a songmeihol kilaina muna mei akon jeh in asunga natong mi 28 athi in ahi. Hiche tilouvin jong China solam a kong kisem na mun khat a bomb apohkeh in mi 5 athi in ahi. Xiaonangou Coal mine a nidan 8:10 pm vel chun underground cable chu mei ahung ka in ahi tin Xinhua news agency chun aseiyin ahi.

Shaanxi province muna hiche songmeihol kilaina toset a chun mi 28 anathi in ahi. China gama songmeihol kilaina mun ho a toset nahi aphat seh in aum jingin ahi. Official data kpe dung juiya ningkum sungin China a songmeihol kilaina a toset jeh in mi 2,631 anathi-e akiti. Hinla natong hon aseina a atih hi hiche sanga tamjo din asei un ahi. Alangkhatna Jiangxi province a kong kisemna mun a bomb apokeh jeh in mi 5 anathi kit in chuleh natong mi khat akiholmo in ahi. Hiche thilsoh hi jingkah lam 2:10 vel’a Tongfang Jiangxin Shipbuilding Co.Shipyard muna bomb chu ana pohkeh ahi akiti-e.

Abbas in Mideast a chamna aumna din kihouna aum angai tia sei
Pakistanian president Mahamoud Abbas in aseina a khat le khat kimaito a kihouna aum masangin Israel toh gamgi vesui ding third party aum ding Israel anop angaiye ati. Chuban leh West Bank muna Jewish ho chenna aum hi gamdang ahilou leh mun dang a peh angaiye ati. Achuti lou leh kihou chamna aumthei ponte tin Abbas in thuso miho koma aseiyin ahi. Hiche hi tuchanna Abbas in alunggel aseidoh na masapen ahi nalaiye. US president Barack Obama in Palestine leh Israel hin kihouna anei pan kit lhon na dia temna ananei ahi. Hijeh a chu kihouna aum masanga Israel in hiche thu ahi nopna anei angaiye tia Abbas in asei ahi. Janhi chun Middle East envoy George Mitchell hin Israel Prime Minister Benjamin Netanyahu jong ana kimupi in ahi. Hinla Israel in amani kimuto na chung chang thu ima asei doh poi.