Hetding chu hiche natoh hi Assam Rifles khohsah najal bou'a hung kipandoh thei bep ahi.Hiche natoh hi IGAR(S) vaihop nanoiya Ukhrul munía pansa 10 Sector AR hotoh amunding leh natoh dingdan vettohna um masa a natoh hi kipan ahi. Hiche tohgon hi tohchai ahiteng agamsung mipi dia hatah a khantouna hung hiding ahi, tin thulhut kimuchun asei be'n ahi.
Simlai leh jilkung hon toumun kiphina neiyu
Imphal, Lhajing 19: Education hi 'free zone' hisah un - asuboithei jouse a konin lha ongun tia ngehna anei uchu aphatchom behsehlou phat in Imphal'a school khatna simlai holeh jilkung hon Vanghomni chun kiphinna aneiyun ahi.
Galguh bolhon jilkungho lhalo a kon'a 2% lahding atiuchu adeiloujeh un Imphal East district noiya Khurai Kongpal Laishram Leikai mun'a Popular High School hochun school campus sungin Vanghomni chun toumun kiphin abol un class khatcha alahsah pouve.
Thulhut kimudung juiyin Lhajing nisim 17 nichun galguh bolmi kahi tia kisei khangthah khat school'n ahungin jilkung jousen lhalo 2% hi party fund na dinga napehdiu ati ahi. Nidan khat jouvin galguhbol khangthah michom khat ahungin sum eipe taovin ahung tin ahi. Hitahchun, jilkung hochun lamkai lenhon sumdong dinga nahinsol ahi hetna dingin proof bol in atiuve. Ahinlah, galguh bolpahin kahungkit tengleh letter head kahin
choiding ahin, sumhi nahin pehlou uleh nom nasah loudiu ahi tia agih jouvin achetai.
Hichi a pat in school sunga lekha kihil danhi achavaitai. Ajehchu, jilkung hohi alung linglao uvin class lahje ahetapouve tin toumun kiphinna a pang simlai khat in aseiye. Kiphin nahi jingkah 10:00 a pat 3:00 chan kibol ahi.
National Highway a thilpo gari song’a kisep chuleh kihal
Imphal, Lhajing 19: Melhetlou hon Vanghomni chun NH-53 a thilpo gari 2 meijin ahal un chuleh blockade deisah hidinga ginmo umhon NH-39 a thilpo gari 30 chu amaihai asechip peh uvin, garitol mi 2 leh handyman khat akitongkhai. Hichi hi United Naga Council, Manipur hon thil angeh uhi central sorkar'n agelkhoh pehna dinga ni 20 dinga economic blockade akouchu ni 15 lhinni a thilsoh ahi.
Melhetlou hohin Jiribam a pat NH-53 a Imphal hinjon thilpo gari nichu Vanghomni jingkah 7.30 don in Tamenglong district, Noney police station noiya Tupul a pat kilometer 3 kigamlat munna chuahal lhah u ahi. Security kilhonpi louva hunglhai Truck No. AS01/3C-2665 leh NL024-9461 namphu in akingahsah un songin asepmun chu in ahal lhaove tin police thulhut chun aseije. Alang khat ah, blockade tosot ho dinga ginmo umhochun NH-39 lampi a thilpo gari hochu sepai hon akilhonpi vangin sunchangnoi laitah in songin Senapati district noiya munni in nilhah lang 2:00 leh 2.30 donchun asep uve. Thilpo gari 30 chu amaihai achip hel jenge. Police ho seidung juiyin akitong khachu mithum beh hinte. Amaholah a Gologhat, Assam a kon tu-tua Dimapur a cheng Rajen kiti pahi akiha tohkhah in ahi. Amahi thilpo gari No. AS01C-0543 tolpa chu ahi.
Hetding khatchu UNC hin Central sorkar kom'a thil angeh u apehna diuva ni 20 dinga economic blockade akouvu ahi. UNC in angeh hochu - Lhaphul nisim 6 nia sepai hon Mao gate a meithal alhajeh uva simlai chapang 2 thileh mi tampi kisuhkhah na kholtoh dingin judicial enquiry eiphudoh peh un, UNC leh ANSAM president teni chunga themona nei ahihonnin matding ahi atiuhi ladoh uhen chuleh Manipur thinglhang gam'a Autonomous District Council hi sumangun tihohi ahi.
Small and Medium Scale Pharma Sector kithopina um ding
Imphal, Lhajing 19 : Department of pharmaceuticals in Ministry of MSME toh kitho khoma Schedule "M" Compliance ho adin scheme asemdoh un ahi. Hiche scheme hi pharma sector a SSI units hon amuthei dinga kibol ahin Credit Linked Subsidy Scheme (CLCSS) noiya kithopina hi amuthei u ahitai.
Hiche Scheme noiya pharma SSI units hon 15 percent (upto 15 lakhs) chu institutional finance akon a
dangka 1.00 crore chan amuthei diu ahi. Hiche hi schedule "M" compliance a aum thei na diuva panpina kipe dinga um chu ahi.Hiche scheme hi mun tin'a mipi hon ahet them na ding in state level Awareness Building Workshops (ABSs) in pharma umna munpi ho vetsahna Goa, Munbai, Baddi, Chennai, Hyderabad, Ahmedabad, Indore, Dehradun chuleh Bangalore mun ho a Pharmaceuticals department in workshops abol in ahi.
Hiche subsidy hi 15 percent (Upto 15 lakhs) chan muthei ahi hichu pharman manufacturing units thah ho jong
pang thei ahi. Hiche hi Minister of State for chemicals and Fertilizers Shri Srikant Kumar Jena in Lok Sabha a
hetsahna aneiyin ahi.
Hetgilna kitetna umding
Imphal, Lhajing. 19: Phallha nisim 28 tengleh Chemistry Department, MU munna National Standard Examinations - Physics (NSEP), Chemistry (NSEC), Biology (NSEB),Astronomy (NSEA) chuleh junior sciences (NSEJS) kitetna umding ahi tin Prof. N. Rajmohan in Manipur University min in thu-so phondohna aneiyin ahi.
NSEP, NSEC, NSEB leh NSEA hohi CBSE class XII level hiding ahin, chuleh NSEJS hi CBSE class X level hiding ahi ati. Hiche kitetna a lolhinna neiho chu international Olympiads chen geiya gapang thei diu ahi. Hiche kitetna dinga form pehlutna phat hi ageipen'a Lhalam nisim 10 ahi.
NH-53 akisemhoi phatnin gari atangden tapoi
Imphal, Lhajing 19: National Highway 53 hi mutheitah a akisemhoi tahjeh hin thilpo gari atangden aum tapoi ati bannah Transporters' and Drivers Council hohin state sorkar kommah NH-53 a gari tolho leh truckers hon kichatna neilou hella achethei nadiuvin sepai ninglhing setnin koijun atiuve.
Drivers' council ho thuso chun thilpo gari 50 Jiribam'a FCI godown a chang podinga cheding hohin NH-53 a sundinga song apoh uva jingleh Imphal khopi adalhah diuahitai atin ahi. Hichi thilpo gari hohi sepai hotoh kilhondiu ahijeh hin council hin garitol holeh truckers hohi ahungcheh diuvin temna aneije.
Council thuso jonghin NH-53 langa thao podinga Lhajing nisim 12 ni a chehochu janhichun Imphal ahung lhung taove atin ahi. NH-39 mang nalai thilpo gari munchimjeh a Kohima komma kitangden hokhu akile uva NH-53 langa ahung got uleh kijahnom louding ahi. Ajehchu, council hin NH-53 hi spare tyre banga mandingin ak- iphalpoi, tin aseiben ahi.
Pasal khat athisa kimudoh
Imphal, Lhajing. 19 (NNN): Tuni jingvai lamchun Jiribam police station hopsung a um Tuinengba vadung pang
khat achun Tonglal Singson (44) S/o Phaokhodou Singson, Tamenglong khomi chu alongdamsa police hon agaladoh uve.
Police thulhut kimuchun asei na ah Tonglal Singson hi Kuki galguh bol hidia ginmo hon akhomun a kon nisim 18 nidan 6:00 don'a hunam a apuimang uva, alongdamsa tunia kimudoh ahi, ati.
