Gam sunga skilled workers ngaichat lentah aum jingin, vetsahna in information technology, infrastructure, tourism, media leh health care ho ahi. President nu in jong hitobang khang dong lekha them ho natoh bailam tah-a aum thei nadiuva educational institution hon hiche lam panga simlai ho kichuhna anei sah din ngeh aneiyin ahi. Tulai phat toh kitoh a syllabus ho sem nadinga industry, business chuleh academic institution ho akitho khom angaiye ati. Patil in Sri Vankateswara College chu pachatna aneiyin chuleh UGC leh Nasscom in technobusiness skill development centre hondoh ding tohgon aneiye ati.
Leh a hui le go kitho jeh a kithopina 125 crore PM in phongdoh
Leh, Lhajing 17 : Prime Minister Manmohan singh chun tunin Leh mun'a hui le go hetman louva ajuh-a twiyin asuhset hoi chuleh athi-amang tampi ana um nungin dangka 125 core kithopina aphong doh in ahi. Hiche tosetna a in ase jouse chu lha 2 leh akeh sunga kisa pha ding ahi ati. Hiche hui le go chun ichan geiya thil asuh set ham tia amit tah-a vet lhahna Singh in ananei ahi. Hiche kithopina hi Prime Minister's National Relief fund akon kipe ding ahi. Aman aseina a hospital, school, electricity, roads leh rehabilitation natoh jouse chu phalbi alhun masanga kisa pha ding ahi ati.
Hiche ho semphat na dinga chu fund aum sa tobang ahi. Hitobang vangsetna a mihem tampi hinkho jong ana beiyin hinla Central leh State sorkar in athi ho insung mite kom'a bol thei chan kithopina kipe ding ahi tin Singh in aseiye. Twi let in atoh khah ho phatah-a kithopina aum thei nadinga chief secretary makaina a monitoring committee khat kisem doh ding ahi ati. Phalbi ahung lhun masanga kahung kit ding chuleh thil kibol ho kahung
vetlhah ding ahi tin PM in aseiye. Singh in state chief minister Omar Abdullah jong akimupi in pan lah ding dan aseikhom lhon in ahi. Prime Minister pa chu Union Health Minister Ghulam Nabi Azad, Minister for New and Renewable Energy Farooq Abdullah chuleh Jammu and Kashmir Pradesh Congress Committee Chief Saifuddin Soz in akilhon piuvin ahi.
Ganga vadung asuh net jeh-a factory kikha sah
Kanpur, Lhajing 17 : Pollution Control Board in Tiwari puri mun'a factory khat in a twi theng lou Ganga
vangdunga alon lut sah jeh in akha peh tauve. Hiche factory chun uicha anding asem ahin Ganga vadunga saphe-sagu ho apai mang jeha authorities hon akha sah u ahitai. Mipi akonía complains tampi aum phat a dan dungjuiya natohna kinei ahi tin pollution control Board a district officer Radheyshyam in aseiyin ahi.
Amun chu pollution Control Board hon agavil na a atheng lou tampi amudoh un ahi. Thil nen ho chu pha tah-a paimang louvin factory umna velía chun akipai thang in ahi tin official khat in aseiye. Tunin district administration kom'a lekha pehlut na aum in phalna aum teng leh factory neihochunga gotna kila ding ahi ati. Tuchan geiya Ganga vadunga nen loulut sah factory ho chunga dan khautah kila jing ahi. Lha masa jong chun factory 8 kholchilna ana um in ahi.
MP ho lhalo kalna dinga phat kitep chon Lalu in kiphinna nei ding
New Delhi, Lhajing 17 : Rashtriya Janata Dal (RJD) lamkai Lalu Prasad MP ho lhalo kal na ding phat kitep chon chu along lhaipon hijeh a chu kiphinna kanei ding ahi tin sorkar gihna aneiyin ahi. Lalu Prasad in aseina a MP ho lhalo kal ding deisah lou ho chu crorepati ahilou leh multi-millionaires ahiuvin hijeh a chu agenthei MP ho ding agelkhoh lou u ahi tin aseiye. MP ho lhalo kal ding hi achesa lhaphul 2006 apat a chu ana khongai ahin tua 16,000 asang uhi aki gong dung juiya 50,000 hisah ding angaito u ahi.
Bill chun Dearness Allowance jong 1,00 apat 2,000 hisah ding atiu ahi. Tu ahi secretary official khat in 80,000 asan ahin hinla MP hon 16,000 asan u ahi. Hiche hi consumer price index leh wage index asan jeh MP ho lhalo jong kal sah dinga bill kipodoh go ahi. Hiche chung chonna parliament toukhomna aum teng leh nikhat a daily allowance 1,000 amu u ahi. Constituency allowance a lha khat leh 20,000 chuleh office expense a 20,000 ma amu u ahi. Achesa kum 10 masanga chu MP member 795 ho dinga lhalo anakal chu amu khah pen ahitai.
Madani matna dinga phat kitep kichai tading
Kollam, Lhajing 17 : Achesa 2008 a Bangalore bomb pokehna amat dinga Karnataka Court in thupeh ananei PDP lamkai Abdul Nasser Madani phat kitep chu kichai ding ahitai. Hinla Mandani chu tu chan in kipeh lutna ahilou leh mat in aum hih laiye. Madani matna dinga Court in thupeh aneina a phat atep chu tuni nilhah teng kichai ding ahitai. Kerala LDF sorkar sunga jong Madani matna aum ding akiha seicheh cheh in ahi. Tupet ahi Madani man dinga Karnataka police ho achesa ni 8 sung Kerela mun'a um uvah ahi tai.
Bangalore Joint Commission Alok Kumar toh Thiruvanamthapuram mun'a kikhopna aneina a Kerela IG (Southern Range) Hemchandran in arrest warrant chu kibol tei ding ahi ati-e. Karnataka Home Minister VS Acharya in Kerela sorkar demna anei jal'a Madani hi mat dinga asei ahi. Kerela Home Minister Kodiyeri Balakrishnan in tuni a Madani hi ama tahsa tah ahung kipeh lut louva ahileh Karnataka police ho panpina kipe a kimat sah ding ahi ati-e.
