Pu Khaipao in houlim aneina ah, "eihohi ipaodoh uleh mitamte ikiti jingun hinla jachat umtah khatchu newspaper khat chajong ihinsah jouji pouve. Tunjong ahitheile thu le la hemasa gouvin lang hoitah in chesah gouvin chutileh mipin na ngaisang diu ahi. Nahahsat nau aumleh keiho MDC ho hengah jong hungun kakithopi diu nahi, eiho hin news 2 ithisah u ahitan avel a umsah louding ahi' atin ahi. Hichun apoh natna jalin dangka 5000 kithopina jong anei paiyin ahi.
Pu Ngamhao injong Sumkawn anabol laiya ahah satdan ho hilchahnan amangin chule tilkhounan editor ho hengah aneiyin ahi. Aman aseina ah, "News hin thilpha aboltheiyin thilse jong aboldoh theiyin phatecha navet
lhahdiu ahi" atin ahi. Subscription mai maiya hingjou pouvin nate, advertise dingho hol unlang chule mi sangin thilso masat gouvin tinjong tilkhounan houlim aneiye.
Pu Nehthang in houlim ahin neichun eiho society sunga News hahsat dan aphongdoh in ahi. Aman aseina achun, "Editor ho lhahsam naleh hoitah a vetlhah ahiji loujeh a sot joulou ahin chukitleh eiho lah ahin News hi isim nomun hinla fee pehding idonse jilou jeh uva kihing jouji lou ahi' atin ahi. Ana kiboiji laiyin mihon newspaper mangchan inajouji uvin ahi ahin tua Gosem in panlahna ahin neiding hi kakinep pi ahin staff ho leh hawkers ho feltah leh kituptah angaiye tin tilkhouna aneiyin ahi.
Chuma bangchun Pu Tongminthang in election masangchun news thupi danle poimo dan kanahen distance education injong Mass Com. kabol e. news kitihi editor pa keu hilou ahin reporter ho leh mipihon jong kithokhom ngai ahi ati. Chuleh news bolhi professional line a nakilah u angaiye, society sunga paoman dan jonghi nahin suhtup diu kakinem e atin ahi. Pu Thangjamang chun news hi muntin a umsah ding adeisah najong aphongin ahi. Napaova news nasim louva napu napa khanggui thimthu ho nahet louleh amangthai nahitai.
Alangkhat ah news hi vet toh angaiyin ahi, nangho hi Mirror of the Society nahiuvin apha behseh louho solouvin aphai tin hilchahna aneiyin ahi. Ahithei channa lekhapheng neocha sunga thutamtah naseidoh gotjoh
diu ahi ati.
Pu Tongkai in Gosem news ahung umdoh jal in kapao kamansah louding ahitan nahahsat nau aumteng nakithopi din kaum jing e atin ahi. Dr. Satkai in professional tah a news editor ho aum diuvin tilkhouna aneiyin ahi. Nangho a konna midangin ajuijou pehding dinmun in um uvin atin ahi. Mipin newspaper ngaichatna anei laitah a Gosem ahung umdoh jalin jong kipapina thuphon aneiyin ahi.
Kuki Inpi Sadar Hills in hetsahna nei
Sadar Hills, Lhajing. 17: Sadar Hills Kuki Inpi a General Secretary anahi Pu Seimang Khongsai chun tuchung MDC election ana tetnom jeh a anatohna a konna haina lekha apeh chu akisanpeh toh kilhon in ama thakhel din Pu Paoneilal Khongsai hi Lhajingnisim 14 nikhon Kangpokpi Head Office mun ah lhendoh ahitai tin Information & Publicity, Kuki Inpi Sadar Hills Pu Ngamlen Haokip in hetsahna ahin neiyin ahi. Tua Gen. Secy popa hin ahung lhungding 2012 chan geiya apoh dinjong hetsahna aneiye.
Vadung a khelha kimu nailou
Saikul, Lhajing 17: Saikul Police Station hopsunga um Tusam khosunga cheng Pu Chungsei Khongsai chapa
Mr. Lamginlen Khongsai kum 6 a upa chu Iril vadung achun akhelhan tuchan geiyin akimu naipon ahi. Amapa
hi a U-nu toh Golden Hindi School, Hangoipat muna School kadinga ache nalhon'a sandal akhehsah lahding agot lhon nah a tuiyin alhoh ahi. A U-nu chuBunglung khoa cheng Upa khatin aloidoh man ahin anaopa vangchu thusoh kipeh chan hin atahsa akimu nai pon ahi.
Hichetoh kilhon'a KSO Saikul Block President Pu Thongkholun Mate in tunia atahsa holdoh goa panlah naneiho chungah kipathu aphongin chule ajing nikhoa ngaichat ahitoh lhon'a pan ahinlah kit diuvin temna jong aneiyin ahi.
NREGS natohna kholchil a umjing
Lamka, Lhajing.17: NREGS toh kisaiya hoitah a chelhah ding deina jalin DRDA staff se group chom chom in akihom un District sunga block ho development work chu vetlhahna aganei uvin ahi. Hiche kholchilna anei utoh kilhon chun block chom chom a pat report ho lah achun ape nailou jong aum nalai uvin ahi tithu akijai. Hichetoh kilhon chun DC a konna hetsahna kimu dung juiyin inspection team hon grading aboltha pai nauva phat alah jeh a block themkhat galhung nailou aumjeh in akiseiyin ahi. Alangkhat ah tuchung NREGS grading kimu dungjuiyin lungnachim aumpoi tin thulhut jong akimui.
Hiche grading dung juichun Henglep leh Thanlon block mun hoa jo ahitan hinla akipe theijep naipoi akiti. Henglep block sunga kho 51 inspection kibolna achun kho 6 bouvin Grade A amu bep danun akiseiye. Chuma bangchun Thanlon block sunga kho 25 lah achun kho 3 bouvin Grade A amu bep uve.
Widow Pension Scheme kihomding
Lamka, Lhajing.17: Indira Gandhi National Widow Pension Scheme (IGNWPS) noiya kithopina umding thupeh aumtoh kilhon'a kithopina mudinga lomhon ahung lhungding Lhajing nisim 20 leh nisim 21, 2010 jingkah nidan 10:30 a patsa CCPur Police Station muna hodohna umding ahi.
Hiche thilgon ahitoh kilhon a Jachong Sinate, District Social welfare Officer, Churachandpur a konna hetsahna kimu dungjui chun hiche nikhoa kihom dohding hi Tolbol (January) 2009 a patsa Ollha (December) 2009 kikah sunga muding hoa ahin chule lha khat sunga dinga dangka 200 kigonpeh ahi atin ahi. Hiche nikhoa amudinga lomhon Election Photo Identity Card, EPIC, BPL Ration Card leh Social Welfare department te I-card peh ahin kichoicheh diuvin jong hetsahna aneiyin ahi.
Mid-Day meal ding anchang hopdohvah hitading
Lamka, Lhajing.17: Government school a simlai chapang hoa dinga Mid-day meal anchang ahung lhunna sotpeh ahitah vangin tuni chan in hopdoh in aumnai poi ti thulhut akimun ahi. Hiche thutoh kilhon in Ms. Jacintha lazarus, IAS, Deputy Commissioner, Churachandpur seidan abahleh mid-day meal anchang a movement chart hochu ZEO in avetsui ahitan tu hapta sunga hopdoh ding ahitai tin hetsahna aneiye. Mid-day anchang hunglhun lam ana hetphah loujeh a kihomdoh vahlou ahi danjong aphongdoh in ahi.
Mi 925 thisan kholchenna um
Lamka, Lhajing. 17: District Malaria Department hon Lhajing nisim 1 le 15 kikah sunga ana damlou thisan vetchilna anei nauvachun Malaria PF natna nei mi 4amudoh uvin ahi. Malaria Department hoa patsa thulhut kimu dungjuiyin hiche nikho sunga thisan vetchilna keneichu mi 925 ahin hivachun Positive 8 leh Malaria PF 4 mudoh ahi atiuvin ahi. Hinla hiche kholchen ahitoh lhon a Malaria natna jeh a ahinkho bei koima hetdoh
in aumpon ahi.
Youth Affairs & Sprots a konna hetsahna kimu
Lamka, Lhajing.17: District Youth Affairs & Sports panlah nanoiya ahung lhungding Lhajing nisim 30 nikho a patsa Lhalam nisim 1, 2010 kikah sungse in Tuibong Peace Ground muna District Level Inter Schools Trial-cum-slelction Test umding ahi. Hiche dungjuia chu Athletics leh Volley ball a dinga vetchilna um ding ahin Volley ball ahileh Under 17 numei leh pasal a hiding, Athletics ahileh Under 14, 17 leh under 19, numei leh pasal a hiding ahi. Athletics a chu lhai kitetna jatchom chom leh chop kitetna, Shot Put, Discus, Javelin, chule 3Km leh 5Km walk jong hiding ahi.
Hichetoh kisai a lunglutna neihon eligibility certificate chu Lhajing nisim 18 a kipatsa nisim 28 changei office hour sunga aga kilah theidiu vin hetsahna Pu Lunkhosei Haokip, District Youth Affairs & Sprots Officer,
Churachandpur a konin akimun ahi.
