Janhi chun vannoiya khoutah a ama macham'a vaipo ho thusim 5 ho chu isei tauvin tunin banjom in amaho bang'a vai anapoadangse se ana vekit uhite. World War umlai chun ama macham'a (dictator) vaipoh vannoiya seithei khopma kithang ana um jongle amaho thusim chu chomkhat ana donda tadi u hitin hijeh chun tukhang'a hetdia lom mi phabep ho ana veuhite.

Hitobang'a khanse leh khoutah a vaipo igam sung uva akihepon um jong aumkha poi tin kisei jong leh kiseikhel pon te. Hitobang vaipoh naho ahin agenthei pen leh akisugenthei pen chu milham ho ahijiuvin ahi.

Robert Mugabe (Zimbabwe) :
Robert Mugabe hi kum 85 a upa ahin ama in 1980 kum apat chun vai ahinpoh pan ahitai. 2008 kum in vannoiya dictator rank - 6 nain apang'in ahi. Zimbabwe gama economic condition hahsat dan het jeng theina khat chu, tukum January chun agam government in amaho sum Zimbabwean Dollar 50 Billion note asodoh uvin, hichu a value anem dan chu changlhah (bread) phang ni/2 bou chohdohna theibou ahin, chuleh tohmun mulou (unemployment rate) chu 85 % ahikit in ahi.

Achesa 2008 kum chun Robert Mugabe in election um ding in aseiyin, hinlah election result chu ama akaidoh a ama party ahatjoh le bou apom ding'a aum jeh in election bol le bollou thakhat ahijeh chun ana kibol tapoi. Chuin ama supporter hon opposition ho abulu uvin mihem 163 athat un, mi 5,000 val abol gentheijun voh jong avouvin ahi. Achaina in aman opposition lamkai Morgan Tsvangirai toh powersharing agreement soi ana kai hon in ahi. Chom khat jouvin Mugabe in Ministry jousea aluboh jouse ama deilhen miho bou ahinpansah in kinoptona (agreement) chu ajuitapoi. Dammo-veiset jong akhohse lheh in, kijenlena ding hospital ho jong alhasam in, agamsung uchu hatah in aboilheh in ahi. US Government in Mr. Mugabe hi haidoh ding'a asei vang un amapa ahaidehpon, ahaideh lou vang in US in sumkolvei na in amang jing nalaiyin, stainless steel hoa mat ding nickel le ferro chromium ho akichoh jing nalai uvin ahi.

Sayyid Ali Khamenei (Iran); 
Akum - 69; Vai ahinpoh kipat kum - 1989; 2008 kum'a dictator rank - 7. Ayatollah Khamenei hin gamsung'a ama douho chu amattup jengía chule women's right activist ho, namneo-sakho neo (minority) ho chuleh thuso lakhom (journalist) ho hijong leh ama doudal (opponent) ho chu amoh vetlou ahi. Tulaiyin vannoiya din Iran gam bou hi chapangho suhkhel jeh a thina channa gotna (death penalty) kiphalna gam chu anahi. Hiche gam'a hi pasal chapang kum 15 leh numei chapang kum 9 ho gei chu thina channa gotna kipe thei ahi. Gam dang'a chu kum 15 dungho hi khangdong chapang (juvenile) ahijeh a ipi suhkhel nei jong leh capital punishment kipe theilou uva ahi. US le Iran hi diplomatic relation neilou ahiuvin, chuleh vaipo ho kikah a jong "war of words" aum jing'in chule US in economic sanction abolkhum jing in, hinlah suhlou chang (Wheat), kolbu leh lou le ai (pharmaceutical product) ho ajohkhum jing nalai uvin ahi.

Isayas Afewerki (Eritrea); 
Akum - 63; Vai ahinpoh kipat kum - 1991; 2008 kum'a dictator rank -10.  fewerki in Lhaphul (May) 2008 chun "agam sung'a election aum nading hi kum somthum/somli (three or four decades) ahilou leh hiche sang'a sotjo sung'a umtheilou ding ahi, ajehchu election a hi kitetna aumjeh in gamsung miho kah a kikhen thangna asosah ding ahi' tin aphongdoh uvin ahi. Media lang kitiho jouse jong chu agam government thunoiya (control) abol jeng'u ahi. 2001 kum chun journalist hon ama douna thu asei jeh un, journalist mi som tobang chuche kuma ana kimanho chu tuni chan in songkul ah aumjing nalaiyun ahi. Ellha 2008 kum chun US in "Eritrea in anti-terrorism effort" ah pan ahalahpoi ti jeh in agam'a dia gaal manchah ajoh chu ahin sutang tauvin ahi.

Gurbanguly Berdymuhammedov (Turkmenistan); 
Akum - 51; Vai ahinpoh kipat kum - 2006; 2008 kum'a dictator rank - unranked. Berdymuhammedov in thilpha abol ho chu - ama masanga vai anapo, Saparmurat Niyazov in thil dihlou tah tah anabol ho, vetsahna a ama le anu minna kum sunga Lha minho asah ho chule ama le ama pathen tobang'a akidop sang naho jouse chu asumang in ahi.

Alangkhat a thil phalou ahinbol ho chu - Niyazov in ana chepi dan dihlouho tamtah achepi jing hi ahi. Gahsei theiho chu, gamsunga opposition party kiti mong mong aum ding kiphallou, media lang chu government in apum control jeng chule amasa a political prisoner ho kilhadoh dehlou tiho hi ahi. Hinlah US in 2008 kum sung in Turkmenistan a kon in thao US Dollar 100 million man akichohdoh in sumkolveina in amangcha jing nalai uvin ahi.

Muammar al-Gaddafi (Libya); 
Akum - 66; Vai ahinpoh kipat kum ñ 1969; 2008 kum'a dictator rank - 11. Achesa Lhalam 1, 2009 chun Gaddafi in hunam'a (coup) vaipohna ahinlah a avaipo kal kum 40 lhinna chu amangtan ahi. Amahi vannoiya Lengho tailouva Dictator a pangho lah a apangsotloi ahitai.

Gaddafi vaipohna ho seiseho chu Libya gam douva kila a ahinkho lhung keiya songkul taangthei ahi. Ama
dou ho chu suhgimna sangpen kipe jeng ahi. Kum phabep sung hin US toh kihetthem na (relation) ahung hoijep in, 2008 kum chun US in Libya gam'a kon in thao US Dollar 4 billion man akichohdoh uvin ahi. 2008 kum a US Secretary of State Condoleezza Rice in Libya gam'a aga kholjin chu kum 55 sung'a America lamkai khat Libya gama agakholjinna amasapen ahinalaiyin ahi.