Ipi chu hitaleh hiche thua hi mipi tamtah in lunggel aneinaho aselut uva chule kinel nathei chan'a kinelna anei uva hitia chu aphat naleh asetnah aseijingu ahi. datmo umtah khatchu hitobang MP ho lhalo ding mipi lung sunga lungna chimtah a gellhah hinai louva MP kaidoh jouse kilungtoh tah leh thakhat tah a dinkhom uva Bill chu aphatsah jeng thei uhi datmo umtah thilkhat vang ahi. Aitih a lung kitoh tah a pan lakhom louhon hiche thua ahung kito jeng uhi tijat aumin ahi. Masanga lunggel kibah loujeh a ana kihou khalou Rashtriya Janta Dal ho ahin Samajwadi Party (SP), Bahujan Samaj Party (BSP), Janata Dal (United), Shiv Sena le Trinamool Congress ho jengjong ahung kithutoh jeng uvin ahi. Amaho loitoh ana kitoh louhel political party dangho jeng injong imacha nelkalna abol kit pouvin ahi. Hiche lhalo kalsah nading thu ahung kipoh doh chun Rashtriya Janata Dal (RJD), Samajwadi Party (SP), Akali Dal, Janata Dal (United), Shiv Sena le Bahujan Samaj Party hon ahin thumbe nalai uvin ahi. Alangkhat ah Bharatiya Janata Party (BJP) le adang hovang nelna neilou helin atou thimbeh jeng uve.
Japi dinga thil phachomdi chelhah thei nadinga MP ho henga phatsahna aneidiu ana kilhun laichun koimacha lunggel kibangin ana umkha pouvin ahi. Ahinla tua amaho phatchom nading thilkhat akigel peh uvachun asit un athumbe uvin kitoh tah in apangkhom uvin ahi. Hitobang ahung kitho khom uhi masang laiya Supreme Court in Election Commission ho henga MP dingdi ho akhol chen uva achunga gitlouna neikha, tolthat kha ahiloule thildang hoa police case neikha ho election a kitesah loudinga asei uchun MP jouse kilung toh tah in ana pangkhom kit uvin Supreme court thusei chu ana pompeh pouvin ahi. Chuto bangma chun nehguh chahguh ho matdo nadinga Swiss bank a MP ho account kholding lunggel ahung umchun kilungtoh tah in thumanlou
pouvin anel lhauvin aban chelha louvin sum tampi akikhol thei nahlai diuvin aum tan ahi.
MP hon lhalo amudiuva aki thuto banga Bill kiphatsah hi khutjung a simthei bep ahi nalaiye. Tu naicha Indian Medical Council bill kiphatsah chu seichah theikhat ahi. Ahin hiche Medical Council bill hi nehguh hanta khat ahi vangchun nahsah in ana nei pouvin ahi. Geldoh ding khatchu Medical Council Bill tu naicha a chu phatsah ahi vangin kum 16 masanga ana kipelut ah ahitai. Hoilai phat hijongleh mipi thalheng dinga kilhengdoh MP hohin amaho phatchom nading aum lou lai se-a chu Bill hohi aphatsah ngeilou u ahi. Mipi phatchom nadinga deisahna kibol khum jouse hi notthap in akoi jing uvin ahi. Hiho chungchon a akhohse chu ahile kumseh le MP 60% a tamjo kimuto jing uva japi phatchom na dinga phatsahna kigong pesticide management bill 2008 ahin the seeds bill 2004, the coal mine amendment bill 2000, the communal violence bill 2005, the representation of people bill 2006, the insurance law bill 2008, the TRAI bill 2008, the railway property amendment bill 2008, the drugs and cosmetics bill 2007, the motor vehicle bill 2007, the National Road Safety and Traffic Management Board Bill, chule adang japi phatchomna thei tamtah Bill kipelut hochu tuchan geiya seipoh louva
umjing nalai ahiuve. Ijeh inem itileh MP atamjo in phatsahna aneikhah loujeh uva vaitham den ahi.
MP ho lhalo kitam sahjeh a deimo nathu kisei ahipoi, ahin mipi thalhenga lhendoh ahi jal uva japi dingle amachang phatchom nadi ho ahung hiteng japi ding gelpha louva aum uhi MP hohi mipi thalheng ahi pouve ti seidoh nomna kineijeh ahi.
