Louthul kang hohi melah ah ilhah leh atuijeh in bu tamtah tah akineh doh jouvin ahi. Cinema a vampires film (mi thisa hon amu mu thisan achop) ho ajong ivet leh louthul kang in vampires ho anodoh jouvin ahi. Hiche keu hilou vin louthul kang in buhse-khohsih, cancer,lungchang natna, lunggel sang neiho, ahilou leh adang dang natna ho jong avengdoh jouvin ahi. Tuhin louthul kang tahsa adia aphatchom dan aban ban'in veuhite.
Buhse :
Thinglhang'a ding'a tichu pharmacygamlhat naho a koi tobang buhse avei a ahileh damdoi phapen chu louthul kang hi ahi in ahi. Louthul kang a kijut ham ahilou leh asel'a ineh leh buhse ho adaldoh jouvin ahi. Iti louthul kang in natna adaldoh thei ham? Kholgilna neihon aseina ah louthul kang hin immune function (natna daljou theina) ahat sah in hijeh chun tahsa chunga natna hung chu ding ho aveng doh joue akiti.
Cancer : Kum ijat ham research hon louthul kang in cancer natna ajendam jou ding hinam tin anakhol uvin ahi. Cancer natna hoidoh thei ding chu immune system ahat ngai ahi, hiche jeh achu louthul kang in hitobang boltheina chu anei in ahi. Hiche hi kholgilna neihon mihem chung leh gancha chukit leh test tubes ajong anabol uvin ahi. Akimudoh khat chu louthul kang hin cancer natna cells ho asutang jouvin ahi.
Louthul kang in cells a cancer natna hung um kigo ho asutang in chuleh cells athiding ho jong a ngongkai sah in ahi. Louthul kang in oesophagal, breast, stomach, prostate leh bladder cancer ho ating jouvin ahi. Louthul kang hi igoi bong teng diallye disulphide leh sallycystein aumdoh ji in hiche hin cancer natna jatchom chom ho avendoh/ating jouvin ahi.
Lungchang natna :
Lungchang natna jatchom chom akon hung kipandoh ahitoh lhon'in louthul kang in jong natna jatchom chom ho avendoh dan leh ajendam danho atam in ahi. Louthul kang in lungchang iti avendan ham? Amasapen in cholesterol levels (atha/alap) asunem in, HDL (good) cholesterol levels asu sang'in, LDL (bad) cholesterol arterial walls a hung um ding ho avengdoh in ahi. Niseh leh louthul kang neh jing hin cholesterol levels 9% in asunem in ahi.
Louthul kang hin aorta kiti lungchang akon thisan pedoh alhang lou nadin avengdoh in ahi. Kum tamjeh, diet hoilou jeh chuleh dumchep jeh in aorta atah ji in ahi. Hijeh hin louthul kang ne jingho aaorta ahoi in dam jong adamthei uvin ahi.
Lunggel sang neiho :
Louthul kang hin lungchang adia adang aphatchom sah khat kit chu ajoene kiti louthul kang a kimudoh hin thisan ho apatsah (thinning) in chuleh thisan akan (clot) ding ho akon adaldoh jouvin ahi. Louthul kang kihaneh jing namun ho ahin lungchang natna ahilou leh lunggel sang kiti natna ho aumbeh setpon ahi. Hitobang'a louthul kang damdoiya hung kiman nahi Chinese ho in kum 100 masang apatna ahinmat pan u ahitai.
Natna hit akon kila thei (Infection) :
1858 kum apat in louthul kang hi natna hit that/dal thei (anti-bacterial properties) ahi dan amudoh uvin ahi. Hiche kum ma machun Louis Pasteur in bacterial cells lah a louthul kang alhah lut leh athi chu ahin mudoh in ahi. Hiche apat na chu louthul kang hi natna hit kikai thei ho akon kiveng nading'in ana mang ji uvin ahi. Adang'a akiman nachu ahikit leh WW II laiyin British doctors hon gal'a kisukha ho natna hit alut lou nadin ana mangchauvin ahi.
Albert Schweitzer in jong louthul kang hi typhus (khohsih) leh cholera (ehkho) jenna in amang'in ahi.
Chuh thei lou (Impotence) : Louthul kang hin nu-le-pa kikah a kipol thanopna apehbe theiyin ahi. Masang chun louthul kang hi "aphrodisiac" (numei le pasal chuhna) ding'in anamang uvin hichu tukhang'in adih dan ahinmu doh uvin ahi. Akiseima bang'in louthul kang hin thisan achehoi sah in chuleh thagui/thajung ho jong ahoiyin ahi. Researchers hon amudoh bang'in pasal ho achuh nadin nitric oxide synthase kiti angaiyin hichu louthul kang ah akimudoh
in ahi.
Naovop (Pregnancy) :
Numei naovop ho ding'in jong louthul kang hi aphatchom na aum'in ahi. London hospitals a doctors hon amudoh dung juiyin louthul kang hin naosen anu oisung'a aumpet in jong gihna (weight) apebe theiyin ahi akiti. Chukit leh nupi ho naonei teng vangset nathei hung umding kigo ho jong tichu lunggel sang toh kisai ho asulhom in ahi.
Research hon louthul kang tahsa adia damtheina ahidan akholbe jing uvin amahon amudoh nauva louthul kang in geldoh theina (memory power) ahatsah in chuleh lhoh jong adamsah theiye akiti. Hiche keu hilouvin louthul
kang hin lunggel sang natna neiho jong asuhlhom peh in ahi.
Louthul kang hin thisan ho apatsah (thinning) jeh in koi tobang surgery, high blood pressure jeh a lou neho ding'in louthul kang nehlou dia pha ahi.
Louthul kang hi amin'a kine sang'in asel'a ineh a leh aphatna hi atam'in ahi. Ahina amin'a ineh jong leh aphatchom nachu amang dehpon ahi, amabou asel'a kine hin athil bolthei nachu ahatsah joh ahi. Louthul kang aselía naneh ding teng tam neh ji hih in ajou leh na oi-sung nom lou ding ahi. Themkhat hihen tamtah hijong leh natahsa a aphatchom nachu kibang soh kei ding ahi.
