Kithopina a hin kipe sum le pai ho chu sorkar in akiman dan kholchil dinga international auditors ho tha lah ding jong angaito in ahi. Malik in aseina a hiche kithopina ho chu avaicha twiyin atoh khah ho ding ahin hijeh a chu amaho kom lhung teiding ahi ati. Kholchilna aum dung juiyin twi let chun mihem 20 million atongkha in chuleh United Nations in athi chu 1,600 ahi ati. Hiche hi twi thenglou don jeh-a mi tampi thibe nalai ding ahi tin health official hon gihna aneiyun ahi. Tuchan geiyin sorkar in pan hatah in ala jingin hinla mihem atoh khah hi atam val jeh in hahsatna tampi aume tin Malik in aseiye.Subcontinent sunga hitobang hamsetna hi um khalou ahin hijeh a chu vannoi kithopina ki ngeh ahi tin Malik in aseiye.
China in space station module 2011 teng kapdoh ta ding
Beijing, Lhajing 18 : China in aseina a space station semdoh na dingin module masapen Tiangong-1 chu kisem chai tai ati. Khovei a van thamjolía akikap doh masangin electronics leh manchah dang ho chu patepna anei un ahi. Xinhua thuso in aseina a space module chun spacecraft ho kingah na thei dinga kisem ahin adeh a Shenzhou-8 spacecraft kinga thei ding ahi. Hiche hi 2011 kum kim lam teng kikap doh ding ahi. Tiangong-1 module hin patepna jatchom chom kibol nalai ding ahi vetsahna electrical, mechanical chuleh thermal test hohi akikap doh masanga phatah-a patepna umding ahi. Tupet ahi Shenzhou-8 chu akisem laitah ahin chuleh Long March II-F rocket chu patepna aum laitah ahi. Hiche rocket hin Tiangong-I chu vantham jolía akoi ding ahi. Hiche tohgon hi alolhin a ahileh phat chom khat jou teng space station a natong dinga astronauts ho kisol ding ahi. Hiche na ding chun numei 2 panna in astronauts hon kichuhna anei pan tauve akiti e.
Israel in ni 8 sunga Iran abulu angaiye : Ex-US envoy
Israel chun Iran nuclear programme suhthip ding agel leh ni 8 sunga Iran Bushehr nuclear power facility chu abulu angaiye. Ajeh chu tu kal sung le hin hiche nuclear plant adinga Russia in atomic fuel ahin pohlut ding ahi tin masanga US envoy a anapang khat in aseiye. Russia in Bushehr reactor a dinga Uranium fuel chu Lhajing 21 apat ahin poh pan dingin ana seiyin hijeh a chu John Bolton in thuso miho kom'a hiche thu hi asei ahi.
US diplomat anahi Bolton in aseina a Bushehr facility ahi natoh ache lhah masanga bulu ding ahi ajeh chu Iran milham ho nuclear radiation in atoh khah lou ding ahi. Hinla hiche facility a natoh ache lhah jouva pat bulu ding chu kichat na lentah aum ding ahi ati.
Hiche jeh a chu Israel in nikho 8 sunga Bushehr nuclear facility mun hi abulu angaiye ati. Hiche thu hi Bolton in Jerusalem post thuso a aseidoh ahi. Hinla aman Iran bulu ding hi umdin katahsan poi, hiche jeh-a chu US leh Israel dinga hahsatna tampi hung lhung ding ahi. Iran a nuclear reactor programme hi lolhing tei ding ahi. Hichu
Iran a dia gal kijou tobang hi ding ahi tin Bolton in aseiye.
