British te thuneina noiya India ana umlai chun ima zouse British te thuthu ana hijeng in, India te koi tobang athunei nom aumkhah leh British te maipha holna'a kisangol denjeng ahidan'uh history in eina hil uvin ahi. Hinla gam le nam ngailutna dihtah neimi hangsan phabep ahung umdoh toh kilhon in British te maipha holtah sang in amaichangtah uva ana kidoupi tauvin ahi. Thisan tamtah vang along nai, hijongleh India in chamlhat ahin mu'n, tuni hin vannoi het thei dingin gam khangtou khat ahitauve. Ahinla akhoh mama jeng khat chu mihem ahung penleh athitei jeh in chuche phat laiya India chamlhat galsatna'a ana lamkaiho tuni changei damjou aum tapouve. Amaho zalenna ding hiloubeh gal anabol'u chu abolkhel’uh ahidem? Hilou hel. Mi’n gam le nam ngailutna dihtah ahin nei tengleh khonung'a anam mite (atu achate) mi khutnoiya aumding deilouna jehin ama hinkho pehdoh jengding hijong leh achung’a lhung thil hahsatna le gentheina jouse akimaitopi ngam jeng in ahi. Ama’n ahinna pedoh tajong leh khonung'a anam mite zalenna ding'a ahinkho pedoh ahijeh in akisih ngaipon, chule alhase ngaipoi. India in zalenna ahinmu nung in zalen galsat lamkai ho geldohna amang jingin, amaho min manlouna ding in melchihna chom chom apeuvin ahi.
Tuni Kuki chate i-dinmun’u hi kavet leh British thuneina noiya India ana um toh kibang kasa’e. Meilheite’n i-gamsung uva thuneina achal uvin, ima jouse amaho thuthu ahijeng tai. Oleh Manipur hi meilheite gam ahi’n, amaho gamsung’a cheng ihiuve iti ding’u ham? Hiche chu hilou ding ahi. Manipur hi phaicham le thinglhang in akikhen in, phaicham chu amaho'a ahi'n, thinglhang gam hi Nagate le eiho’a ahiye. Chule Naga le Kuki chate chu tribal kitiho ihikit uve. Hijeh’a chu Kuki le Naga kigopkhomna ahung um tengleh tribal hung kipansahji ahiye. Hiche tribal teni hin amaho gamsung'ah thuneina imacha anei pouvin ahi. Ajehchu thinglhang gam jouse jong Manipur in ahoptha in, athunei chu phaicham miho ahiuve. Phaicham hi phatah'a thinglhang in aum
kimvel ahi’n, alailungtah’ah meilheite acheng uvin ahi. Agam’uh aneo in, amahola apungtul tul jeng uvin, agam’uh atehta'n, hizeh'a chu tribal kitiho chenna thinglhang gam ahin duchatíuh ahitai. Tribal kiti teni lah'a chun Nagate chu meilheite'n anahthei pouve. Hinla tribal khatjoh Kukite, eiholoihi meilheite'n jol'a einaman jeh uvin mipha hinte inatiuvin, i-chengpol jeng uvin, tuhin i-jol teuvin i-chung uva eh ahintha pan tauvin ahi.
Amahohi sum nei ahiuvin, chule thunei vaihom jong ahiuve. Thinglhang gamía ahung lut til lai'u chun phailei lhou in ana pang uvin, i-gamleiíuh mun phalai lai chu ol-ol in amaho khutíah ina lhaso pan tauvin ahi. Chule lunggel sao neiloute chu abang komleh ham le pao neilou mihemte dan dan in meilheipao jengseh in ikihoukitji nalai uvin ahi. Phaichamía i-valut tengleh eiho pao koiman eina hetpeh pouvin, meilheipao i-manlou leh ahcha lungvai akibang jeng’e. Hijeh’a chu amaho toh kihou theina dingía amaho pao man ngai ahitah jeh in amaho pao ikijil uvin, tuhin amaho tobang in amaho pao imangthei tauvin ahi. Hinla thinglhang gam'a ahung teng'u leh kholgammi ahi’u akihedtheina ding uva eiho paoía anahoupi ding chu amaho pao johía inahoupi ji tahjeh uvin amahoín eihopaoía ikihouíuh ajah tengleh i-gamsung uva eihin nuisatji tauvin ahi.
Hiche bepchu hilou in i-gam minho’u jong amaho pao in i-sem uvin, tuhin amaho pao’a kisem kho hochu amahodan in agel tauvin ahi. Hiche jeh'a chu oltah’a i-gam’uh lahpeh ding ana gonggal jing’u chu tuchung ahi hung pisoh ahitai. Phat sot laipeh’a meilheite lunggel tu’a i-hin hetdoh’u hi akikhel naipoi. Hetdoh lou’a aum hel sangin avaigei chu gamcheng in aphajo nalaiye. Hijeh’a chu tin le haa toh kitho’a i-doudal’uh angaita’n ahi. Lamkai kineppi umtah tahho’n hiche thuhi nahsahmo’a akoijing jeh uvin simlai kiloikhom hon ahin doudal masapen uvin ahi. Hijeh chun thinglhang gam aki minphah chan in Churachandpur District Studentsí’ Union haimil in umta ponte. Pathen in mapui jing’u hen.
CDSU in agelkhoh jeh in Committee on Protection of Tribal Areas Manipur ahin semdoh uvin ahi. Hiche’a hi ipidingía Tribal kijaosah ham? Tribal teni’n pan alahkhom lhon mong ding hinam? Kuki Areas kitihi aneochomna um’ah ahidem? UNC le ANSAM in newspaper mangchaía COPTAM ahin support lhonjeh’a hatah’a i-hansanbe mongdiíu hinam? Mit khel'a mit tina hung umtaleh Tribal teni hi apangkhom lhon mong nadem? Ahilou leh amaho gam jong asuhkhahna um'ah hintem? Naga ho’n pan alah uva, amaho gamjong asuhkhah ahi khah leh keima hetna lhahsam jeh hinte. Koima hotna'a kahin sut vang ahipoi, chule hiche hi adihpen le juitei teiding katina jong ahipon, keima lunggel kahin sutdoh ahibou’e.
Bishenpur bandh ana umjeh chun nasatah in CCpur atongkha kit in ahi. Mobile news khat in aseichu adih ahi’a ahileh songchang lengkit hinte. Ipi atileh Bishenpur bandh vang’a CCpur jeep passenger khat kisepkha’a Shija a kijen jeng ahi tadem? Hoilai chan Bishenpur hija, hoilai CCpur ham?
Gamgi kicheh umlou hel’a chu ipiding’a moh penpen ihi’u ahidem? Gamgi kicheh umhih jongleh thinglhang gam chu thinglhang gam ahi’n, meilheite’n eihin lahpeh theideh pouvinte. Hinla gamgi kicheh ana umlou chu hatah in akhohíe. I-lamkai ho uvin amaho angsung ding bouseh ana khot khot sang uva mipi lamkai ahiíu leh hiche hochu ana vettup theilou’uh ahidem? Ipiding’a tuni changeiya kamcheng khatbeh kehdoh ngamding MLA le Minister chule MP i-neilou’uh ahidem? Election hilou'a selection a kaidoh jengseh ahijeh’uh ahi kiti leh donbutna lhingpen inte. Gamgi kicheh ana umhenlang hileh tuchung boina hi peldoh thei hiding in katahsan’e. Hiche gamgi kicheh ana umlou umsah ding’a hung kipandoh COPTAM hohi mipite’n hatah’a i-tosot uva, i-thapeh’uh angaitai. Chuti ahilou’a ahileh i-gamsung’uh inch a sim hilou’a, mile a sim i-lhaso ding uvin aumtai. Pu le pa khang akon'a i-hinlotou'uh i-gam leisiet’u meil-heite khut'a alutding angaingam mihem umding in katahsan poi. Hiche meilheite lunggel guilhun sahlouna ding'a hung kipandoh COPTAM hohi ipi lampiía ikithopi diíu ahitadem?
Mahatma Gandhi in Non Violence Movement ana patdoh laichu geldoh angaiye. Hinla mi’n song’a eisepta'a non-violence titeitei jong vang chu thil bai hisam ponte. Mipi hung sousang ding hi meilheite lunggel ahi ti zong i-geldoh’uh angaiye. Thinglhang mite choudoh teitei ding hi amaho lungtup guilhunna ding khat ahijeh’a hibangse’a hi um’uh ahiye. Tunaichun nasatah in Kangvaiíah boina aum’e tithu kaja’n, phamo kasalheh jieng’e. Chule galdah jong aging'e akiti'n, thuchen vang hiche kasut changeiyin kahe nai dehpoi. Chuti hilou ding in dei aum'e. Hahsa lheh jongleh thohhad angaiyin ahi. Sunchang laiya CCpur a kon'a volunteer tamtah tah Kangvai’a iga um'u chun Kangvai'a khosung mite venbitna apeh ding ahipon, inn i-nung jot teng’u leh achung uva ipi lhungthei ham ti gelpeh angaiyin ahi. Tuchung COPTAM kiphudoh lonahi keima lunggel in Phouchakkhai le avel’a cheng meilhei hotoh kinahna’a lamkai ding’a lhendoh hiding uvin katahsanpoi. Government toh kina’a, gamgi thu seiding’a kiphutdoh ahijo uve. Mipi le mipi ahung boi tengleh Ibobi government in hiche hi nam issue ahi ti’a idemand’uh ahin heikoi nikho teng leh ipi aban i-seibe di'u hitam?
1997 kum’a Lamka khopi sung’a boina ana umjeh’a i-chan'a hesoh genthei ina thoh'uh hitam? Eiho’n ithoh uvin, ahinla Naga area in nasatah in ana phatchompi’n ahi. Ukhrul gamsung'a development lhung ho jouse khu eiho Lamka’a ikithato uva inn le lou iki hallhah peh laiphat uva kiboldoh jengseh ahiye. Tuchung injong meilheite kichatna’n thipbeh ute tina ahipon, khonung ding gelna’n chomkhat lungneng phot ute tina ahijoi.
COPTAM in hatah in government ah hinno hen, mipi’n anung thob’u hite. Lunggel sangtah neiya COPTAM natohna chu Phouchakkhai le avel’a cheng meilheiho jeh in lhaso poute. Adeideina uva Welcome to Bishenpur kitah’u hen akhohpoi, government toh COPTAM akihoutoh theiya ilolhin’u leh achamlou’a kibotdoh kit thou thouding ahiye. Gaal le tol in kisat taleuhen, hinkho tamtah i-lhasodi’u, inn le lou neilou’a tamtah i-hung umdoh kitdi’u ahi nalaiye. Hiche chu thuchom hitaleh tuchung’a COPTAM kiphudoh mohseh hung hikit nalai ding ahiye. Gaal le tol'a ikidel del kah uva athuía ana chaidi’u, tu’a Bishenpur’a lutding’a kisei kho 29 jenhi gal ahung kichailam leh Bishenpur district sung’a um ana himan kit ding ahiye. Hijeh chun kanam mite, thilpha ding gelna’a thohhad chu asetna ipi um’em? Meilheite tamtah that jong leuhen, pu le pate'n eina dalhah peh'uh gam meilheite khut'a aludding leh aphat chomna ipi um'em? COPTAM hi phat chomcha pephot’u hite. Hatah in tosot’u hitin, athu’u mang’u hite. Gamgi kicheh aumteng leh i-nop’u leh meilheite lutmo hel’a jong lhathei ahiye, gamgi kicheh chu hung umdoh phot phot hen.
