Kabui Mothers' Association (KAMA) hon jong tumasang jep a hiche jeh a kiphinna ana neiyu panhu naleh hatah a sorkar chunga alung nopmo nau vetsahna dingin Zeliangrong kiloikhomna chom chom hon jingleh ZU office Paona Bazaar Imphal munna toumun kiphinna anei diu ahi.
Hiche kiphinna a pan lading leh KAMA hon sorkar akon hiche bazar a toumun athumnau panhu na peding
a thuso miho komma kitepna nei kiloikhomna ho chu ahileh; Namguilong Youth Club, Namguilong Mathenmei, Minuthong Khunou (Namdunlong) Women Society, Ramji Youths' Club, Gaipuinam Womensí Society Dewlahland Stadium Road chuleh Ramji Women Welfare Association Sagolband, ahiuve.
Hichea geldoh ding khat chu ahileh, KAMA in achesa Ellha Nisim 25 a chu Chief Minister pa komma lekha thot ana pehlut uva, kithenso vah tading Khwairamband Bazar a aden denna kisa thah sumkol veimun a hi, toumun sangli(4000) lah a ja-ni(200) bou ana thum u ahi. KAMA ho sei daan achu hiche toumun kithum hi Kabui (Zeliangrong) numei ho ding bou ahi ajeh chu amaho hi Manipur a dinga mijaat tampen anichan na ahiuve, ati.
KAMA in jong thugihna aneiyin, athil thum uhi CM pa hoitah a hetsahna kinei ahitan, donse louva aumjing
leh, Sonia Gandhi in state ahung vil tengleh kiphinna lentah kinei ding ahi atiuve. Hiche toh kilhonna hin, The Movement for Tribal People's Rights Manipur (MTPRM) in jong Manipur sorkar in hiche sumkol veimun lentah kisahna a khatcha beh jong thinglhangmi numeiho akipeh louhi demna aneiyin ahi.
MTPRM thuso President S. Ramhaoleng in aneina achun hitin aseiyin, hiche sumkol veimun kisa thah hi
namkhat sumkolveina mun dinga boi kisa ahipon, hijeh chun MTPRM in achesa Ollha 21, 2009 a chu CM pa lekha ana kipe a thinglhangmi ho jong mun apeh dinga ngehna ana kinei ahitan hinlah vangset umtah in tuni chan geiyin hiche thu ahin sorkar in thullhuhna anei hihlaiye ati.
Hiche thuso in aseibe na achun, sorkar a sumkolve imun hopdohna leh phondohna anei lou lai vangin, mun khatcha jong aong aum tapoi ati. Chuleh, tuni chan geiyin hiche sumkolveimun hohi ipi daan leh itilam panga kipe ham ti hetdoh ahihih laiye. Ahin, ginmo umdaan in hiche mun hohi alen alal hotoh kihe ho bou kipe a chuleh hiche bazar hi namkhat bou changthei ahileh amin jong hiche nam min chu kisah le kilom tah ahi tin MTPRM in demna aneiyin ahi.
Hiche thuso jong chun aseiyin, kum 2001 census dungjuiya Manipur mijat chu 23,88,634 ahin, thinglhanga cheng tribal mijat chu 9,83,074 ahin, hinlah Thoubal, Imphal East, Bishnupur leh Imphal West district hop sunga um thinglhang miho kisimtha leh lakh 11 tobang hiding ahi. Alangkhat a, Phaitol mijat achun non tribal community tamtah- Nepalis, Biharis, Muslims, Bengalis, Meitei etc, chuleh tribalmi jong phasah panga ahi.
Hijeh achun, state sorkar in hiche sumkolveimun lentah kisa thah mun a thinglhangmi khatcha jeng jong mun apeh lou hi imajeh dang ahipon jat le nam chuleh hou jeh a kikhenna asoa kimuda na asem ahi. Sorkar in hiche thu hi state sunga cheng nam mi jouse thakhat a avet a, giltah a angaituo a agan na thei penna aseilhah dingin temna aneiyin ahi. Politics chungchang thepna neiho seidan in, hiche Council election hi political party alliance ni(2) kikah a kitetna hidingin tahsan aumin ahi, Mizo National Front (MNF) - Mizoram Peoples Conference (MPC) alliance leh alang khat a Mizoram Pradesh Congress Committee (MPCC) - Zoram National Party (ZNP) ahiuve.
State Election Eommission in "model code of conduct" (dihtah a kimanchah nading daan) daan palkeh louva
hoitah a ajui cheh nadinguvin political party ho ahin, candidates ho chuleh sorkar lhacha ho temna aneiyin ahi.
Mizoram People's Forum (MPF) in candidate ho amichang leh inson a vote holna akha jeh in, Presbyterian
Church in atosot candidate hon TV a interview pehna leh mobile phone sms mangcha in campaign abol uvin ahi.
Candidate khat in aseina achun, MPF in amichang a vote holna aphal lou jeh in, adinna Ward sunga miho sms bollin vote kahol e,ati. MPF in jong election a candidate hon sum le pai asuhmang jat u ahithei chan a suhnem nadingin, banner leh pamphlet(lekha jih) candidate khat in asothei ding jaat gahna asem in ahi.
2011 le Sc & tech award kipeh be panding ahi: IPR Minister
Imphal, Phallha. 1: Information and Public Relation Day 2010 kin tunia kiman na a chun "Manipur State Journalist Awards 2010í chu state journalist mi 7 hon akisan taove.
Hiche kipaman sang hochun abon uva melchihna lekha (memento), dangka 25000 chuleh ponsil amucheh u ahi. Kipaman sang hetthei hochu National Integrity and Communal Harmony chungchang editorial a asut a kon Huiyen Lanpao (English) editor Brojendro Ningombam chun best editor kipaman akisan in, best reporter kipaman chu Huiyen Lanpao thuso lakhom (reporter) RK Sanatomba in kichep golseh, Art and Culture chungchang in Huiyen Lanpao thuso lakhom ma Inamacha Salam, Health and Hygiene in Poknapham thuso lakhom RK Bullu, Rural Reporting in Sangai Ex-press thuso lakhom Laishram Samungou chuleh Women and Child a chu Kangleipak Meira thuso lakhom Wangkhemcha Dhamen le ISTV cable thuso lakhom N Philip hochun akisan taovin ahi. Hiche kin kiman na jingun TN Haokip Minister IPR chun asei na ah 2011 a kon state journalist ho tilkhou nadia Science and technology chung chang a best reporter kipaman jong kipe pan ding ahitai, atin ahi. Jin-gun chun asei be na ah gamsung a mon na le bit na akhehsuh jeh in thuso miho ding in kimanchahna hatah in asuboi jing in, navah a thuso miho ahung chaloh theilou le gamsung chu aboi ahi ti het a thuso miho chalohna suhboi louding in mipi tepna anei in ahi. Kin nei a pang L Lakher IAS IPR commissioner chun asei na ah thuso mihoín adoltah a athaneina amanchah le gamsung a dia khantouna alhut thei ahijeh in thuso miho chingthei ding in tepna anei in ahi.
Hiche kin op chun deilhen a kouna kipe IPR commissioner ana hi P Bharat, Senior journalist T Mangi, AMWJU senior member ban a milen milal phachompi apang uvin ahi.
Keithel sung’a ipiding’a thinglhang miho ding seat umlou ham : MTPRM
Imphal, Phallha 1 : Khwairamband Bazar sunga keithal mun 3 hoa tribal ho touna ding mun government in agelpeh lou jeh in Movement for Tribal Peoples Rights Manipur (MTPRM) in along oilounau chunga thuphon ahin nei uvin ahi.
Thuphon kimu in aseina achun Manipur sunga kum 2001 census dungjui-a 23,88,634 population lah
ahin thinglhang mi phaisung a umho leh Thoubal, Bishnupur a umho tilou vin 9,83,074 ahin hicheho lah achun Nepali, Muslim, Bikami, Bengalis ho jong ajauvin, ahileh thinglhang min jong Manipur sung population akeh khat tobang akihin ahinlah tuchan in Manipur government in noi se tah a Khwairambam ba-zaar sunga thinglhang miho gelkhoh louva seat apehlou hi nam khat leh nam khat khen tumna nei ahi akilang'e ati.
Hitichun MTPRM in Manipur Chief Minister kom'a achesa Ollha nisim 21, 2009 kum achu seat thumna
Memorandum ana kipelut ahitan ahinlah tuchan in khohsah na aumpon chuleh Market 3 hoa seat ong talou injong hetdoh in aumtan hijeh achu itidan a hou leh bih, jat le nam a khentum na umthei ham? Manipur sunghi Meithei hobou chenna ham? tin Manipur government thudoh na anei naban ah agang theipen'a thinglhang miho gelkhoh na ahin nei din jong temna MTPRM President S. Ramhaoleng akon thuso kimu chun aseiyin ahi.
