Manipur mite jousen mukhahtei dinga atup Loktak lake chung changa hin seithei tampi aummin ahi. India sah-solam gamma twitheng kikhol tamnapen, Imphal kopi a konna 45 km. gamla, nidan khatna lhunna thei Loktak hin Manipur socio-economic a hin panmun lentah aneije. Ahinlah, Loktak a vetnom umpenchu gambeh neocha cha twichunga kilet phumdis kiti hokhu ahi. Phumdis hi hampajung tampi chunga leiset kumsotpi aum phatna detchet a, adet danchu injong sahthei ahitai. Phumdi hi asan na laitah in metre 2 apha e. Phumdi 20% bouhi twichunga kilet ahin, adangsehi twinoija kivuilhum ahi. Phumdi kihamuna penchu Loktak solam khu ahin, hivahin Keibul Lamjao National Park jong aumme. Ngamanna kivah mi sangsom tobanghin phumdis chungah in akisah un achengden taove. Leiset chunga twichunga kilet national park tia kiminvo chu Loktak lake bou ahi.
Loktak a khun kongin touvinlang gakholle lechun datmo umtah phumdis chunga chengho hinkho mandan gamudoh in nate. Phumdis chunga cheng ngaman mihohi phumsongs akitiuve. Twi chunga kilet ahijeh uhin aphatseh tobangin achennaohi akitollen ahi. Tulai khantouna jonghin amatphahda pouve. In tamtah a hin
solar energy thahatna a kilha TV anei uve. TV neilouho jongchun radio beh anei uve. Loktak hi mitna vetdinga anoplheh vangin achunga cheng miho hinkho-hi anom chamkimpoi. Hahsatna tampihi akimai topiu angaije. Aphatseh tobanga hi a innu akhel uva phumdis danga inthah akisah u angaijin ahi. Malaria leh oinatna hi alah uvah alenglheh in ahi. Ahinlah sotpi cheng ahitahjeh uhin akingaise taovin hahsatna atohouhi amaijuvah akilangpoi. Phumdi chunga cheng ngaman mihohin ngamatna ding chuleh ganhing nodohna dinghin pesticides leh insecticides amanjeh uhin twi hi ngaho dingin jong hinnathei behseh ahitapoi.
1980 kum velchun khonungleh ipi hungsoh theiham ti geltohna neilouvin Manipur sorkarÃn nga, ganhing
leh hampa tampihi Loktak ah analha lutnun ahi. Hichihin, Loktak dillen na ecosystem asusetan, masanglai
peh a nga, ganhing leh hampa hochu tuhin akimu tapoi. Imphal khopi a konna ehtwi Nambul vadungin ahinlhoh khu Loktah a alonlutjeh hin twi thendan jong alhasam cheh-cheh tai. Manipur sorkar hin Loktak dillen'a mei semna, nga matna leh tourism semphatna dingin 1986 kumchun Loktak Development Authority (LDA) anaphutdoh e. 2006 kumchun Ministry of development of North-Eastern region hin Loktak dillen semphatna dingin dangka 41.00 crores atohdoh in ahi. LDA lamkaina noija hin phumdi suhmangna dinghin natoh achelha jinge. 2006 kumchun Manipur Loktak Lake (Protection), Act akisemin, hichu 2007 kumchun amend akibol kitne.
Loktak dillen hi galguhbol mihon kiselnan amangun, sepoy hon operation abolkhum vangun kholjin mi Loktak ve a hunghi alhomchom lhehtai. Loktak vella galguhbol mi aum hi phumdis chunga chengho dia manthah natah ahi ajehchu, amahohin lungmongtah in hinkho amangthei tapouve. 2009 kumma galguh bolho Loktak dillenÃa konna nodohna dinga sepoy hon "Operation Summer Storm" abolkhum naova chun galguhbol mi 12 athiuvin ahi.
Loktak lake a min avetnom pen ahivangin phumdis jonghi Loktak dillen dinga kichat umtah ahi. Inkisa hohin nisavah atintantah jeh hin twilah a ganhing umho adeh a ngaho hinkhohi atongkhalheh in ahi. Manipur Remote Sensing Application Centre leh Space Application Centre, Ahmedabad'n 1999 kuma remote sensing studies abol naova amudoh uchu phumdi hi atamcheh cheh in 1990 kumma 10,499 ha. a patnin 1994 kumchun 13,506 ha. alodimtan ahi. Loktak chungthol hopthuma hopkhat hi twi ahin adangsehi phumdi in alodimtai. Kum somni jouleh phumdis hohi twinoija alhahlutjeh hin environmental degradation asohdoh jitai. Global warming jeh jonghin Loktak dillen aletdanhi akumseh in themkhat khatnin anemsuh tan, aletdan hi 1971 kumchun a area hi 491 km ahin tunvang 236.21 km bou ahitai. Ipichu hita jongleh, Loktak dillen hi India gamsunga vetnom umho lah in ajaojinge.
