FIFA World Cup laichun school minchetah khatna simlai hochu school danga simlai hotoh akileukham uchu matdoh in ana umme. Aboldan uchu bookies hobol sanga jong hoijon akiseije. Asang, asanga kileukham ahiuvin, ajaoho tilou koima hetthei ahipoi. Alah uva mikhatchun aseidohlou hileh sangtah aphah diudan ahi. Simlai hochu akimatdoh jouvun houset achangun ahi. Principal pahin ibol'a nulepa tehin nachateu sum hijat jatpihi napeh uham tin alung nopmona aseije. Hichihi simlaihon sum adihlouva aman nao amasapen ahipoi. Phatdang jongleh hotel lutna leh ju chohna kham anei jingun ahi. Abang komleh party abol un beer, Vodka, Martinis leh adang dang nengchetnin athol jiuve.
School dangkhatna machun jilkung nuchu anisehleh class a alutseh in chapang ijat hamkhatchu a imut atohkhajin, alungdong lheh tai. Chapang hochu mitsan dehduh in ahung kitangdoh jiuve. Ibol'a nahitiu ham? Tia adohteng janna lekha kasim sotjeh u ahi tin adonbut jiuve. Chapang dang hochun achainan amahohin drugs abolíu ahi tin aseidoh taove. Numei-pasal chapang themkhat machun mi matdoh theilou khopdin khamna thei abolkitnun ahi - thinner leh whitener anah un, diluters adonnun, chuleh adang tampijong abollun, aboinatah khatchu thinner, whitener leh diluters hohi koiman thilphalou ahi tia akhamlou ahi. Dohthei tahchu: ipipenhi ilungimpi diuham - chapang hon sum tamtah tah akipoh un, ju leh khamna thei lou nengjellin bazaar munnah akimun, school ho ah thinner, whitener leh diluters hohi bailam thetna muthei ahi. Jilkung holeh nulepa hohin simlai chapang hohin ipi abol'u ham ahepouvin, hetding jong agopouve. Dan ineihou hoitah a implement akibollou jonghi themo sahthei ahi. Leiset chunga dan saopen neichu India ahin, hijongleh dan akichelhah sah danleh mipi chunga vai kihop danhi lunglhai aumpoi. Khopi lenho a hin ju kijohna bar atam in chapang kum 15 bephon jong ajon un ahi. Hichi nabol uhi dandihlou ahi tia aseipeh ding koima aumpoi.
Datmo umtah khatchu loujoh hokhun lou ajoh houkhu khamna a manthei ahi tihi ahelou atam'e. Ahinlah, loujoh pachu ibolla alungkham ngaijem? Sum mudingchu ama gel thupipen ahibouve. Lou nachohjeh a kapeh ahin, iti naman dingham nangthu thu ahitai atimaithei ahi, ahinlah chapangho dinga thil phalou kham dinghi ibon uva imopohnao ahijoi. Doctor'n asut louva lou kijoh hi dandung juija talen matsah thei ahi, hijongleh vigilant department hohi aboiman pouve ajehchu sum tampi munathei natohdang tampi anei uve.
Chapang hon school a thil phalou abolhouhi ngohthei tampi umnante, hijongleh thilhi aphalanga ikhelnom uleh eiholeh eiho gah kidongu hite. Insunghi kivaipohna lah a aneopen ahin, dan isem un insung miten ajuisoh keiding itiuve. Tunihin, nulepa atamjo hin achateu adontapouve. Ahinlah, chatehin ibolía kathu angailou hitam tin aphunkit jiuve.
Chehlhang tampi mangcha a in isahbang uvin, insung tampihi kigomía society kisemdoh ahin, insunga kithungaina aumlou teng iti society phachu isemdoh thei diuham. Tulai chapangho mahin hinkho ase-apha mankopje danhi athem taove. Nulepa ten itahsan uchu simlai chapangho sangtah a apass nadiuhin umchanhoi anei uva khamna thei abol loudiu angaije itiuvin, chapang exam a lolhing hochu mipha ahinai tin lungmongtah in iumji taove.
Chapangin exam ahinbol hoilou tengle bouhin iti hinkho amannem, koito kivopma ham tihi ihinkholbep jiuve. Hijehchun, exam bolhoi chapangchun setna abolhouhi akiheji tapoi. Engineering leh medical college hoitah tah ho a ragging, rape leh khamna thei loune aum'e tihi ijahkhah sohkeidiu tahsan aum'e. Simlai chapang hohin school a thil- phalou abol hohi amahthah nadiu ahi tihi hedoh hih jongleu jilkung holeh nulepa tehin ipuihoi uva lampi dih ijotsah kit diuchu imopohnao lentah ahi.
