Imphal, Ellha 7(NNN): Union Minister of state for Rural Development, Agatha Sangma ahung lhung ding Ellha nisim 27 nileh Ukhrul district Manipur mun'a hung ding ahi tolhon in Ashang Kasar, Chairman Ministry for peace and Development (MPD) in aphondoh na achun Ellha nisim 27 nia pat ni 4 sung kiuchatna golnop (Festival of fraternity) ahung hondoh ding ahi chuleh hitobang golnop hi genthei khotona (compassion) thupi mangcha a kineiding ahi tin Tangkhul Mayor Naga Long le Ministry for peace and Development lamkai ho akon thulhut akimui. Ashang Kasar Chairman MPD in aseibe na achun hiche kin ahi milun Rishang Keishing, milun Itachu Pochury (Nagaland Parliamentary Secretary in-charge of Tourism, Law and Justice) chuleh milun Thangso Baite (MP Manipur Lok shabha) hocheng hung lhadiu ahi tolhon'a cultural Programmes, Football match, debating competition jong loupi tah a kimang ding ahin chuleh L.L. Mona, Pathen vahchoi lasa minthang pajong mipi heng'a a-aw ahung suhlang ding tolhon'a Tangkhul Naga Long lentol (Ukhrul) mun'a kimang ding ahi tin thuso miho heng achun ana phongdoh un ahi.

Chuleh Manipur Human Rights Commission (MHRC) Chairman anahi W.A. Shishak leh Manipur AIDS control so- ciety project director P.K. Jha jong akikou lah a hung pang lhon ding ahi tin hetsahbe najong thulhut akimui.

Gari in toset ato jeh a mi 2 thi, 14 kitongkha
Imphal Ellha 6(NNN): D.I Tata khat in toset ato jeh in mi 2 athin mi 14 akitongkhan ahi. Hitobang thilsoh hi I.T road lampi Tamei komvel Tamenlong district hopsunga tuni nilhah lam thusoh ahi. Aum talou teni chu Madhu Singh, Sagolband Vijoy Govinda mun'a cheng chuleh Ibecha Devi, Nambol Khaba mun'a cheng ahilhon'e. Akitongkha hovang achen achai hetthei ahinaipoi. Madhu Singh hi Tamei gam DIET centre a Staff (natong) ahin, Ibecha hi anche louhing joh mi ahi tin thulhut chun aseiyin ahi.

Hetthei khatchu Tamei jon bus a atou nauva lamkah a gari set jeh a mini truck 207 ahiloule D.I tata tia kihe khat hi avai (hire) u ahin, ahinlah Tamei phah masang kilometres 7 vel vat nakom a bon-nang tamna (mudslide prone) aphah uchun komtong a hetman louva gari kang achop lut tah jeh in hitobang toset hi anato uh ahi. Nilhah lam nidan 4:00 vel thilsoh ahi tolhon'in akom avelía ajapha chan le ahepha chan 10th Dogra Regiment ho pum'in ana del lut un ana kitho piuvin ahi. Akitongkha holeh athi teni pum'in abon uvin Tamei Primary Health Centre mun analhut tauvin ahi.

AR hon simlai ho kithopi jing
Imphal, Ellha 6 : Achesa Ellha nisim 5, 2010 nichun 17 AR, 10 Sector hon HQ IGAR (S) noiya Educational cum sightseeing Tour chu Ukhrul Public School ho anasol uvin ahi. Simlai mi 80 le jilkung hochu Manipur gam'a Loktak Lake, INA War Museum, Moirang, Kangla Fort, Zoological Garden chuleh adang dang ana vetsah un ahi. Simlai ho kipana le thanop nachu principal leh school authorities in A.R ho chunga akipa nau ana phong un ahi. Hitia tour a asol masang uvin jong achesa Lhalam nisim 24 apatsa 26 chan in jong Ukhrul
munía Sacred Heart School leh Holy Spirit School simlai hochu Camp anabol peh un ahi.

Hiche achun painting, singing, debate tiho anapangin, pachan na neiho chu AR hon kipa thilpeh ana peuvin ana
tilkhou un ahi. Hitia lekha bou hilou a simlai ho talent chomchom hetdoh thei nading leh goljona aneithei nadiuva A R panlah hi school authorities hon nasatah in akithang atpi lheh un ahi.

DIPR Manipur akon hetsahna
Imphal, Ellha 6 : Ellha nisim 9 nikho teng leh Territorial Army Day kiman nading'a 1st Manipur Rifles Banquet Hall mun ana kiti chu tua sepphat natohna a'um jeh in Gandhi Memorial Hall munjoh'a manding ahitai tin Information & Public Reltions, Govt of Manipur'a Joint Director, Pu A. Balkrishna Sharma in hetsahna ahin neiyin ahi.

United Naga Council (UNC) leh Manipur sorkar kihou kipan tading
Imphal, Ellha 6 (NNN): Ahubng lhung ding Ellha nisim 16 nileh United Naga council (UNC) leh government of Manipur in kihouna Delhi mun'a apat ding ahitai tin thulhut chun aseiye. Hetthei khatchu United Naga Council (UNC) hohin Autonomous District Council, Manipur sunga avel'a ima kholtoh louva achohing jeh a ana kiphin uva Manipur sorkar angoh u ahi. Hitia hi council ho thanei na sorkar in vet masat peh louva khohsah loutah a ana hinsah jeh a Manipur (Hill area) District Council Act, 2008 hi amend bol masat nadia khoutah a kiphin nale deisah louna ana phon nachung uva Manipur sorkar in amoh achelhah pi jeng ahi. Hitichun economic blockade chan geiyin khou tah in ana kiphin uvin ahinla Lhalam nisim 21 ni apat centre government thusah nan kihou toh nadin Economic Blockade chu ana suhai uvin ahi.

Hitia hi Achesa Lhalam lhasung apat ni 25 tobang Delhi mun'a camp abol uva centre government kom'a ìAlternative Arrangement for Nagasî tia angeh uchu tulha nisim 16 nileh kihou nachu kipan ding ahitai tin, Manipur ahung kile uva Naga mipi lah achun lunggel khom na ananei nau uchu aphongdoh un ahi.

Bishnupur commando hon mi 4 kaplih
Imphal, Ellha 6 : Manipur Police Bishnupur Commando hon achesa Ellha nisim 6 nichun Ishok Gram Panchayat Bishnupur district a Upa Pradhan sopipa chu meilhei galguh ho akon in ana huhdoh tauvin ahi. Hitobang operation kibol na ahin KCP(MTF) mi 4 ana kikaplih in ahi. Thuso miho masanga  chun hiche operation lamkai Additional SP (Ops) Bishnupur Ishak Shah in hitin aseiye tahsan thei tah thulhut kimu dungjui in R.K. Sanayaima (26), S/o (L) R.K. Sanamacha Singh, Ishok Mayai Leikai mun'a cheng Upa Pradhan sopipa aman na ban'a Naorem, Oinam Mamang Pat leh Yumnam Khonou Mamang Pat kimvel a Operation akibol na achun Mamang Pat, Mutum Yangbi kom apat chun thal akilha pan in hitichun alethuh nan jan nidan
10:00 chan aum in hiche akon chun KCP(MTF) mi 4 thilong ana um in ahi. Athi ho akon chun Lethod meipum 1, kapthei changkhat leh 9mm Pistol 2 leh Magazines 2 chuleh Chinese hand grenade leh Nokia handset no 8014547041 khat toh mudoh anahi tin Addl. SP in phondohna aneiyin ahi.

Aman aseibena achun athi holah a mi 2 min hetthei ahitan amani chu Manaobi 40 S/o (L) Toto chuleh A. Premananda @ Naocha (25) S/o Rajkumar ahilhonin anitah lhon'a Toubul apat chengmi ahi lhon'e tin hetsah na anei in ahi.

PIB in agon Bharat Nirman Campaign chelha jing
Imphal, Ellha 6 : Loyalakpa Laibung, Keinou'a Press Information Bureau (PIB) in agon, Bharat Nirman Campaign, ani 2 channa achun Imphal East a District and Session Judge (Retd.) Pi Thokchom Surbala chun
Right to Information (RTI) Act chung thua'a mipi ho houlim thuseipehna ana neiyin ahi.

Hiche Act chung chang'a hetlou'a phamo phabep ho mipi hetsahna dingin ana houlim in ahi. Pi Surbala ahoulimna achun, koitobang in thu hetna (information) nei nom lou ahilou le thuhil dihlou - PIO ho chun leuna dangka 250 apatsa 25,000/ - chan aneitheiyu ahi, atin ahi.

RTI hi gamsung miho thaneina manchah khat ahi in, khosung, gamsung khantou machalna ding'a amanchah dan mipin ahet them ngaiya ahi tin jong aseiyin, tekah pidingin Pi Surbala chun NREGS a aumlo hechen lou hon hiche RTI tha mangcha'a asum umna le ageina ahetdoh thei ahi chujongle contractor koitobangin natoh hoilou akihet leh achungthu sum ijat a natohna ham, dandungjuiya atoh hinam tiho kholthei ahi, ati in, gamsung khosung khantouna aumthei nadinga nehguh naho suhmang ahiloule daldoh ahinathei ding in mipi in hiche RTI chung chang hetlou apoimo in ahi.

Hiche RTI Act dungjuiyin thukholna nei (applicant) ho chung'a gihna nei mi koitobang hetdoh ahile, amachu IPC dandungjuiya achungía thutan umthei ahi tin Pi Thokchom Surbala chun ahoulimna'a ana seiyin ahi.