Hiche muna chun KSO(GHQ), KSO (SH), ATSUM, SAHILCA, CDSU, ZHRF hon pan ana laovin, lunggel tamtah seikhom na anei jou nungun anoiya bang hin kilolna thulhuh phabep aneijun ahi.
1. COPTAM Demand ho molso masangse a COPTAM mina Organisation jousen pan lah soh kei jingding.
2.Sadar Hills COPTAM toh-gonna noiya Haosa jouse lamkai jouse mipi jaona Consultative meeting khat phat kilem khat nikho a nei dingin pha akisai.
3.COPTAM Sadar Hills lamkai na a Haosa ho leh KSO (SH) in Sadar Hills Original Boundry kholtoh a asunga land record ho valley district noiya umho hills district administration noiya umsahna dinga pan ahin lah diuvin pha akisai.
4. Hills Area MLA ho kom'a Lhajing nisim 10 masanga pan nalah uva ipi hamkhat beh nabol doh lou uleh COPTAM in Boycott nakibol diu ahi tia thu ana kipe ahin, hinlah 12 August a toukhom na anei diujeh in ana kingah in, ahin chujouva pan ahinlah dehlou uleh hetsah na umkit louva achunga toh theithei kitong ding ahitai tin mipin phatsah na vetsah nan khut abeng cheh un ahi.
NIT Manipur academic session kipanta
Imphal, Lhajing 12: National Institute of Technology (NIT) Manipur academic session masa penchu Manipur Chief Minister, O. Ibobi Singh in Vanghomni chun Takyelpat Government polytechnic mun ah hondohna aneitai. Session akipantai tichu Chief Minister pahin phat chomkhatna dinga Government Polytechnic campus sunga kisa NIT hostel leh class room ho thensona aneijouva aphondoh ahi. India sah-solam gamho a dinga NIT 6 kipelah a hin NIT Manipur hi session pan masapen ahi.
Thensona kin'a ahoulimna in Chief Minister pa hin tua course jilthei Computer Science and Engineering (CSC), Electronics and Communication Engineering (ECE) leh Electrical and Electronic Engineering (EEE) ho
chung chonía hi course dangjong kikoibe ding ahi,chuleh NIT Manipur hi IIT hotoh kibanga dopsang theina dinga boltheichan kibol ding ahi tin aseije. Manipur NIT kisah vah louna jeh ahilchen na achun Chief Minister pan "gam akichoh lhah theilou jeh ahin, tunvang Lamphelpat ah acres 313 akichotan, dangka crores 30 hi gamchoh naleh pal getna dingin aki koidohtai. Angaichat beleh acres 200 hi kichoh beding ahi ati e. Chief Minister pa jonghin insahna dingin PDA hin natoh apantan NIT hi kum 3 kum 4 sunga sahchai dingin sorkar hin bidoi aneije.
Phat chomkhatna dinga NIT kisahi state sorkar'n sum atodoh ahin, NIT ichanthei uhi simlai holeh khangthah ho dinga chanvou phatah ahi atin, chuleh sorkar hin mipite dinga lungel aneiho molso theina dinghin mipin kithopina ipehdiu angaije tin aseije.Education and Transport Minister L. Jayenta Kumar hin athuseina in "NIT hi Manipur jong achansahjeh in Prime Minister pa apachatna thu aseije. NIT Manipur leh simlai hohi isuhboi loudiu ahi tin mipi tepna aneije. Prof. P.K. Bose, Director, NIT chun state sorkar hin NIT, Manipur patdohna dingin kithopina ninglhing setnin eipeuvin, phat chomcha sunga temporary campus sadoh nah ahin Manipur Development Society (MDS) ahin chuleh PWD, Power Department leh PHED honjong panpithei channin eipanpiuve, tin aseije.
Aman aseibena ah "NIT Manipur hin engineering course bou hilouva Management course leh applied science jong khonun- gleh ahinkoi ding ahi'. Tu session a simlai 61 admission kipelah a hin 7 hi numei ahin 54 hi pasal ahi chuleh pasalho lah a mi 20 hi Manipur gampam mi ahiuve. Session hi tukum Lhajing nisim 2 a kipan ah-
itai, tin aseije.
Medical Directorate in hetsahna nei
Imphal, Lhajing 12 : Tunin Medical Directorate akon hetsah khat chu MBBS/BDS course a ding'a Modified Wait list chu akiphong tan chuleh hiche list hochu Department Notice Board ah akitah langtai tin thulhut akimui. Open counseling chu ahung lhung ding Lhajing 20 nidan 11:00 tengle Medical Directorate mun'a um ding ahin candidate / Manipur MBBS/BDS Entrance Examination representatives ho jousen 2nd counseling a jong aphatchahung pangcheh ding'in hetsahna ahin nei uve. Chukit leh candidates jousen original transcripts / documents/ certificates leh Passport size photographs (8 copy) ahin kipoh diuvin hetsah ahi.
Koi tobang open counseling a panglou chu seat kipe louding chuleh selection board in candidates absent ahilou leh ahung vaigei hochunga mo kipolou ding ahi ajeh chu seat ong hochu wait list a candidates ho in
alodiu ahi tin thulhut akimui.
Panlah khomna dinga Police hon temna nei
Imphal, Lhajing 12 : Kumseh a ana kimang Martyrs Day (Lhajing 13) leh Independence Day (Lhajing 15) kimang nading ahin boina ima aumlou nading'in police department hon mipi ho kom ah kithokhom a pan lakhom din atem uvin ahi. Police department akon thuphon kimu dung juiyin boina umlou nadin mipi ho in ain-mai/dukan hoa gari anei kihelou ho kingah sah louding chuleh mitam nalah a umlou ding'in hetsahna anei uve. Ihamtia gari anei kihelou, ahung kilah lou aum leh police ho ahetsah diuvin jong thuphon anei uve.
Policedepartment in aseibe na ah hetkhah louho a kon thilpeh ima lahlou dingin mipi ho ahin hetsah uvin ahi. Ihamtia akisei bang'a boina toh aumleh noiya number hoa hi kihetmat thei ahi. Amaho chu SP/IW Control-2540214 & 2540159, ASP/IW Ops- 2446008 & 9436023018, ASP/IW - L/O- 2449975 & 9436038404, Dy, CO/CDO- 2446006, 2446007& 9402882416, SDPO/Imphal- 2450580 & 9612904636, OC/Imphal PS- 2450002 & 9436284357 leh OC/City PS- 2458515 & 9856089966 ahiuve.
