Aizawl, Lhajing 11: Vahchanni a Aizawl khopi a Mizoram Smoke Free Group ho kom'a houlim aneina chun Mizoram Chief Minister pa hin dumchep leh dumma kona kisem adangho suhbeina dinga natohi kum somni ahitan ahinlah, deibangin alolhingpoi tin aseije. Dumchep suhbeina dinga na tohbe angaije ti aseina in Chief Minister pa hin MSFG kiloi khomna hinmipi dumchep phatloudan hetsahna ding ahin thil tampi abol ngaijinte atin ahi. Lal thanhawla hi Mizoram'a dumleh dumma kisem thildang suhbeina dinga kiloi khomna a hi chairman ahi. National Health Survey in tukumbul til'a kholchilna anei dungjuijin 83.1% Mizo pasal leh 60.8% Mizo numei hohi dumchep ahilouleh khaini ne ahiuve atin ahi.

India sah-solam gam'a kichatna sanglheh 
Guwahati, Lhajing 11(NNN): India sah solam'a galguh bolhon thakhat chetna India in chamlhatna amunikho Lhajing nisim 15 khu boycott aboljeh un state capital jouse leh thuboina thei mundangho ah kichatna asanglhehtan ahi. India in chamlhatna amunikho ahungnai phat hin sah-solam gamho a hin sepai hon dengchan tah in ahung boithei namun ho vetchilna aneijun ahi. Meghalaya galguhbol Hynniewtrep National Liberation Council (HNLC) hohin India chamlhatna nikho boycott nadingin nidan 36 Meghalaya bandh Lhajing nisim 14 jingkah lang 6 c.m. a pat Lhajing nisim 16 channa dingin akouvun ahi.

Galguhbol phabep Kamtapur Liberation Organisation (KLO), Manipur Peopleís Liberation Front (MPLF), National Democratic Front of Bodoland (NDFB), National Liberation Front of Tripura (NLFT), Tripura Peoples Democratic Front (TPDF) chuleh United Liberation Front of Assam (ULFA) hohin mipi kom'ah Lhajing nisim 15 hi kithutoh chetna India in sah-solam gamho atouphao chuleh sepai ho chavalna deilou vetsahna a boycott abol diuvin temna anei uve.Galguh bol hohin thakhatna thuso abolnaovah 'Chamlhatna deina a igalmiu chunga gal kisathi bolbeding tampi aumnalai vangin lampi dihlang ahojing nalaije India in sepai thahatna athilbol leh lhekhen ding eigot naohi mun themkhat ah lolhing nama jongleh mipin chamlhatna angai chatnao vanghi asumit joupouvin, tunung jongleh asuhmitjou loudiu ahi', tin aphong uvin ahi.

Thil kikhel hohi keiho dingin aphalang ahijinge ati naban uvah galguhbol hohin Kashmir miten chamlhatna gal asat u ahung sousanghin eilung letsah lheh uve tin asei uve. India sah-solam'a galguhbol hohin Maoist ho galbol danhi tunaicha tahlang theipen machalna ahi atiuve. Thakhatna thuso abolnao vachun 'Communist Party of India (Maoists) galguh bol hon India gam 30% sunga mihem 75% chenna atoupha phat uhin India sorkar kichatnan alodimtan, India dinga terrorism leh insurgency bantah a kichat thei penchu Maoists ahi atitaove', tin aseijun ahi. Galguhbol hohin vannoija kiloi khomna chom-chom adeh a India toh kinai gam hohin chamlhatna adelnaovahi ahin kithopi diuvin ngehna aneijun ahi.