Election um masang chun support ana bolkha hih jongleng tua patsa hi phat chesaho nungvet kit talouvin thakhat in na tongkhom tau hite tin ahung kikhom MDC le ainnsung miteho hengah temna aneiyin ahi. Gamsung khantou nading ahin itoh-gon naho ah ahithei chanin numei chapang hopnathei chanin hopsah u hitin
pan lakhom uhitin, keimatah jong michom in gellouvin thakhat ihiuve tin neilauvin tinjong temna aneiyin ahi. MDC lhendoh holah a upa pen Pu Thangkam Misao chun houlim aneina ah, "Election umding akijahdoh a patsan MLA pu in koima chunga sihlelang neina akisei khapon chule koima boltum jong aneiye ti akihe khapon ahií tin aseiyin ahi. MDC kaidoh ho chengse hi mipi lah a lhale ding kahiuvin chule MLA pa hi ahile Minister ho lah a lhale ding ahin koima atumbeh a umlouva mipiding igelkhoh sohkei diu ahi tinjong aseiyin ahi.
Kinthempu Dr. S. Chongloi in thusei aneichun ADC Act noiya thuchedan ho aphongdoh in chule akhohpen le thinglhang mite ho kivaihopna toh kikal thei Sec. 29 sunga clause phabep hilchenna jong aneiyin ahi. Haosaho hetpihna um- louva Council in Village au- thority tundoh nading thaneina apeh holeh thinglhang gamsung hoa reserved forest ahiloule Council thaneina a Haosaho dinmun asuhset theija kijih hokhu chingthei tah'a avetsui uva natoh nalam jousea Pathen toh kilhon khom jinga aumdiu vinjong tilkhouna thu aseiyin vang thumpeh najong aneipi in ahi.
IMC lha 6 suspend kibolding
Imphal, Lhajing 11: Sorkar in lhagup a dinga Imphal Municipality Council (IMC) suspend abolgotnu deiloujeh in councilors hohin sorkar hin alung gelhi akhel louleh High Court a ka rights u lelah nadinga case kaboldiu ahi atiuve. Hichi thutoh kisai hin Vahchanni chun IMC campus muna thuso mihotoh kimu tona aneijun ahi.
Hivachun, ward no. 27 a councilor Sh. Parahladi Sharma in sorkar'n Chairperson pa suspend abol kigot hi
pachat umtah ahinai, hijongleh ageisang valtai. IMC Councillor 27 lah a hin councilor 14 hin sorkar kom'aIMC Chairperson chunga no confidence motion abol diuvin atem un ahinlah imacha anabol pouve tin aseije. IMC in lhakhatna sum amuhi dangka 24 lakhs ahin, asuhmanghi dangka 43 lakhs leh 45 lakhs kikah ahijeh hin lhaseh a hin IMC hi dangka lakh 20 akivatpeh in ahi. Hijeh a hi natongho lhalo leh pensioners mi 131 hohi lha 30 jen sum anakipelou ahi ati e. IMC hin sum lhahsamna aneiho suhlhapna dinghin sorkar kom ah kithopina ana thum in ahinlah sorkar hin nahsah in aneipoi atina ban ah Sharma in sorkar hin ibolla aphatcha action alah louham tin thudoh aneije.
Chuleh, department dangho a sum tamtah kivat hokhu sorkar'n ipi alo uvem tin thudohna aneije. Sorkar kom'a
councilors ho lunglhai louna eivetpeh un ati ban ah Sharma hin kiphinna leh a rights u muthei kitna dinga court
kithopina kamanchahdiu ahi tin aseije.
Hetding khatchu IMC sumlepai dinmun vechil dinga kiphutdoh committee in report apehchu cabinet'n hoitah a akholchil nunga sorkar hin IMC hi Lhajing nisim 10 a pat lhagup sunga dinga suspend boldinga gellhuhna anei ahi. IMC hin dangka tampihi lamdih louva amandanhi mudoh ahitai.
Imphal khopi a thao kijoh panta
Imphal, Lhajing 11: Lhathum jouvin petrol leh diesel ho angaima bangchun retail outlets in akijoh pantai. Naga simlaihon ni 68 jen economic blockade aboljou uva Transporters and Drivers Council (TDC) hon NH-39 manlouna dinga thulhuhna asemjeh un thaoleh thildang hohi Manipur'a kimu joulou ahitai. Lhajing nisim 1 a patchun central sorkar ahung kikum'a thilpo gariho sepai avenbit sah phat un NH-39 a kon in Manipur sungah thao leh adangho ahunglut pantan ahi.
Thao ahungnen phat hin state sorkar'n thao mutheina dinga rationing order ana sochu Leisemni chun mantah
louding atitai. Vahchanni apat thaokhuh atamjon thao ajohpandiu ahitai. Ahin, lhathum jen thao anahah ahijeh in mipi hochu Leisemni chun mi tamtah thaokhuh ho achun thao chodin akigollun ahi. Thulhut kimudung juiyin thaokhuh 30 hin Vahchanni a patchun thao ajohpan taove akiti e. Nikho phabep jouleh Manipur sunga thao hahsatna hi beitante tin kinep aumme. Alang khatnah, thilpo gari 188 hin NH-39 a kon in Imphal khopi ahung lhung kit tai.
Hichiho lah a hin gari 116 hi nitin ngaichat po ahin, gari 49 hi FCI ahin, gari 19 hi thaopo ahin chuleh gari
4 hi LPG tankers ahi. Chuleh, gari 62 hi thil podin CRPF ho kilhonpina in Imphal dalhan NH-39 lang ajontai.
Lampi a toset jeh a mi 2 thi
Imphal, Lhajiing. 11: Lamlen a toset tojeh in Police Commando khat leh Gram Panchayat member khat tuni chun mun chom choma athi lhon in ahi. Police Commando pa hi Sektak Kamlianpau Paite, kum 40 mi s/o Sektak Tuamza- thang of Mualnom Vengnom, Churachandpur, ahi. Police hoa kon na kihedol in, amol lemsa Kamlianpau Paite hi 2nd IRB reifleman ahin, tule tua hi Bishnupur CDOs noiya rifleman ahi. Thulhut kimu dungjui jin amahi aloipa toh scooter (MN-1J-3535) a police station ahinjot na lhon a TataDI khat (MN-01-W-1346) amsang lhonna lhai chu photlot louva ahung kingah jeh a kisukha ahi ati. Akisuh khah jou chun Bishnupur hospital alhut uvin hinlah vangset umtah a damjou louva thi ahitai. RIMS a post mortem akibol jouvin ainsung miten along damsa chu akilah tauvin ahi.
Mun dang a tosetna kit khat achun, Sekmai Police Station noiya um Khurkhul kho komvel Leimakhong lampi
achun ama le ama gari accident a kisukha in Heikham Manimohon Singh, kum 38 mi s/o H. Tomba of Loitang
chaprou jong chu athi in ahi.
