Hiche province sunga mi 104 jong akihol mo e akiti. UN in aseina a twi let jeh in mihem million khat val atongkha e ati.
Swat leh Shangla mun'a jong lampi lei chuleh chenna in 300 val twiyin asuse tai. Insung khat a mi 11 jong aumnau in achim jeh in athi uve. Hiche thilso na mun hi Kabal mun ahi. Punjab, Balochistan chuleh Gilgit-Baltistan mun'a jong hitobang chun twi let in thil tampi asuse in ahi. Chuban leh mihem 494 jong athi e tin National Disaster Management Authority (NDMA) in aseiye. Twi let jeh in Khyber pakhtunkhwa provincial sorkar in provincial taxes ala tapon chuleh Punjab sorkar in agricultural tax ala tapoi.
Israel in agam sunga rocket kikap lethuhna Gaza tunnel suse
Jerusalem, Lhajing 01 : Gaza Strip apat Israel gam sunga rocket akikap jeh in Israel aircraft in aguh-a thil kipohna leiko khat leh thingnoi miho training camp khat bomb in asepse in ahi tin Israel army leh thingnoi mihon asei uve. Hiche airstrike chun thil asuse in hinla koima akitongkha chuleh athi-amang aumpoi. Thingnoi mihon rocket akap nauva chenna inmun tampi asuse in ahi. Hiche rocket kap chu Jihadist Salafi kiloikhom hon kiphonna anei un ahi. Israel in masanga pat Gaza vaihom Hamas ho hin aphat she rocket ahin kap jinge tin aseiyin ahi.
Tuchunga rocket kikap hi ni 2 sunga dinga anivei channa ahi tai. Gansemni a Gaza apat rocket kikap chu Mediterranean twi pang Ashkelon khopi a achu in car phabep leh chenna inmun khat asuse in ahi. Israel in ale thuh na a Hamas military commander khat athat in ahi tin Hamas in aseiye. Army in aseina a tukum sungin rocket 110 ahin kaplut tauve ati.
Rocket kikap suhthip nadin Israel in achesa Ollha 2008 apat Tolbol 2009 sungin buluna anei un ahi. Hinla tu lhah in rocket kikap hi ahung tam cheh cheh in ahi.
UNESCO world Heritage states SriLanka leh Hawaii kikoibe
Colombo, Lhajing 01 : Sri Lanka central highlands leh Hawaii marine area khat chu leiset chunga thing leh gancha mun danga umlou ahijeh in UNESCO World Heritage list lahna apang lhon tai tin UN body chun aseiyin ahi. Sri Lanka central hinghlands mun ahi thingphung tampi keh ahin chuleh Lho leh gamsa mun danga kimulou jong um ahi. Alangkhatna, Hawaii marine mun chu papahana umokvakeo akiti in Hawaii Monk Seal vacha mundanga kimulou jong um ahi. Hiche mun chu aletdan 140,000 sq miles pacific ocean lah-ahi. Hiche mun ahi sharks ngapi jong tamtah um ahi.
Hiche mun hi mihem ho jeh in amun'a um thingnalouna chuleh sa-le-nga ho jeng jong mangthah dingin aumtai tin International Union for he conservationh of Nature a top adviser Tim Badman chun aseiyin ahi. Badman group hohi UNESCO world Heritage Committee a advisory body ahiuvin amaho hin research tichu kholgilna anei nung teng uleh committee ahi apeh lut jiu ahi.
UNESCO Committee chun Brazil khopi Brasilia mun'a kihouna ananei un hiche achun Florida Everglades jong world Heritage mun khat in phondohna ana nei un ahi.
Pakistan spy hon UK toh kihouna vo hai ta
London, Lhajing 01 : British lamkai David Cameron in Pakistan in galguh bol ho mun danga athot son e tia demna anei jeh in Pakistan spy chief London khopi a kholjin dinga um chu avo hai tai. Hiche hin leiset chunga galguh bol ho doudal na natoh ichan ham khat geiya atoh khah din akiseiye. Kal kit teng leh London a che dinga Lt. Gen. Ahmed Shujao Pasha chu kholjin kigo ahin hinla akholjin ding chu avo hai tai tin senior Pakistan intelligence official khat in aseiye.
Pasha hin British intelligence official ho toh security umdan seikhom ding ache ding kigo ahin
hinla Prime Minister David Cameron in Pakistan demna anei jeh a Islamabad a officials ho lung nom lou ahi.
Hiche Pakistan demna thu hi India akholjin pet a aseidoh ahi Cameron in aseina a phat sot apat Pakistan InterServices Interlligence spy agency hin aguh a Afghanistan a Taliban leh Islamic thingnoi mi dang jong akithopi jinge tia kisei aih ati. Hinla Britain a um Pakistan ambassador Wajid Shamsul Hasan in thu kisei chu pilhin louna avetsah e ati. Spy luboh kholjin ding voh hai hi Pakistan sorkar in jong aphatsah e akiti.
