Hiche milun holah chun state transport minister PC Zoramsangliana in Rs 5,09,497 amangdoh in, kholchena sum mangdoh tampen ahin, langkhat a Parliamentary Secretary S Laldingliana in Rs 13,172 bou amangdoh in, kholchena sum lhom manpen ahi. Hetthei dingin Mizoram milun state polam kholjin-doh sum mandan chu ahileh state home minister R Lalzirliana in thumvei kholchena ah Rs 26,278 amangdoh in, agriculture minister H Liansailova in Rs 1,29,357 amang in, education minister Lalsawta in 12 vei kholchena ah Rs 2,88,022 amangdoh e. Chutobang machun state polam a 8 vei kholchena ah health minister Lalrinliana Sailo in Rs 2,30,877 amangdoh in ahi.
Parliamentary Secretary Lal Thanzara in kholchena jengseh in Rs 2,23,955 amangdoh in, atam mandoh pen ahin, atohkhompi Lalrinmawia in Rs 29,665 amangdoh in, kholchena sum lhom man pen ahi.
Guwahati a UNLF mi 11 kiman
Guwahati, Lhajing. 19 (NNN): Assam police toh central sepai ho kitho in tuni chun Guwahati munna United National Liberation Front (UNLF) gamvah mi 11 numei 2 jaonan ana man uvin ahi. Thingnoimi ho toh kimat tha thil hochu, Maruti Gypsy 2, Laptop 5, satellite phone 1 leh mobile phones 20 ahi. Hiche thingnoimi ho hi Assam capital a hi pansauva alunggel ngaito ho asem/aboldoh jiu ahi akiti.
Amaho hi police hon guhthim thulhut amu uva konna tuni jingkah matah a chu aum na mun uva agamat doh u ahi. Police hon khoutah leh gahtah in amaho chu thudohna aneiyuve tin Assam police hon asei uvin ahi.
Mizoram a HIV Positive mi kichat umtah a pung jing
Aizawl, Lhajing. 19(NNN): Mizoram State AIDS Control Society (MSACS) a konna thu kimu dungjuiyin, agamsunga HIV positive mi nasatah in apungjinge ati. Ellha 1990 apat tukum Lhamul chen chun Mizoram a HIV positive mi 4846 apha in ahi. Lhamul 2010 sung keo seh a HIV positive kimudoh chu mi 125 alhingin, chuleh Lhadou 2010 sunga chun mi 113 test kivet na a konin akiman doh in ahi.
Abonchan, tukum sunga chun, mihem 22057 thisan vetchilna ana umin, amaho lahachun mi 757 HIV positive nei akihedoh in ahi. Hicheho lah achun, numei-pasal kitimat a kona HIV positive kilahdoh chu mi 518 ahiuvin, adang mi 209 ho chu lou kikapna a konna akilah doh u ahi ati. HIV positive ahi jeh a AIDS natna pilhing 1990 kipat tukum Lhamul chan gei chun mihem 477 alhintai ati. Hiche thuso in aseina achun, AIDS jeh a mihem ahinkho bei mi 174 alhingtan, amaho lah achun 101 pasal ahin chule numei 73 ahiuve ati. HIV positive neiho lah achun kum 25 le 34 kikah mi 59 apanguve ati.
