Eimite lah a-hin chapang thunun nading tin akichatna thei diuvin-ilhem jiuvin ahi. Mi abangkhat chu aletdoh nung geijin jong ameisan dohpeh e. Kichatna hi mihemkeo hilouvin ganhing honjong anei uve. Muthim kichaloi, twi-thuh kichaloi, huikonga touding kichaloi chuleh thingchung sanga kalngamlou jong aki um-e. Kichatna kinei hohi aumlou behkhat ilung sunga kisemthu a eile ei kikilhem ahin, phat sotpi ibol tengleh lahdoh thei louva ilung sunga veidenthei ahi. Kichatna chung changa hi i-Hou uhin ipi panmun alah a phaham? Hou-hin kichatna inei houhi ilung gel'a kisemthu ahibouvin, chuleh thilha-sangah itiu jongkhu atah ahipoi tia lungmon na eipeh diuvin dei aumme.
Pasalho lungthimhi kichatnan alodim'e - min anumei valle eitinte tia kichatna, akhutna power achoiloujeh a
kichatna nei, amopohna avetsui joulou jeh a kichatna, anatohna a kilolhing lel khante tia kichatna, athupi pen chu min mi meisan tia amuding kichatna hohi akineijin ahi. Pasal hinkhohi kichatna toh kichohpol ahiti theiset
ahi. Kichatna dim ihivangun pasal hohin ikihoulim naovah kichat thuhi iseipoh pouve. Ichenao lhongpi chu
pasalhi meisan louding itiuve. Hijehchun, pasal hohi kimeisan lheh jongleh mimu dingin ahangsan dan in aki
umjin ahi. Sepai galsat hokhun kichatna thu him-him akamcheng uva kon in apotsah pouve. Sepai akichase
hochu mihon miduhdah louvin bou agelle.
Kichatna hin mihem hinkho phatkhat ahilouleh phatkhat teileh alodim ahijeh hin ësubjectí thupitah khat chu
ahi. Nuten achateu matah a a-imut nadiuvin kichatna thusim aseipeh un, Newspaper hohin thil neocha jong chu lentah akiso theina dingin kichatna ajaosah un, Pathen thusei hochun lhagao mangthah huhdohna dingin milung asukichaove. Kichatna thei thusim hi ihajah behseh tengleh ilungthim akicha theiji tapoi. Tuni hin lungthimía kichatna nei atamjeh in psychiatrists leh therapists hodin natoh akivat tapoi.
Bible vanghin 60 vei jenhi ëkicha hih un' eitiuvin, ahileh kichatna thuhi iti igeldiu hitam? Psalm 118:6 a khun 'Pakai keilama apanleh ima kaging poi, mihemin i-eilo thei ding ham?' tin aseije. Kichatna hi ipi hija iti na atoh ham ti hetna dingin amasan tahsan hi ipiham iti na atoh ham tihi hetmasah angaije. Ajehchu, kichatna leh tahsana hi akibanglou thil chom-chom ahin, khatnin chunglam akoleh khatnin noilam kohjeng ahi. Mi abangin Christian morality hi damun thua mi akichatsah uva vangam lutding deina a thipha boldia mi athilkhoujeh uhin outdated ahin manthei ahitapoi tin asei uve. Bible hin leiset chung itohdung juijin tohphat manleh talen matna thu eihil naove. Ahin, Christian morality hi kichatna hilouva lungsetna a kingam joh ahi tin eihil uve. Pathen'n Israel te komchun ëforeignerí hochu lungsetna neija naboldiu ahi ajehchu nangho jong phatkhat chun foreigner nahiuve tin ana hille. Christian morality hi kichatna hilouva lungsetna a joh kingam ahi tihi 1st John 5:2-4 in akimun ahi.
Min kichatna neicheh nantin Manipur miten kichat hinkho iman bang uva amangding midang tamponte. Mihaosa hon kasum neihi min hekhante tin akivaichat sahtai. Society phatchomna theiding hetna neihon khat
ngaida kiseidoh khante tin athipchet taove. Jingleh ipithu ahungsoh in thaileh ipithu ahung umdem tia mipihin
idip kikidop ahi. Thinglhanga icheleh thinglhangmi galguh bolho akikichan, phaitol ihung lhunteng police commondo ho kichatnan khojin nungin akivahdoh ngampoi. UNC leh ANSAM hon economic blockade sottah aboljeh un nitin ngaichat akimujou tapon, akimu chasunjong neilou genthei eiti chohjou ahitapoi. Igim-ithang anamdeh nungin UNC hon ni 20 dinga blockade ahinbolbe kit uleh ipi kitiding hitam tin akilungim sohkeitai. Meilhei hohin Nagate akichatjeh un Kukite gambeh them themin kilahpeh hen atiuleh Kuki te lungthim ah kichatna ahetdimpeh beuve. Manipur sorkar hin thilpha hinte ati vangin Tipaimuk dam asah kigotjeh hin amunna um thinglhang mite kichatna apen ahi. Adih mongin thil ihetkhahlou hohin eikichatsah ahinai. Hitobang dam hi aumkhahlou jeh a eikichatsah u ahi. Phatle nikho ahungphat tokah in lungnengin ngah hat maijute tiding ahimaije.
