Innovation a-hin values ajao angaije. Thilthah kisemdoh manjenseh hin innovation ahi akiti theipoi. Value
ajao louleh innovation chu thilkhatna konía thildang khatna kikhel mai-mai ahin apodoh panvang sum tampi lodoh nante, hijongleh koiman phatchompi ponte. Tumasang jepcha a Mizoram sorkar'n thinglhang louvatna kivah inson lakh khatleh sang somni jennin thinglhang leivat adalhah a kivahna theidang - ngavah, vohcha vah, horticulture, sericulture chuleh adang dang aboltheina diuva sum apeh uchu keigel dan in innovation dihtah ahi. Thinglhang lei avat tah louphat uvin thingphung gophung hung kidodoh intin kum phabep jouleh gamang mangjeju tante, chuleh natohthah atohdiu hohi thinglhang lei vat sanga gamchenga athao olding ahina ban ah tohga amudiu jonghi thinglhang lei abolsang uva atun ni beh a tamjoding ahi.
Eimi te gamjong veleuhen thinglhang lei ibol ban ah thingphung len hochu bim (timber) dingin iphuhkit uvin,
tuhin gam achaitan iche nalang jouse sepai sam kivou abang jenge. Sorkarín kivahna thei adang eigonpeh hih
jongleu kivahna thei adang ñ sumkol vei, dukan bol, sepai pan hohi habolíu hitin thinglhang lei vatvang dalhah phat alhingtai. Sepai panhi neocha igel loudiu ahi. Inchen semna dinga aphapenloi ahinalaije. Gollhang lekha simtalou hohin sepai kilahna aumteng lhaso louvin aphai. Ipu ipa teuvin thinglhang lei anabol uva achateu lekha simsah ding hahsa anasah u ahin, eihonjong thinglhang leima ibol uleh ichateu lekha isimsah loudiu tina ahi ngalle.
Simlai chapangho lekha hilna dinga hin innovation angaije. Lekhathem khatchu iti chona, iti lungput aneija,
society dinga iti na atoh dingham, lekha athep man'a ahung kondohna society don louva vanvaleh a akikhotou vangin mija achangpoi, a society dinga natong nomlou chu ahinlo umlou ahi tihi simlaiho lungsunga hetpeh ding ahi. Education hi itobang hidiham tihi simlai, jilkung, school vetup'a pangho leh nulepa ten imudan uhi a kibangin, ineo laija education chu tuchan geihin akijui nalaije. Education hi khangche dantoh akitoh tapon khel angaitai tia igelji maitheiju ahi. Hijongleh, education khelding kitileh adoudal penjong kihikit maithei jinte. Manipur a lekha simhi facts iha hetleh alhing jenge itiuvin, facts hahet hochu lekhathem ahi atiuve. Tukhanga simlai hohin facts ahahet uchu alhingjou tapon - kikheltah a lungelje ahetdiu, boina sangtah ho asuhlhap theidiu, aloitoh bolpeh ho banga na atohkhom diujoh hi ngaichat ahitai. Ichate, itute khanga education semphat ding idei uleh eiho neolaija pat tunigeija ichepiu outdated education hi pailhah a amaho khanga ahin ngaichat diu chihna, thepna hochu khopi lenía school atamjon ahil banga khu hilpan angaitai.
Innovation hi society sunga boinaho suhlhapna dinga jong mantheitah ahi. Innovation hin eima changvalía boina hojong eisuhlhap peh theije. Vetsahnan, mi tampihin sumle paija boina inei uvin, ibat atamcheh cheh in, sum akikhol theipoi. Ajehchu, sum inei hohi achomlang jepía mansangin masanga iman ngai bangun imangthou thou uve. Isum mandan ikhel tokah a kido dohna umlou ding ahi. Society boina suhlhapna dinga innovative deuva lungel angaije tihochun mi atamjo lunggel bangin agel pouve. Masanga lungput hochu ipailhah louleh society boi nahi suhlhap in umponte tihi atah san'un ahi.
Tulaihin, iboinao Thadou pao/Kuki pao/Thaou-Kuki pao hi agingjap japkitnin, masanga bang hilouva jatchom
jepmin hichi boinahi ilhamthei nadiuvem tihi akigel tengleh milham ho dingin dipdap aum-e. Ajehchu, ineolaija patna ipu-ipa teovin asei uva tunigeija aseilhah lou uchu amaho seibang bang hin tunin khangthah hon athahbeh
in seiphakit jong leuhen ichan iphah diuham mumasat thei ahi. Bonnang lah a gari ohkhu akihathin channa alhahlut cheh-cheh tobang khu itho theiju ahi. Mipin kitohtah a apomthei dinga iseithei loudiu leh seida a phajo diham tia geljong aki um-e. Vadung twi itinna adimteng acham'a londoh nading lampi akimu banga eiho dinga jong mipin apomthei lampi khatchu hung kilhung jeng nante tia kinepmo nading aum sampoi. Tekahna a manthei ahibehseh lou vangin khopi len Shillong, Guwahati, Delhi, Kolkata, Poona, Chennai chuleh adanga eimi simlai leh natong umhokhu khonung leh ipi hungsoh diham vang akisei theipon tutadi hin paothu/Houthu a hin aboi pouve. Kilungtoh tah in Kuki Worship Service min in akai khom un, Kuki Studentsí Organisation min in akipum khom uve. Hichi tobanga nanga-keija ti umlouva kipun khomna theihi Manipur a jong pohlut theina dinga hi lung igel khomdiu akul-e.
