Hiche kinoptona anei ni-khochu Lhajing nisim 4, Vanghomni, 2010 ahi. KNF(S) in KNO noiya kikhailha jouse toh Kuki chate dinga nasatah a panlahna kinei ding ahin chule aitih laisea sah le lhang kho le veng kinaikhompi jouse toh chamdel a kilha khom ding ahi tin aseiyin ahi. Chukitleh KNO toh kijopmatna neilou Kuki namsepai jousen akin thei penna ahin jopmat loidin jong KNF(S) Inf. & Pub Secy. pun temna aneiyin ahi.
State Govt. in SoO kinopto nanoiya ahiloubeh abol u KNO in tahlang
Imphal, Lhajing. 12: Achesa Lhajing nisim 10 nikhoa 1st MR Banquet Hall muna KNO, UPF, State sorkar thalheng leh Army officers hotoh Joint Monitoring Group meeting kibol nah a Sate sorkar ho tohgon le umchan hoilou tah a aum naban uva ajing nikhoa The Sangai Express a hin kisodoh 'SoO Ground Rules in KNO hihen UPF hijongleh party khat a patsa adang abel theilou ding' ahin ti nachung ah donbutna Pu T. Stephen, Under Secy. Inf & Pub. KNO in ahin neiyin ahi.
Hitobang thugol hi SoO kinopto na dungjuiyin akisei khapon phahpoh injong aumpoi, hitia thilgon kibol hi Kuki te khantouna dinga kilamtin ahinaban in Kuki sunga kikhen telna umsah teiding thilgon ahi tin Pu Stephen chun aseiyin ahi. Hiche toh-gon hung umdoh danhi igelleh Bulpi sorkar in kipumkhat ding agon hi lungthim chomkhat akineikhum naban a ngansea anei palaiho lhinlelna khat ahi danjong aki phongdoh e tin aseiyin ahi.
Kum 16 nungah bus a khelha ahinkho beita
Lamka, Lhajing. 12: Nungah Kimneilhing kum 16 Letkhosei Chanu T. Boljang Churachandpur muna cheng
chu tuni nilhah lang nidan 1:30 velchun Imphal Keishampat Bus Parking apat Lamka hinjon Bus No. MN S-9576 a hungtou chu Khomoi kho alhun a akumlhah laitah chun asakhao gen chu Bus kotkhah in a-oh in aluchang akitakeh in ahi. Anah le akam sunga thisan alon chun Bus neiho le KKL lamkai hon Churachandpur
District hospital alhut uvin hinlah akisuh khahna akhoh jehchun Babina hospital, Imphal akokhum un hinla
damjou talouvin KKL Lamkai holeh Bus neihon along damsa chu KSO Lamkai nan achenna mun alhut tauvin ahi.
KIM in hetsah naleh temna hinnei
Lamka, Lhajing. 12: Ahung lhungding Lhajing nisim 14 nikho tengle Synod hall CCPur mun a Kuki Inpi
Manipur makaina noiya kikhop khomna thupitah umding ahi. Hiche kikhopna a hungpang dingho chu ahile
Zomi Council, Hmar Inpui, MPC le kiloi khomna dang hojong hidiu ahi.
Hiche kikhopna muna hung lhatei dingin Kuki Inpi Vice-President pu in muntin a Tribe Leaders jouse heng ah temna le hetsahna aneiyin ahi.
Governor in Patriots Day nikho lemna nei
Imphal, Lhajing 12: Manipur Governor Gurbachan Jagat in Patriots' Day 2010 nikhoa hin Manipur mite alemmin ahi. Governor a kon'a thuso chun Patriots' Day hin min ajojoulou Manipur galhangho adeh a Bir Tikendrajit, Thangal General, Niranjan Subedar, Kajao leh Chirai Naga apenna gam angailutjal uva kikhailih hochu eigel dohsah uve atin ahi. Manipur galhang hohi vanoi thang sapkangte ana kidintepiuvin thangthipna beihel'a akipeh doh uhin chamlhatna kitihi koiman alahmang thei ahipoi tihi vanoi avetsah uve, atin ahi.
Governor thuso jongchun Patriots' Day iman naova ihetdiuchu 1891 kum'a sapten Manipur gamsunga vai ahop theinao jehchu lengpa chate kitoloujeh ahi. Ahinkho phalngam galhangho jana apeh ban ah Governor pan mipi hin kipum khomna ahat theina dinga pan alahjing ahi tin aseije.
