Nongtrai kho a dorbar Secretary, Pynshai Rapmai hin dorbar hi gam neileh achunga vaihom ahijeh hin gambeh hectare 100 hi leinoija limestone laina dingin atohdoh e, atin ahi. Ollha 2009 geichun Nongtrai khohin dangka 3.15 crore amun insonna kibang chetna akihop uleh dangka 1.4 lakh cheh achang phaove. Project hi akingahleh kasum munaohi tanding ahitai.
Project hin lounatohasukhapon, limestone kilaina munhohi songlah ngen ahijeh hin loubolna a jong kimang theilou ahibouve. Shella Action Committee hin agam mite thalhengin ima seithei pouvinte. Supreme Court komma Lafarge ten project angahna diuva lekha seplut hochun Lafarge chunga thangthipna aneijeh uva abollu ahibouve, tin aseijun ahi.
Rapmai hin aseiben Nongtrai kho dorbar hin Court masanga LUMPL’n mipiding gelna a damtheina lang, education leh infrastructure semhoina langa atoh hoina hohi kisei loulai ahi, ati e. Dorbar jonghin agam mitten phat sottah gentheitah a donlouva aumnung uva industrialization aphatchompi theina diuvin Meghalaya sorkar’n alungel ahinsei chuleh MoEF hi sanjeng dingin phante atin ahi. Inn, lamlen, kenglam, damtheina, education hohi ahin kichoh hing kittan tuhin India gam mundanga cheng hotoh kibanga hinding kanom taove, atiuve.
Dimapur bus terminus phattep louva kikhah ta
Imphal, Ellha 21( NNN ): Dimapur mun’a Bus Counter jousen galguh ho demand leh suh genthei na khang jou talouvin abon’in akikhah tan ahi. Hitia Dimapur apatna- solam gamsung a cheding hon genthei na tampi anatoh tauvin ahinlah Naga thingnoi NSCNK( GPRN/NSCN), FGN/ NNC, chuleh NSCN-IM hon pehjou louding Tax akoi uhi lahdoh ahi masangsen kiche taponte tin All Nagaland Private Bus Union (ANPBU) lamkai akon thulhut chun aseiyin ahi.
Mawlynnong kho vetjui thei tah hita
Shillong, Ellha 21 (NNN) : Meghalaya gam’a solam gamkai district Mawlynnong khochun India sah-solam gamkai jouse vetjui thei nading’in pachat umtah ahung hitan ahi.
Hetthei khatchu “Cigarette and other Tobacco Products Act 2003” kiti sorkar in anei apat Mawlynnong kho
sung hin phatah a achepia khamna thei cigarette leh Tobacco hi ajoh leh aneho akha jou u ahi. Hiche chungchon’a Asia gamkai adia thinglhang kho hito-bang jou aum naipoi tinjong akiseiye. Hitichun Ellha nisim 12 nichun mipi kikhop na achun Additional District Magistrate Syiem in aseina achun dumchep ngahna akon natna tampi chunga galjona aum naban’a gamsung vet hoina ahijal’in khosung lamkai holeh mipi jouse seiphatna apen ahi. Hitobang mipi kikhopna Voluntary Health Association of Meghalaya in agon nakin achun haosa- upa chengin houlimna anei naban’in St. Edmunds college simlai honjong pan agala uvin ahi.
ULFA leh centre kihou vah tading
Guwahati, Ellha 21 (NNN) : Centre government leh ULFA lamkai hon kihouna anei nadiu chungchang’a tuni chun Intelligence Bureau (IB) lamkai anahi chuleh tua interlocutor a pangding milun P. C. Holdar chun songkul’a tang ULFA lamkai ho aga kimupin ahi.
Hitobang songkul sung’a kihou na achun Asom Jatiyo Abhibarton Convenir Dr. Hiren Gohain jong apangin ahi. Kihouna achen achai thuso miho masang’a phondoh ahilou vang’in ground rules ceasefire chung chang thu leh government toh kihou nading nikho kikah to thuho kihou hidin tahsan ahi.
Alangkhat’a P C. Holdar in Assam gam’a ULFA lamkai holeh, Assam Police chuleh Home department lamkai ho akimupi jing ding ahina ban’a Chief Minister Tarun Gogoi in ahung lhung ding Ollha sunga kihouna pattei dingin natoh akipan tai tin thuso miho kom achun ana phongdoh in ahi.
Meghalaya a HIV-Positive lha 5 sung mi 151 kimudoh
Shillong, Ellha 21 : Achesa lha 5 sunga Meghalaya gam’a HIV/ AIDS vei mi 151 hetdoh in aum in ahi. Hinla hetna nei hon hiche hi kichatna a lah lou ding ahi atiuve. Lhatun leh Lhajjing kikah sunga mi agom in 2,616 ho chu patepna ana um in amaho lah-a mi 121 hochu HIV/AIDS natna nei ahiuve tin Meghalaya Aids Control Society (MACS) in aseiye. Nupi naovop 5, 636 ho lah-a mi 30 chu HIV natna nei ahiuve tin MACS in aseiye. Hiche vetlhahna hi Integrated Counselling leh Testing Centres 11 a kibol ahi. Ningkum sung chun mi 931 lah-a 41 hochu HIVpositive ahiu matdoh in ana um in ahi. Tuni chan in Meghalaya a pasal 170, numei 162 chuleh chapang 12, agom’a 344 ho hi HIV-positive ahiuve.
Meghalaya hi category ‘C’ a aum in Manipur leh Nagaland ho sangin anem jo in ahi. MACS project director Dr Amalendu Das in aseina a ningkum sangin tukum in HIVpositive mi hopthum in atamjo e ati. Awareness campaign aum jeh in mi tam cheh cheh kivetsah in aum in hijeh a chu avei hohi kimandoh ahi tin Das in aseiye.
