'Sorkar toh kihou chamding dei ULFA hohi Arunachal leh Assam gamgi a kumtampi namchom chom kingailutah a kichengkhom ahidan hephalou NSCN-IM ho achaval jeh uva alung nopmo naohi akihethem naipon, tujonghi kiloikhomna jouse, thalchoi hihen achoilou hijongleh thudih ihol uva Nagate min'a mikhanse themkhatnin thilse aboljeh uva mei ikousah loudiu ahi' tin NSCN-K in aseije.
NSCN-K injongh 'Kihou chamding dei ULFA te secretary, Jiten Dutta alungkim louna newspaper a hinso pahi kumsottah galguhbol ahitan Nagate political issue hi ahet ma-ma ahiî . Jiten Dutta hin NSCN-IM ho khanset nahi Naga jousen aphatsah ahipoi tihi ahen ahi. 'Alunghan man un ULFA tehin Arunachal ahilouleh
Assam a Nagate chungah khut lhajeng taleh ngol hoitah hiding ahi. Kum phabep geija solam Nagaland'a ULFA hon ngahmun aneijeh un Jiten Dutta hin NSCN-K in golcha hinaleh kingailutna apeh jinghi amantamdan hoitah in ahen ahi. Jiten loile gol mi tamtah hi mundang ah Nagate loiphatah ahinalai uve. Mikhanse thalchoi gamgi lah a vahleho jeh a Naga leh Assamese gamgi chin'a cheng hokhu suhgenthei louding ahi. Mikhanse hohi gang tobang ahiuvin Nagate thalheng ahipouve,' tin NSCN-K thuso chun aseije.
Hijehchun, NSCN-IM gel dan in Jiten dutta in Assam gam'a cheng Naga tehi koima kihinghoi louding ahi atihi vangset umtah ahin revolutionaries ho chondan ahipoi tin NSCN-K hin akigelle. 'Namkhat leh namkhat kidou kitihi pannabei ahin koiman abollou dingin aphai. Jiten Dutta in newspaper a ngainom umlou thu aseijeh a hin ULFA leh NSCN-K kihet themto nahi suse ponte. Insungmi jouse themmo ichan masanga asumochu koiham holdoh masah in aphai,' tin thuso chun aseiben ahi. NSCN-IM hon economic blockade hi nidan 24 kah a nalahdoh lou uleh kanokhumdiu ahi atiuhi Assam leh Arunachal sorkar hi kikum lutna mipi hohi Nagate suhminset ding kigo mikhanseho a konía ahuhdoh angaije. Assam , Arunachal miteleh Naga tehi kicham della achen khomíu angaije tin NSCN-K thuso chun aseije.
Meghalaya a BSF ho insah nadinga thingphung tamtah kiphuhta
Shillong, Lhajing 25: "Mihem apunbe tolhon'a chenpha gamho khantou ding jong ahisa kinelna bei ahi" Hiche toh seimat dingchun Shillong, Nongmynsong mun'a um 83 Battalion BSF noiya sepai ho
chenmun sahna dinga manchah dingin tunaicha chun thingphung 238 tuhchai hel lin aumtan ahi.
Hiche thingphung kiphuh hi achesa lhajing nisim 2 nia anakipan ahitan, tuchan hin Chahthing 150 phuhjou ahin, 57 avel dunga keh ho asat un camp kom'a thingphung 31 aphuhlhuh diu ahi. Tuchan nin Chahthing cubic 38.42 aat doh taove.
Hiche thing-at natoh dinghin mi 22 ho tep ahiuvin hinla athanom atamdeh pon hijehchun avel'a thing at ding koukit ahiphat in 1.55 lakhs chan'a natong nom ahung um pan bep e.
Hiche natoh chu Laban mun'a cheng Amit Kharmawphmang chu 1.59 lakh a dingin peh ahin, ama hi asei tampen ahi. Hiche natong di holna chu Shillong TFS CAMPUS Mowpat mun'a July 22 nia chu um ahi. Hiche thingphuh ding tohgon chu achesa Lhatun 29, 2010 nikho a divisional forest officer, Khasi Hills (T) division
Shillong thuso doh memo no.SN/TD/1907 phalna noiya kibol ahi.
Mawpat muna 83 BN. BSF hoa bou inn kisa ahipon, adang sah bangkhai jong aumna laiyin, hiche jeh'a avel
dung'a thing phung jouse hi kiphuh chaiding tobang ahitai.
Hiche natoh nadinga agoma thing kiphuh doh 238 lah-a chahthing chu 204 ahin, phuhsa 30 leh minchong
thingphung 4 ahin abon'a kum tamtah masanga kitu thing ahi. Thil lamdang'a kihe chu hiche thingphuh natoh chelhah sunghin forest department akon thalheng achepon ahi. Geldoh thei chu India gamsung mundang'a kihe lou beh thingphuh meghalaya gam ahakibol lheh in, tun jong NEHU, Shillong MES chule Defense dept hon
adeitah thing aphuh jing uvin ahi.
NNN in forest department thudoh aneina ah hitobang thing kiphuh thu hi hetmasatna kaneipouve ati. Langkhat ah hitia thing kiphuh jinghi Meghalaya mipi phamosa atamin, thing kiphuh ahitan munchom'a thingtu kit dingin thanei ho tepna anei kit uvin ahi. BSF thuphon chun aseina a hiche thing kiphuh na akon sum kimu hoa hi BSF
camp ho a thing tu na a kimang ding ahi ati.
Gorkha Janmukti Morcha in Darjeeling bandh kou
Darjeeling, Lhajing 25 : Gorkha Janmukti Morcha (GJM) chun Darjeeling pumpi a phat teplouvin bandh abol in ahi. Hinla police hon a lamkai pa that a kingoh Nicole Tamang chu nikho phabep sunga kiman ding ahi atiuve. GJM lamkai Madan Tamang chu masang jep a mipi kijot pet'a chemcha a ana kisun lih ahi. Pathen ni chu Madan Tamang that hi dinga ginmo a kiman Nicole Tamang chu Criminal Investigation Department (CID) ho khut akon pintail kho a ana jamming ahi.
Tunin Darjeeling SP DP Singh kakimupi un N-ColeTamang chu ahinga kiman doh thou thou ding ahi. Hiche jeha chu jing le thaini teng strike leh mipi kijotna kibol lou ding ahi. Hiche ni 2 sung hi police ho phat kipe ahi tin Roshan Giri Gorkha Janmukti Morcha (GJM) General Secretary chun aseiye. Bandh aum sungin offices ho leh kailhang mun ho akihong pon chuleh lamlen a gari lhai jong aumpoi. Kerseong, Kalimpong leh Darjeeling mun hoa mi koima apot doh aumpoi. Nicole Tamang chu CID khutna ajam doh masanga ni 12 sung amaho khut a ana um ahi.
NSCN-IM lamkai lenkhat jamdoh
Dimapur, Lhajing 25: NSCN-IM lamkai lenkhat ajamdoh in Vahchanni chun Dimapur mun ah NSCN-K
abeltai. Senapati district, Manipur a konna D.T. Lincoln hi ahung jamdoh geiyachu NSCN-IM dinga "Steering Committee" kiti lungel lhuhna jouse a jaova ahi. Ama jonghi masanga NSCN-IM kilonser ahi. Thuso miho kom'a NSCN-K hin 'tu a Naga ten angaichat chu kihou cham'a khatle khat kisanto dinghi ahi. Kihou chamna dingahin "ahileh, ahinlah" kiti thuchengho akisei ngaipoi' tin aseije. Lincoln hin Naga tehin kihoucham ding langhi amanolheh un nikhatleh ahin molso vahdiu ahitai, atin ahi.
'Naga te ngailutna jal'a Lincoln hin GPRN/NSCN (NSCN-K) hi ajop ahi, ajehchu hichi hi kigop khomna theipen ahi. Lincoln hin Naga nam ngailu jouse hi condition koilou hella ikihou chamdiu ahi, kihou chamna kiti thucheng hin akoudoh adang aumlou angaije. Nagate hi khat ahin tuphat tah hi ahi ikipunkhom nadiu' tin NSCN-K thuso chun aseije.
Meghalaya sorkar in BPL list velvetna neiding
Shillong, Lhajing 25 : Meghalaya sorkar chun BPL list velvet ding tohgon aneiyin chuto lhon chun beneficiaries ho special cards hopdohna aneiyin ahi. BPL list a umlou BPL insung mi tam tah aum in hijeh chun adihlou phabep aum'e. Chief Minister Mukul Sangma in aseina a adihlou ho kholdoh-a athah beh-a list sem doh ding kingaito ahi. Hiche thu hi janhi a centre 20-point programme velvetna a aseidoh ahi.
Sangma in aseibena a BPL list athah chu khovei teng umding ahitan hichu Community and Rural Development Department in abol ding ahi ati. Centre 20-point programme a Meghalaya chu 12th channa in apangin, North eastern states lah-a abol hoipen ahi ati. Hinla hiche sanga san joh na dingin bol ding tampi aum nalaiye ati.
Hijeh a chu sorkar moh um thim thei ahipoi. Centre 20-point programme hi 1985 kum'a chu anache pan ahi.
Hiche tohgon na noiya hi vaicha-genthei suhmang ding chuleh mivaicha ho chanvou musah tei ding ngaito na ahi.
Assam le Nagaland gamgi thua kiphun lhon
Kohima, Lhajing 25 : Assam Nagaland gamgi thua Assam government ngohna chu Nagaland government in "ngohna hoilou" ahi tin CM press secretariat Abu metha chun tunin thuphon abol e. "Gamgi toh kimat thua As sam Govt. in thuso abol dohchu bul le bal neilou kichat umtah, meicho kongthei thuso ahin, mipi vaihom ho thupon dingin akilom pon, hijeh a Nagaland government in hitobang thukisei chu themo akichan e' tin Nagaland CM Secretariat thuso dohchun aseije Nagaland government thuso chun aseibe na ah "Nagaland-Asam mipi lungmong leh kingailua phatsot a pat cheng khomsa ahin, hichu kiche pijing ding ahi, kihet them louna aumteng kihoukhom'a boina seitoh joh ding, hitobang thuso hin ngailutna sanga kivetda na asuh sangbep ding ahin, hijeh a chu hitobang umdan hoilou leh thuso akon lamkai ho mabanía kiven phat angaiyin ahi' ati.
