Lamka, Lhajing. 27: Kuki National Organisation (KNO) noiya um Kuki National Front (S) ho Designated Camp 'GILGAL Camp' kiti chu N. Phaisat Gamsung achun jinglam nidan 11:30 in Pu Khaipao Haokip MDC Kholmun DDC Jingun hinan hondoh ahi tai.

Pu Khaipao Haokip in houlim aneina chun, "Gamleh Nam huhbit nading le mihem hinkho nom'a akichol theiding le khangthah hon lampi chom chom'a khantouna anei thei nadiu vin keima Khaipao Haokip in kahondoh ahi atin chule Kuki National Front Ponlap dopsangna jong aneiyin ahi. Hiche kin-gon sungchun KNF (S) sung'a Nampi sepai ana mollem saho geldoh nan Salam aboh uvin ahi.


Pu Solet Haokip Chief of D. Phailen le Pu Khailet Haokip President Kuki Innpi Tuila Lhang teni chu Jinjaum le Kin neipan apang lhon in chuleh KKL Lamkai, KSO, CDSU, MDC, KNO Lamkai holeh UPF sung'a lamkai honjong ahung oup pi uvin ahi. Pu Isacck Kuki, Information/Publicty, IPR a kon'in GILGAL Camp Report le KNF(S) sung'a kivai pohdan ho achomlam tah'a houlim aneina achun Lhakao 2009 a patsa chun Gilgal Camp Construction akipan in hinla Government thupeh dungjuiya Lha 6 sung'a jotheng ding atiuchu Fund vaigei jehin aphatchan ana kijou theipon hinama jongleh gollhang ho tomngai najal'a natoh kichepi jal'a tunia hi ki thenso thei ahin Lha 16 alhing tai atin ahi. aman aseibe na ah, "Sorkar in Camp khat sahdoh nadin dangka 50 lakhs Sanction abol uvin hilah ahin 38.5 Lakh bou akimun Lakh 12 hi pending ahi nalaiye ati chule Solkar akon in Langva Bundle 44, Sintex 1000Ltr. khat, 500 Ltr 2,Thih khao Bundle 10 ho akimun Camp sahnan dangka 50 lakhs abeiyin Lampi semna hon dangka 20lakhs val akisumang in KNF(S) Cadre Strength hi mi 250 ahin hinla sorkar in mi120 bou eihet peh uvin Camp a hi Mi100-120 kikah kium jing ahin mikhat a Lhalo dangka 3000 akipejing in dammo hahsat nan manbeiyin akiven insung miho anchang sumle pai avat dungjuiyin sorkar in Stipend ho pending in Lha 3/ 4 koi jongleu Chapangho gelkhoh najal in aphat chan Lhalo ho akihom jing e ati.
Gilgal Camp hi C.O vaihopna noi um ahin ama hetpi beiya camp lutthei loudiu khojin nunga lamkaiho kisan hijongle phalna beiya luthei loudiu ahi. Sunday nisih le Worship Service akineiyin Section in akitol in chule koitobang Pathen thusei nom ahungnom chan lem ahi. Second Saturday nikho sehle KNF(S) Nuten ahin gon dung juiyin Fasting Prayer Day tin akimang in kum 2 achetai tinjong aseiye. Khopi sunghin chapang ho kivettup thei nading in nisim in Lamkaiho minkouna akibol in lamkai hihen chapang hijongle umdan kilom lou Julesa, Numei a kichem, Lekha kap bol'a minset na aumle apan muna pat kiladoh a Rank Down kibol ji ahi, chule Kum 7 sung Service hia Holy Marriage aum le Expenditure jouse Organisation in kipodoh a Inn le lou Kilom tah a ki innchon ji ahi. Danthupeh jui Lamkai mipi seiphat changho inn le lou kilom tah in akibol peh in tunjong Cabinet phatsah dung juiya kumkhat le mi-10 thungai kilheng doh'a kibol pehding ahi ati.

Gilgal kitihi Bible Joshua 4:19 a kiladoh ahin Israel ten Jordan agal kai uva chol ngah namun asem naochu Gilgal Camp kiti ahin hiche Gilgal Camp jonghi kichol ngahna muna kinei ding ahi atin ahi. Camp hondoh na
kin kichaiyin Kuki Nam sepai te lah a lunglhai na Chamna le lungmonna aum'a lungtup u molso ahithei nadin ngailut ankong jong asoh khom uvin ahi.