~ Nenei Khongsai

Khangdongho lung boinahi lung nopmo naleh lungel kisuhlou mai-mai ahipon, hinlah boi umtah ahinkhou geija tongkha thei ahi. Aphatcha isuhlhap peh louleh inleh school a boina sohthei, kham nathei lou anehdoh theiju achaina leh amale ama jengjong kithat ngapcha nalai theiju ahi. Vangphat umtahchu khangdong lungboi nahi natna jatkhat ahin, jendamthei ahi. Hijehchun, lungel thei nulepa, jilkung chuleh loile gol tehin alung boiho kithopina dia iboldiu thil tampi aumme.

Khangdongho lungboi nahi hetdoh louva aumna thei “chance” alenne. Henge, khangdon laihi hinkho
ahahsatlai, lungel kichi-ah lai chuleh imu jouse akithangset lai ahinai. Hijongleh, khangdong atamjo chun
golpha aneija chuleh adinga thilpha akihet themleh alung boinao hohi apalgalkai thei uve. Khangdong
hochu abang komleh lungel kisuhlou naleh chaval nahohi aneidiu mong ahinai, ahin khangdon laija
lungboina kitihi jat chombeh ahibouve. Lungboi nahin khangdong hinkho chu asuhsetdeh a ahinkho uhi kipa louna, kingaisetna leh lunghan nan alodim thei ahi. Khangdongho lungboina hi tamcheh cheh a ham
ahilouleh alung boinaohi iha hetdoh uham? Aseihah lheh e. Hetdi khat vangchu khangdong hohi igel sangun lung boina theihi ahatojoh un ahi. Lungboi nahi jendamthei ahi vangin doctor ho seidannin alung
boiho lah a 20% bouhin kithopina amu uve. Pilhing hochun lung boina aneiteng uleh akithopi ding akihol
thei uvin, khangdongho vangchu alung boina mudoh dingleh asuhlhap pehdin anulepa jilkung chuleh
loi legol te angai chaove. Hijehchun, na insunga khangdong naneileh khangdong lung boina hi itobang
hija iti suhlhap peh dingham tihi hoitah a hetding akulle.

Khangdon laihi mun tampi a konna hahsatnan eihin lonkhum thei ahi. Chapang leh pilhing kikah a adin
laiju ahin chamlhat tah a aumnom laiju ahijeh in nulepa tojong kilung nopmo nading abai lame.  Khangdong lungboina toh khangdong lung kisuh louna leh lunglhai louna hi alhekhen dingdanhi abaipoi. Achung chonnah khangdong lung boina neihohi kipahlou tah a umma ahideh pouve chuleh loile golto jong akivop dadeh pouve. Khangdong abang vangchu lung boina anei teng uleh ahetdoh baijong aum thounai. Khangdong hon lungboina ahinto teng uleh aumchan uva konna hetdoh thei hochu ñ lung lhahna, lung hanbai, kane ahilou leh lhisoh loi-loi, loile golleh insung mite a konna kichom sena, imacha  bolnom lou, kingai setna, thanopna neitheilou, tha lhah samna, anneh leh imut phat kikhel. Na insunga khangdong
hochun lung boina aneiham ahilouleh lung kisuhlou mai maiham nahetkhen thei louleh achunga kisei
chenghi nachaten ichan avop hitam chuleh masanglai sanga aumchan ichana kikhellem navet angaije.
Aumchan uhi phat sotpi ahung kikhel tengleh lung boina anei taove tichu hetjeng dingin aphai.
Khangdong lung boina hin asodoh sahthei thil phalou hohi igel sanga khohsejo hithei ahi. A school kai
naovah alipjou pouvin, lungel jong hahsa asaove. Hijehchun, school kai alhasamun, exam teng abolhoi
jouji pouve. Khangdong lungboi tampihi ina konnin ajam mangun, loikhat machun jammang ding
anopnao mikomah asei jiuve. Hiteng lehin kithopi ngaicha ahiuve tihi hetdingin aphai. Alung boinao
suhlhapna dingin loikhat chun juleh khamna thei lou amang jiuvin, ahinlah hichi hohin alung boinao chu
akoibepeh joh bouve. Ajehchu, juleh lou chun ichan geipi alhep lungmong joudiu ham? Alougu ahung
thenteng angaija alung sung uva ahomkeo banga anei uchu ahin hedoh kitji taove.

Alung boiho hin kamel ahoipoi, lolhinna kanei joupoi, pannabei kahi bouve tia kingai setna aneinom
uve. Lung boi suhlhapna dingin internet a-jong ache jiuve, ahin computer maija sottah atouteng uleh
athomhao nao asangcheh jin alung boinao akibelap joi. Alungboi hohi kichat umtah umchan ñ gari hatolla
tol, ju hadon tihohi abolnom uve. Lungboina nei adeh a pasal hohin lunghan, mito kinah abolnom uve.
Alung boinaohi asanval tengleh amale ama akithat gojiuve. Hichihi eimite lah a aumlou tobang ahin,
khopilen hoa kolte lah a vang nulepa ten achateu chu imalam jousea sangtah a alolhindiu adeijun, nulepa
kinepna banga aboldoh louteng uleh khangdong tampi chun kahinlo aum tapoi tin amale ama akithatji taove.

Khangdong nachate chun lung boina anei danna nahetleh, apettah in suhlhap pehding ngaito jengin. Khangdong lung boina hin thil phalou asodohsah thei jeh in ollin hungpha tante tin nahsahmon koilou jennin. Lung boina anei mong uve tia nahet chenlou jongleh aumchan uva akikhel namu hochu boina
khatvang anei taije tia hetthei ahijenge. Masang laichun doctor hon pilhing hon lung boina anei tobang
uhin khangdong hon lung boina anei pouve tin ana tahsannun ahi. Tunvang, khangdong honjong lung boina aneithei uve tia ahetkeu hilouvin pilhinga sangin khangdong ho lung boina hi ajenhah joi tijong ahetdoh beuve. Pilhinga sangin khangdong ho lung boinahi ahetdoh hasai chuleh nulepa tejong achachu alung boijeh a doctor vetsah ding datthei louhel jong aumda poi.

Khangdong lung boina neihochu themtah a kihou limpi angaije. Amaho kithopi dinga um nahi tichu
nahetsah ding ahi. Thu tamdoh dan, ajehchu khangdong hohin saopia kihil chahnahi angainom pouve.
Ahin kithopina angaichat na jousea nakithopi ngapchat chu hetsah in. Nachachun eisuboi hih in ati jongleh lunglha deh hih in. Alungboi nahi tipeh lechun angai nomlou maithei ahin, ngaihah asah
hochu seida a amaho thusei jong lunglut tah a ngaipehdin aphai. Houlimsah a alung gellu hetdoh
kigotding ahi.

Doctor ivetsah teng alung boina, aumchan Kikhel hochu doctor koma sei angaije. Insungmi adang
lung boina nei ana umkhah jongleh doctor pa hetsah ding ahi. Doctor pa chun khol chilna neijintin,
atahsa a natna aumjeh a lung boina aneiham hetdoh nadin thisan test jong bollinte. Atahsa a natna
umlou ahi nahleh psychiatrist (mi lungel hethem) doctor vetsah paijin aphai. Alungboi nachu anasan
khahleh lou nehsah tante. Ihetnao akivat jehjong hintin, nulepa themkhat chun achateu lung boina nei aumleh doctor koma puilouvin antidepressant lou anehsah pai jeng jiuve. Alung boiho jenna dinga louneh hi aphapen ahidehpoi. Alung boiho suhlhap nading hin nulepa kithopina hi alou phapen ahi.