Thuso chun aseibe na achun vadung sephoi nale venbit nahi IFCD tohding ahin, ahivang’in Official holeh Engineer hon donlou a mipi khohsah na aneilou jeh u ahi naban’a twilet in atohkhah jouse government in agang thei pen’a Compensation apeh din ngehna jong anei uvin ahi.
AR in Annual Kut Meet le Annual Sports Meet kin gonna nei
Imphal, Ellha 21: IGAR (S) noilhah 26 Sector, 8 Assam Rifles chun Annual Kut Meet kin gonna Twilelon Youth Club toh kitho khom’in Sajik Tampak’a achesa Ellha nisim 18 apat nisim 25 changeiyin anei uvin ahi.
Hiche meet’a hi 7 men soccer kichepna pasal junior boys and men category a kibolding ahi. Hiche kin’a
kichep golseh na’a manchah ding kichepna von (sports items) ho jong akipe in ahi. Hiche AR Unit chun kin gon phate’a achal lhahna ding intoh vaihom (admistrative support) ho kithopi na jong aneiyin ahi.
Alang khat’a Ellha nisim 19, 2010 nikho nichun 8 Assam Rifles in Khullen (K) Chandel District kho St. Mary School mun’a Annual Sports Meet kin’a kichep golseh adinga von manchah (sports items) in kithopina ananeiyuvinahi.Hicheachun school principal le staff hojouse’n hiche tobang kithopina, Sajik Valley sung khantou nadia AR ho’n panlah jingna aneiyuhi hatah in pachatna aneiyuvin ahi.
Planning Comission B.K Chaturvedi Manipur hung tading
Imphal, Ellha 21 (NNN ) : Ahung lhung ding Ellha nisim 30 nileh ni 3 hung kholjin ding Planning Commission member B.K Chaturvedi in Manipur gamsunga khantou machal natoh Special Plan Assistance (SPA) noiya North-East in-charge S. N Bro- hmo Choudhury toh ahung vetlhah lhonding ahi. Centre thalheng’a hung ding teni hin Loktak sung’a Loktak Development Authority natoh avet lhonding toh kilhon’in nisim 31 nileh Moreh mun’a Integrated Check Post (ICP),Trade Center, Moreh Hospital tiho avet jou lhonteng Thoubal mun’a Project a avet lhah lhonding chuteng Imphal Secretariat Conference Hall mun’a Department luboh jouse leh semang pachong ho akimuto pilhon ding chujou teng Phallha nisim 1 nileh Chavang KUT 1st M.R mun’a aman lhonding ahi tin thulhut kimu chun asei yin ahi.
Thoubal sung’a sepai 5 suspend kibol
Imphal, Ellha 21 (NNN ) : Achesa Ellha nisim 19 nia Zamir Khan kimat nachung’a deisah louva kiphin mipi ho chung’a ana chatval sepai 5 hochu suspend akibol tan ahi. Suspend kibol holah achun police commando mi 3 chuleh IRB mi 2 ahiuvin hinlah amin u phondoh ahipon ahi.
Hetthei khatchu achesa phatsung’a Assam Riffle’s hon anamat Zamir Khan (39),s/o Zallaudin chuPULF Finance Secretary ahi tia kiman chu mipin deisah louva gangtah a ahin lhadoh nadiu va kiphinna aganei u ahin, hiche achu sepai hon aval’a Tear Gas kap naleh mol’a mijep anabol jeh uva mipi lah’a mi 15 kitoh khah lo anahin ahi. Hitichun hiche chungchang ahin Joint Action Committee (JAC) akiphudoh tolhon’in Chief Mnister kimupina jong anei uvin agang thei pen’a Zamir Khan lhadoh nading leh achat val sepai ho gotna peh ahiding ana ngeh uvin ahi.
Alang khat a Bishnupur District sung’a Hemom Biren (45),s/o H. Mangi inmun a Bomb ana kiseplut kit’in hitobang chondan deilou najal’in Moirang Mairenbam Leikai mun’a nupi hon toumun kiphinna ananei uvin ahi. Hiche toh kilhon chun Moirang Police hon jinglam nidan 5:30 chun kitup tah in Bomb chu aga ladoh tauvin ahi.
‘Journey’ in DD music category award mu, DDK, Imphal injong pachanna nei
Imphal, Ellha 21: ‘Journey’ kiti DDK, Imphal production nanoiya music kihalkhom (fusion), hiche gamkai ading’a um behseh lou music company Rhythms of Manipur kiti loiyin ahin pohdoh chu Doordashan National
Award 2010, music category’a award lahna ana neiyin ahi.
Thulhut kimu dungjuiyin hiche minute 20 fusionmusic hi, Arunachal Pradesh, Assam, Manipur le Nagaland ho music lahkhom le suhtona hin neiji Th. Babu le L. Manibabu in gonna (composition) aneilhon ahi.
Chule Imphal Production Agriculture Program ‘Farmers Pride’ tohgon najeh in tukum a DD Annual Award chu DDK, Imphal in ana kisan in ahi. Hiche program hi L. Manibabu Singh le Assurance Raikhan in pohdoh (produced) na ana neilhon ahi.Hetthei khat chu DDK, Imphal hin achesa kum 2002 apat’a Doordashan
National Awards category jatchom chom’a lahna ahin neijing uh ahitai. Hiche’a kipaman (prize) hopdohna kin hi, ahung lhung ding Phallha (Nov) nisim 25 nile Lucknow tolpia umding ahi.
~ Picture courtesy: Boigund Lenthang
