Meithal (fire-gun/arms) hi kichat umtah mith at thei thaneitah manchah khat ahi. Ahin meichang (bullet) beija meithal chu mithat thei ahipon koimachan jong akichapoi. Naga hotoh kiboitil lai chun eimi gollhang KDF hochun meithal akichoi hochu atamjo achang jaolou ngensen ahi ajeh chu meichang choh nading jong anatampon achoh nading paisa jong ana umpon, gal mite ho mudinga meithal langkeo anaput leleo ahi. Asunga thal chang aum aumlou chu koiman anahepon lung monpi tah in ana kinei thouve.
Ahin michang jaolou meithal kiput khah chu lungmon na thei vang chu ahipoi. Kikap to natah beh umkha ta leh jumna kimutei ding tina ahi. Tulai hin Kuki society nung ivet leh houbung sung kiboi louna aum behseh tapon, thinglhang chuleh phaicham eimi lah jouse houbung nung kiboina adimset tai. Hiche hin avetsah chu ahileh satan gal isat jouta pouve, gal jona inei tapouve ti ahi. Gal akisat tengleh gal lamkai sepai lamkai ho mopohna ahideh set in gal jo leh jolou amaho khutna kingam ahi. Satan galsat na a gal lamchu hou natong Rev. Pastor, Evangelist ho ahiuvin, amahohi gal lamkai ahijeh uvin akham kham in tam hih jong leh lhalo akisempeh in houbung mipin amaho hi ivah uvin ahi. Ahileh tunia satan galsat dinga lamkai dinga ivah hohi ipi iti dan hitam gal asat tapouve. Satan in ihoubung sung jousea vai ahomtan, kinah kibouna, kimit thipna, kilungdou na adimset tan, houbung assembly kibol chanleh akiphoh ding akihouse ding alhase ding alung oilouding ikichu tho taovin, abangloi houbung chu church pastor pa jeh a houbung kehni kiso jong aumin, hiti chun satan in houbung ho chunga tha anei lheh tai.
Hou natong ho dinga meichang chu Pathen lhagao theng chu ahin, tulai eimi hou lamkai hohi meichang jaolou thal kidop atam jeh in satan pa a lethuh jou tapouve. Houbung sunga lamkai kichu na dimset, kibung khenna dimset, ama mi keima mi, tia kilang khenna dimset, lamkai kilhenna aum jong leh eima deilai post akichan louleh boina kisem jeng amadei mikhat lamkai ahilouleh boina sem'a lamkaija pang jeng, kelngoi chinga kikoi Pastor ho jong ichom hideh lou, taona puma Pathen lamve jing umlou, houbung sunga lamkai position a hung pang jing ho koima Pathen lhagao manchah umlou, eima ho deidan leh geldan na kivaipoh ihijeh uva houbung
jouse kiboina dimset ahitai.
Tunia eimi society sunga thudih thutah kiti mong mong aumtapon, kitahna hinkho mong mong alha ving neija leng mang toh abang tan, joule nal'a kibolna adimset tan, thil theng lou tamtah ichepiuvin, kiveina sum le pai holna thenglou leh dih lou tampi ichepiuvin, MLA hon mitmu changin mipi thisan achop uvin, avaset kah sen vot (leech) bangin akikhai det chah kheh uvin, dandih louva kibolna adimset tan, paisa neipa leh athaneipa akitho khom lhonin mipi hi anoi gep gep jeng lhonin, koima aphoh ding aumpon, hou lamkai ho beh in aphoding ham iti leh amaho jong supporter group ahikit uvin, thudih thutah seisanga maipha vet ding joh thupi ahitan, tunichanin Kuki hou lamkai ho michonse khang gilou society suse jing politician ho phohsal ngam aumpon, phohsal sangin thil dih jouse pumía hungkai doh MLA, MP ho inn a taona gamang ding akichu thouvin a chonsetnao chu justify abolpih uvin ahi. Tunia eimi hou natong ho umdan hi Pathen thu apodal la sei seiding kiboina lom lom aumlou pou leh apha ahijing'e ti ahitai. Spiritual field a houbung member ho khantou leh khantou louthu imacha umtalou ahi. Pathen kipah nan tem?
Tunia thilse tampi pumía MLA, MP kaidoh ho phoh ngam aumpoi, Ganja, Kani (Poppy) farm bol ho phoh
ngam aumpoi, ajou analía kivah a mipi kivah na anei ho phoh ngam aumpoi, thingnoi thal choi hon paisa
amoh don don u chuleh ama ho leh amaho akithato jingu phoh ngam aumpoi, haosapun khosug khantou
machal nadingía paisa aneh mang ho phoh ngam aumpoi, school themvetna hoa thil dihlou kibol ho phoh ngam aumpoi, hitobanga i-society sunga thildih lou simsen lou kibol ho ikimu mosah soh keitaove. Hiche hi mijouse mopoh na kiti cheh jongle houlamkai ho mopohna hideh set lou ding ham? Maipha velouva thudih thutah chepi ding, haosa chaga khenlouva, milen, milal khenlouva, ahao avai khen louva thudih thutah sei ding Pathen lhacha hon atoh ding kin akihet lou tengleh houbung sung gam sung boitei ding ahi. Tunia Kukite iboibe be nah lai diu ahi. Ajeh chu hou natongho a kipat moh milham chan gei pathen lhagao vin eidalhah u ahitai.
Pathen lhagao chu satan douna meichang ahi ti iseitauve. Tunia sepai von lhingsetna kivon meithal hoitah tah choi thou ahivanga meichang jao lou keoseh ahijeh a hithei lou ahitai. Pastor ho Pathen lhacha ho oimo hi Koiman abol nompon, Keiman hiche kasei seh seh jong hi hou natong mi ijat ham khat muda kachan ding hetsa ahitai. Hinlah seilouva khoh tah khat ahijeh a kisei ahi. A ngainom lou umjong leh seilouva khoh ho inam ngailutna jalía isei ji jidiu ahi.
Koima chang tuma kigotna ahipon, alhangpia eimi hou lamkai ho umdan kisei ahi. Hou natong hon penthah nadih tah ahin nei teng uleh lhagao thal chang hattah chu ahin manchah diu michonse khang gilou lungthim songpi banga tah hojong ahin kap chip thei diu chuteng leh inam pumpi hetman louva hung kisem pha ding ahi. Tunia, eimi hou lamkai amaho tah bon kihouthei lou kilento theilou hon mipi iti apui thei diu ham? Hiche hi lainatna nei tah a kasei ahin a simdoh jousen kalung thim sunga kagel pa banghin nei simpih cheh uvin tia kahung tao ahi. Houlamkai jao beh seh lou milham phabep khat Koubru mol a ga tao tao jeh in ima umdoh ponte ipenthah diu angaije.
